Read tshwa 1 Samueli 15 Bible Online

1 Samueli 15 - tshwa bible

1 Samueli 15

¹Samueli i te ngalo ka Saule: Jehova i nzi rumile ku ta tota wena a kuva hosi ya va ka Israeli; makunu ingisa a gezu ga Jehova:

²Jehova wa tiyimpi i ngalo: Nzi alakanyile lezi Amaleki a mahileko ka Israeli, lezaku i lo huma a ya vukela Israeli laha ndleleni xikhatini lexo va nga wata hi le Gipite. [30]

³Makunu lezi famba u ya hlasela vaAmaleki, u lovisa zontlhe lezo va nga nazo; u nga va nyenyeleteli, kanilezi daya vontlhe vavanuna ni vavasati, ni vananani tisana ta ha anwako, ni tihomu, ni tiyivu, ni makameli, ni timbongola.

⁴Zonake Saule i lo hlomisa a vanhu, a va hlaya le Telaime; a vavanuna lava va fambako hi mikonzo va wa hi 200,000 wa vona, a va ka Juda va wa hi 10,000 wa vavanuna.

⁵Saule i loya le mutini wa vaAmaleki a ya veka valaveleli le minzhelelweni.

⁶Saule i te ngalo ka vaKeni: Sukani, mu huma xikari ka vaAmaleki, nzi nga mu patsa navo nzi mu hlasela; hakuva nwina mu kombisile wunene ka vontlhe va ka Israeli xikhatini lexo va nga wata hi le Gipite. Zinghaho a vaKeni va lo huma xikari ka vaAmaleki.

⁷Zonake Saule i lo hlasela a vaAmaleki kusukela le Havila kala ku chikela le Xura, a tiko gi cuwukeneko ni Gipite.

⁸I lo khoma Agagi na ha hanya, a hosi ya vaAmaleki, kanilezi vontlhe vanhu i lo va lovisa hi wutlha ga supado.

⁹Kanilezi Saule ni vanhu vakwe va lo tsika Agagi ni wulangelwa ga tiyivu, ni ga tihomu ti nonileko, ni ga zifuyo zinwani, ni tiyivana, ni zontlhe zo saseka, a nga lavangi ku zi lovisa. Kanilezi zontlhe lezi zi nga nyawuliko va lo zi lovisa.

¹⁰Zonake Jehova i lo wulawula na Samueli, aku:

¹¹Nza ti laya hi lezi nzi nga yimisa Saule a kuva hosi, hakuva i hluwukile, a nga hlayisangi timhaka ta mina. Zonake Samueli i lo zangara, a rila ka Jehova gontlhe wusiku. [31]

¹²I lo vinzuka ni mixo a khinga Saule. Kanilezi ku lo tiviswa ka Samueli lezaku: Saule i yile le Karmeli a ya ti akela xialakanyiso, a hunzelele a relela aya Gilgali.

¹³Samueli i loya ka Saule; Saule aku kakwe: U katekisilwe wena hi Jehova! Nzi mahile zileletelo za Jehova.

¹⁴Kanilezi Samueli i te ngalo kakwe: Gi wula yini a guwa lego ga tiyivu gi kulumelako tindleveni ta mina, ni kubhoma ka tihomu loko nzi ku zwako?

¹⁵Saule i te ngalo: Va zi tekile ka vaAmaleki va zi neha seno, hakuva a vanhu va lo tsika a tiyivu ni tihomu leti to saseka, kasi ku ta maha ha tona muphahlelo wa Jehova Nungungulu wa wena, kanilezi zontlhe zinwani hi zi lovisile.

¹⁶Samueli aku ka Saule: Rinzela nzi ku byela lezi Jehova a nga nzi byela matolo. Saule aku kakwe: Wulawula!

¹⁷Samueli aku: Hambu lezi wena u nga wa hi tsongwani kuwoneni ka wena nwinyi, wena u yimisilwe a kuva hosi hehla ka tixaka ta ka Israeli. Jehova i ku totile hi mafura a ku maha hosi ya ka Israeli.

¹⁸Jehova i ku rumile ku ngalo: Famba u ya lovisa vaonhi va ka Amaleki, u va hlasela kala va mbhela vontlhe.

¹⁹Hi kuyini u nga kala ku ingisa a gezu ga Jehova? Hi kuyini u tsutsumela muphango, u maha kubiha mahlweni ka Jehova?

²⁰Saule i te ngalo ka Samueli: Mina nzi ingisile gezu ga Jehova, nzi fambile hi ndlela leyi Jehova a nzi rumileko yona, nzi nehile Agagi a hosi ya vaAmaleki; kanilezi zontlhe za vaAmaleki nzi zi lovisile.

²¹Kanilezi hi tlhelo ga lezi zi phangilweko, a vanhu va tekile tiyivu ni tihomu, a wulangelwa ga lezi ku phahlelwako ha zona, kasi ku ta nyikela ka Jehova Nungungulu wa wena leno Gilgali.

²²Samueli a ku ngalo: Xana Jehova wa tsakiswa hi minyikelo ya kuhiswa ni miphahlelo, ku hunza ku ingisa gezu gakwe ke? Zwisisa! a kuingisa ku chukwana ku hunza miphahlelo, ni ku hlayisa gezu ga Jehova ku hunza mafura ya tiyivu. [32]

²³Hakuva a kuhluwuka ku fanana ni wutumbe, ni xikanikani xi fanana ni ku khozela xifananiso ni terafime. Makunu kota lezi u alileko a gezu ga Jehova, yenawu i ku alile; u nga ha ta kuva hosi kambe.

²⁴Zonake Saule aku ka Samueli: Nzi onhile, hakuva nzi hambunyetile zileletelo za Jehova ni magezu ya wena, hi kota ya lezi nzi nga chava vanhu nzi ingisa timhaka tabye.

²⁵Hikwalaho nza ku khongotela lezaku u nzi tsetselela xionho xa mina hi famba hontlhe nzi ya khizama mahlweni ka Jehova.

²⁶Samueli i te ngalo kakwe: A nzi na ku famba na wena, hakuva u hoxile a gezu ga Jehova, yenawu Jehova i ku hoxile, kasi u nga ha mahi hosi ya va ka Israeli.

²⁷Makunu, khwatsi hi lezi Samueli a nga wa hunzuluka a kuva a famba, Saule i lo mu khoma hi nguwo yakwe, yi si hanzuka.

²⁸Samueli i te ngalo kakwe: Inyamutlha Jehova i hanzule a mufumo wa ka Israeli hehla ka wena, a wu nyikela ka muakelane wa wena, loyi a nga chukwana ku hunza wena.

²⁹Loyi a nga Ntamu wa va ka Israeli a nga hembi hambu ku hunzuluka, hakuva yena a hi munhu waku i ta hunzuluka.

³⁰Saule aku: Mina nzi onhile! Kanilezi nzi dzunze makunu mahlweni ka masingalakati ya vanhu va mina, ni mahlweni ka va ka Israeli, u tlhela na mina, kasi nza fela ku ya khizama mahlweni ka Jehova Nungungulu wa wena!

³¹Zonake Samueli i lo tlhela a lanza Saule, na Saule i lo ya khizama mahlweni ka Jehova.

³²Kanilezi Samueli i te ngalo: Nehani Agagi a hosi ya vaAmaleki laha ka mina! Agagi i loya kakwe na a tangele, hakuva Agagi i waku mbilwini yakwe: Hakunene a kubayiseka ka kufa ku hunzile.

³³Samueli i te ngalo kakwe: Khwatsi hi lezi u nga dayetela zivanana za vavasati, zinghaho ni mamani wa wena ngha a nga hi na nʼwana. Zonake Samueli i lo phaphulela Agagi mahlweni ka Jehova le Gilgali.

³⁴Zonake Samueli i lo tlhela aya le Rama. Yenawu Saule i lo tlhela aya kaya kakwe le Gibea wa Saule.

³⁵Samueli a nga ha engetangi kambe a wonana na Saule kala siku ga kufa kakwe, hakuva Samueli i lo rilela Saule, hakuva Jehova i wa ti laya hi lezi a nga yimisa Saule a kuva hosi ya ka Israeli.