Read tshwa 1 Samueli 13 Bible Online

1 Samueli 13 - tshwa bible

1 Samueli 13

¹Saule i wa hi ni 40 wa malembe laha a nga maha hosi. Anzhako ka malembe mambiri na a fumela Israeli,

²Saule i lo ti hlawutela 3,000 wa vavanuna va ka Israeli; a 2,000 wabye va wa hi na Saule le Mikmaxe ni le xitsungeni xa Beteli, kanilezi lava va 1,000 va wa hi na Jonatani le Gibea ga ka Benjamini. Kasike vontlhe vanwani i lo va tlhelisa, loyi ni loyi a famba tendeni gakwe.

³Jonatani i lo hlasela a butho ga vaFilistia le Gibea, ni vaFilistia va lo zizwa. Saule i loba mpunzu lomu tikweni gontlhe, aku: A maHeberu a ma ingise!

⁴Zonake a va ka Israeli vontlhe va lozwa lezaku Saule i hlasele a butho ga vaFilistia, ni lezaku vaIsraeli zinyenyeko ka vaFilistia. Zonake vontlhe vanhu va lo tsombana le Gilgali va lanzela Saule.

⁵Zonake a vaFilistia va lo tsombana khatiginwe a kulwa ni va ka Israeli. Va wa hi ni 30,000 wa tikareta, ni 6,000 wa vakhileli va mahaxi, ni vanhu vo tala nguvu khwatsi i seke ga fungu wa bimbi. Va lo kanziha va ya gova le Mikmaxe, hi le Mutsuwuka-gambo wa Bet-Avene.

⁶Laha a vanhu va ka Israeli va nga wa wonile lezaku va le mhangweni ya hombe, hakuva a vanhu Va wa karatilwe nguvu, va lo fihlala lomu timhakweni, ni lomu tikhwareni, ni lomu maribyeni, ni lomu mikovotlweni, ni lomu marinzini.

⁷Manwani maHeberu ma lo tlhatuka Jordani maya tikweni ga le Gadi ni le Gileade. Kanilezi Saule i wa hi le Gilgali, ni vontlhe vanhu lava va nga wa mu lanzela va wa rurumela.

⁸I lo rinzela ntlhanu wa masiku ni mambiri lawa ma yimisilweko hi Samueli, kanilezi Samueli a nga hatlisangi ku chikela le Gilgali, zonake a vanhu va lo hangalaka va suka ka Saule.

⁹Zonake Saule aku: Nehani munyikelo wa kuhiswa ni muphahlelo wa kurula. Zonake i lo nyikela munyikelo wa kuhiswa.

¹⁰Zalezo na a ha ku gumesa ku nyikela munyikelo wa kuhiswa, Samueli i lo chikela, zonake Saule i lo huma ku mu khinga kasi a fela ku mu losa.

¹¹Samueli i te ngalo ka yena: Xini u zi mahileko ke? Saule aku: Nzi lo wona lezaku a vanhu va hangalakela, ni lezaku wenawu a ku chikelangi hi siku gi yimisilweko, na nzi wona lezaku a vaFilistia va tsombene le Mikmaxe.

¹²Hikwalaho nzi wona lezaku a vaFilistia va ta relela va talwa na mina leno Gilgali, na nzi nga se ku kombela ka Jehova. Hikwalaho nzi lo ti kurumeta nzi nyikela a munyikelo wa kuhiswa.

¹³Samueli aku ka Saule: U mahile wupumbu; a ku hlayisangi zileletelo za Jehova Nungungulu wa wena, lezi a nga ku leletele zona. Hakuva Jehova ngha a wa yimisile mufumo wa wena hehla ka va ka Israeli kala kupinzuka.

¹⁴Kanilezi makunu a mufumo wa wena cima wu nga ta simamisa, Jehova i ti lavele munwani munhu loyi yena a mu ranzako. I ta mu yimisa a kuva hosi hehla ka vanhu vakwe, hakuva wena a ku hlayisangi lezi Jehova a ku leleteleko zona. [25]

¹⁵Zonake Samueli i lo suka le Gilgali a kanziha Gibea wa ka Benjamini. Saule i lo hlaya a vanhu lava va nga wa hi naye, a kuma 600 wa vanhu.

¹⁶Saule ni nʼwana wakwe Jonatani, ni yimpi leyi va nga wa hi nayo, va lo ya tshama le Gibea ga ka Benjamini, kanilezi a vaFilistia va wa govile le Mikmaxe.

¹⁷Ku lo huma vaphangi hi lomu wugovelweni ga vaFilistia, na va hi mitlawa minharu, a ku ya xakela tiko. A ntlawa wunwe wu lo famba hi ndlela ya kuya Ofra, hi tlhelo ga tiko ga Xuale;

¹⁸A wunwani ntlawa wu lo famba hi ndlela ya kuya le Bet-Horoni; a wa wunharu wu lo famba hi ndlela ya mbhingano yi nga hehla ka nzhelelo wa le Zeboime, hi tlhelo ga xiwula.

¹⁹Ku wa nga hi na nyunzo lomu tikweni gontlhe ga ka Israeli, hakuva a vaFilistia va wa ku ngalo: Ku fanele lezaku a vaHeberu va beletelwa ku fula tisupado ni matlhari.

²⁰Hi kota ya lezo vontlhe va ka Israeli, loyi ni loyi i woya ka vaFilistia ku ya vanzuta a bhera wakwe, ni xikomu xakwe, ni xihloka xakwe, ni mbatlo yakwe.

²¹Hilezo va wa hi ni zilotelo za timbatlo, a zikomu, mafoloko, ni zihloka.

²²Hi kota ya lezo a siku ga yimpi ku wa nga hi kona ni munwe a nga hi ni supado kutani tlhari canjeni gakwe, xikari ka vontlhe vanhu lava va nga wa hi na Saule na Jonatani. Hi Saule ni nʼwana wakwe Jonatani va nga wa hi ni matlhari mandleni yabye basi.

²³A wunwani ntlawa wa vaFilistia wu wa sukile wu ya tshama le ndleleni ya le Mikmaxe.