Read tshwa 1 Samueli 16 Bible Online

1 Samueli 16 - tshwa bible

1 Samueli 16

¹Jehova i te ngalo ka Samueli: Kala rini na wa ha rilela Saule, laha u zi wonako lezaku mina nzi mu alele kuva hosi ya ka Israeli? Tata xikudzana xa wena hi mafura uta, nzi ta ku ruma ka Jese wa le Betlehema, i kona nzi mu wonileko xikari ka vanana va Jese, loyi a faneleko ku maha hosi. [33]

²Samueli aku: Nzi ta fambisa kuyini? Hakuva loku Saule a zizwa, i ta nzi daya. Jehova aku kakwe: U ta teka a thokazi u famba nago, u yaku: Nzi tela ku ta nyikela muphahlelo ka Jehova.

³Kwalaho ka muphahlelo lowo u ta vitana Jese, zonake mina nzi ta ku kombisa lezi u ta nga maha; loye nzi ta nga ku komba yena, u ta mu tota ave wa mina.

⁴Samueli i lo maha khwatsi hi lezi Jehova a wulileko kakwe. I loya Betlehema. A masingalakati ya muti ma lo mu khinga na ma rurumela na vaku: Ina lezi uta hi kurula?

⁵Yena aku kabye: Nzita hi kurula; nzi tela ku ta phahlela ka Jehova. Ti basiseni mu ta famba na mina le muphahlweni. Zonake i lo basisa Jese ni vana vakwe, a va vitana vata muphahlweni. [34]

⁶Makunu laha va nga wa enghenile, i lo wona Eliabe, aku; Hakunene a totilweko wa Jehova hi yena loyi a nga mahlweni ka yena.

⁷Kanilezi Jehova i te ngalo ka Samueli: U nga cuwuki nghohe yakwe hambu ni xiyimo xakwe, hakuva mina a nzi mu lavi. Jehova a nga cuwuki lezi a vanhu va zi cuwukako; hakuva a vanhu va cuwuka a nghohe, kasike Jehova i cuwuka mbilu. [35]

⁸Zonake Jese i lo vitana Abinadaba, a mu neha mahlweni ka Samueli, yena i te ngalo: Yenawu loyi, Jehova a nga mu hlawulangi.

⁹Jese i lo neha Xama, kanilezi Samueli aku: Yenawu loyi, Jehova a nga mu hlawulangi.

¹⁰Jese i lo neha vafana vakwe va ntlhanu ni vambiri mahlweni ka Samueli, kanilezi Samueli i te ngalo ka Jese: Jehova a nga va hlawulangi lava.

¹¹Samueli i te ngalo ka Jese: Xana hi vona vontlhe vafana va wena lava ke? Yena aku ku sele nzisana yabye loyi a risako timbuti. Samueli aku: Ruma munhu a ya mu vitana, hakuva hi nga ta tshama mezeni kala yena ata laha.

¹²Zonake Jese i lo ruma vanhu ku ya mu vitana. I wa hi pswhungana, na hi ni mahlo yo saseka, ni nghohe ya wumbhuri. Jehova aku Samueli: Suka u mu tota hi mafura, hakuva hi yena loyi!

¹³Zonake Samueli i lo teka a xikudzana xa mafura a mu tota laha xikari ka vanakulobye. A Moya wa Jehova wu lota ka Davida kusukela lego siku ku komama mahlweni. Zinghaho Samueli i lo suka a famba le Rama. Davida a yimbelela mahlweni ka Saule.

¹⁴A Moya wa Jehova wu lo huma ka Saule a sala a xaniswa hi moya wo biha wu tileko hi ka Jehova.

¹⁵A malanza ya Saule ma te ngalo kakwe: Loku a moya wa kubiha wu tako hi ka Nungungulu wu ku xanisa,

¹⁶ngha a hosi ya hina yi ruma malanza ya wena ma nga mahlweni ka wena, ma ya lava munhu loyi a nga xihi xa xitende, kasi loku a moya lowu wo biha wu tako hi ka Nungungulu wuta hehla ka wena, yena i taba hi canja gakwe, zonake u rula.

¹⁷Saule aku ka malanza yakwe: Nzi lavelenike a munhu loye a nga xibi xa xitende mu mu neha ka mina.

¹⁸A munwe wa malanza yakwe i lo hlamula, aku: Mina nzi wonile a munwe wa vanana va Jese wa le Betlehema, loyi a nga mubi wa xitende, a wanuna wa nhenha, loyi a zi kotako ku khoma tlhari, a xitlhatlha kuwulawuleni, a munhu a sasekileko, loyi Jehova a nga na yena.

¹⁹Hikwalaho Saule i lo ruma mitsumi ka Jese, aku kakwe: Nzi rumele mufana wa wena Davida, loyi a risako timbuti!

²⁰Jese i lo teka a mbongola a yi rwexa zibaba ni nghotso ya vinya, ni ximhutana, a zi rumela ka Saule ha Davida nʼwana wakwe.

²¹Laha Davida a nga chikela ka Saule, i lo yima mahlweni kakwe. Saule i lo mu ranza nguvu; zinghaho Davida i lo maha muweleli wa matlhari yakwe.

²²Zonake Saule i lo rumela mhaka ka Jese; aku: Vumela Davida a tshama laha ka mina a nzi tirela, hakuva i kumile thomo mahlweni ka mina.

²³Ku waku loku a moya lowo wo biha, wu tako hi ka Nungungulu, wuta hehla ka Saule, Davida a teka xitende xakwe a yimbelela, zonake Saule a rula a tangala; a moya lowo wo biha wu huma ka yena.