Read tshwa 1 Samueli 17 Bible Online

1 Samueli 17 - tshwa bible

1 Samueli 17

¹Makunu a vaFilistia va lo tsombanyisa mabutho yabye a kuva valwa. Va lo tsombana le Soko, gi nga hi tiko ga ka Juda; va lo ya gova xikari ka Soko na Azeka, ku nga le Efes-Damime.

²Saule ni vavanuna va ka Israeli vonawu va lo tsombana, va ya gova le minzhelelweni ya mikanyi, va hlomisa yimpi, va ya cuwukana ni vaFilistia.

³A vaFilistia vona va wa hi le xitsungeni, hi tlhelo ginwani, laha xikari kabye na ku hi ni nzhelelo.

⁴Makunu le wugovelweni ga vaFilistia ku lo huma wanuna wa nghwazi a vitwako Goliate, wa le Gati; a kuleha kakwe ku wa hi ntlhanu wa mikono ni munwe ni canja ginwe.

⁵A hlokweni yakwe i wa ambele xihuku xa suku, na wa ambele a bhaji ga xiketse, legi a kubinza ka gona ku nga hi 5,000 wa maxekeli ya suku.

⁶I wa hi ni makawuzi ya suku lomu milengeni yakwe, ni tlhari ga suku makatleni yakwe.

⁷A mbingo wa hubhula gakwe wu wa fanana ni nzambyanana wa valuki va tinguwo, ni xiketse xa hubhula gakwe xi wa binza ku ringana ni 600 wa maxekeli; a muweleli wa xitlhangu xakwe i wa ranga mahlweni.

⁸I lo yima a huwelela ka tiyimpi ta ka Israeli, aku: Mu hlomele yini yimpi ke? Mina a nzi muFilistia ke? Kasi nwina a mu malanza ya Saule ke? Hlawulani xikari ka nwina a wanuna a faneleko ku talwa na mina.

⁹Loku yena a nzi hlula, a nzi daya, zonake hi ta fumelwa hi nwina. Kanilezi loku mina nzi mu hlula, nzi mu daya, nwina mu ta fumelwa hi hina mu hi khozela.

¹⁰A muFilistia aku ngalo: Inyamutlha mina nza kanyisa a yimpi ya ka Israeli! Nzi nyikeni a nhenha nzi talwa nayo laha!

¹¹Laha Saule ni vontlhe vaIsraeli va ngazwa magezu ya muFilistia, va lo mbhela ntamu, va chava nguvu.

¹²Makunu Davida i wa hi mufana wa muEfrate wa le Betlehema wa ka Juda, loyi a vito gakwe a nga hi Jese, a munhu loyi a nga hi ni ntlhanu wa vafana ni vanharu, kanilezi xikhatini xa Saule yena i wa khosahele nguvu.

¹³A vafana vakwe va vanharu va tinhonzwa va wa lanzile Saule le yimpini; a vafana vakwe va nga hlomile vaya yimpini ku wa hi Eliabe, a matewula yakwe, ni wa wumbiri ku wa hi Abinadaba, ni wa wunharu hi Xama.

¹⁴Davida i wa hi nzisana ya vontlhe; makunu laha a tinhonzwa takwe ta tinharu ti nga wa lanzile Saule,

¹⁵Davida i lo suka ka Saule, aya kaya a ya risa tiyivu ta raru wakwe le Betlehema.

¹⁶A muFilistia i wata laha kusuhani mixo ni gambo, a maha lezo 40 wa masiku.

¹⁷Jese i te ngalo ka Davida nʼwana wakwe: Teka a efa leyi ya mavele ma katingilweko, ni zibaba lezi za khume za sevada, u heleketa ka vanakuloni le wugovelweni hi kuhatlisa.

¹⁸U ta ya nyikela ni zikhekhetselo lezi za khume za masi ka nduna yabye ya hombe; u ta ya tiva ni kuhanya ka vanakuloni, u fela ku wuya u ta nzi byela zinene.

¹⁹Makunu Saule, na vona, ni vontlhe va ka Israeli, va le nzhelelweni wa nkanyi wa le Ela, na va kari valwa ni vaFilistia.

²⁰Zonake Davida i lo vuka ni mixo, a siya tlhambi wakwe ni munwani murisi, a teka nzhwalo wakwe a famba, khwatsi hi lezi Jese a nga mu leletele. A xikhati a nga chikela laha wutshanwini ga tikareta a yimpi yi wa kari yi huma yiya kulweni, na yi yimbelela a muhuvo wa yimpi.

²¹Zalezo va ka Israeli ni vaFilistia va lo huma va vitana tiyimpi tabye ti longa matlhari ya tona, va yima va cuwukana.

²²Davida i lo nyikela nzhwalo wakwe ka muhlayisi wa zibya, a tsutsumela yimpini. I lo chikela a wutisa kuhanya ka vanakulobye.

²³Na a ha wulawula navo, a nhenha leyi va nge hi Goliate wa le Gati, yi lota hi le wugovelweni ga vaFilistia, yiya le mahlweni yi ya wulawula timhaka leti yi tshamako yi ti wula manwani niasiku. Davida i lo yizwa.

²⁴Vontlhe va ka Israeli, laha va nga wona wanuna loye, va su ncu hi kuchava.

²⁵Zonake a vavanuna va ka Israeli va te ngalo: Ma mu wona a wanuna loyi a rangelwako mahlweni ke? I tela ku ta kanyisa Israeli. Loyi a ta nga mu daya a hosi yi ta mu nyika a tshomba ya hombe nguvu, a mu nyika ni nhwana wakwe kambe, ni ku maha a yindlu ya raru wakwe yi tlhatlheka lomu ka Israeli.

²⁶Davida aku ka vavanuna lava va nga yimile laha kusuhani kakwe: Ve ngalo ku ta mahiwa yini ka munhu loye a ta nga daya a muFilistia loyi, a susa a nzhukano ka Israeli ke? Na ova mani a khuna legi ga muFilistia go kala gi tlangamela a mabutho ya Nungungulu a hanyako ke?

²⁷A vanhu va lo hlamula, va mu hlawutela, vaku: Hi lezi ni lezi zi ta nga mahiwa ka munhu loye a ta nga mu daya.

²⁸Kanilezi a nhonzwa yabye Eliabe a nga mu zwile na wulawula ni vanhu, i lo zangarela nguvu Davida, aku kakwe: U tele yini seno? Himani u nga mu siya ni tiyivana leti ti nga le xiwuleni? Nza ma tiva mahatsahatsa ni matshanza ya wena. Hi zona zi ku mahileko uta ku ta wona yimpi.

²⁹Davida i lo hlamula, aku: Makunu nzi lo maha yini? A nanzu hi wihi loku nzi wula lezo?

³⁰Zonake i lo mu fularela aya tlhelweni a ya wulawula ni munwani a mu wutisisa hi timhaka leto. A vanhu va lo mu hlamula khwatsi hi kusanguleni.

³¹A timhaka leti ti nga wulawula hi Davida ti wa ingisilwe; va lo ya ti hlawutela ka Saule; Saule a mu vitana.

³²Davida i te ngalo ka Saule: Ngha mbilu ya munhu ni munhu yi nga mbheli ntamu hi kota ya yena! A nanza ga wena gi ta famba gi yalwa ni muFilistia loye.

³³Kanilezi Saule i te ngalo ka Davida: Wena a ku zi koti ku yalwa ni muFilistia loye, hakuva u tsongwani, kanilezi yena mulwi wa tiyimpi kusukela wunwananeni gakwe.

³⁴Davida aku ka Saule: A nanza ga wena gi wa risa a zifuyo za raru wa yena, laha ku ngata nghala, ni urso kasi ku ta khoma a yivu ya laha tlhambini;

³⁵mina nzi lo yi tsutsumisa, nzi yi hlahlanha, nzi namuruta xifuyo lomu nonwini wa yona. Makunu laha yi nga nzi vukela, nzi la su yi khoma hi tihlaya nzi yi khehesela, nzi yi daya.

³⁶Hikwalaho a nanza ga wena gi dele a nghala ni urso, zonake loyi muFilistia wa khuna i ta kotisa xinwe xa zona, hakuva yena wa tlangamela tiyimpi ta Nungungulu a hanyako.

³⁷Davida a engeta aku: Jehova loyi a nga nzi ponisa canjeni ga nghala ni ga urso, hi yaloye a ta nga nzi ponisa canjeni ga loyi muFilistia. Zonake Saule i te ngalo ka Davida: Famba, Jehova ave na wena!

³⁸Saule i lo ambexa Davida a tinguwo takwe, a mu tlhateka xihuku xa suku hlokweni yakwe, a mu ambexa ni bhaji ga xiketse.

³⁹Davida i lo boha supado ya Saule hehla ka tinguwo takwe, a ringisa ku famba, hakuva ti wa nga mu ringani. I te ngalo ka Saule: A nzi zi koti ku famba ni lezi, hakuva a zi nzi ringani.

⁴⁰Davida i lo zi susa, a teka a nhonga yakwe, aya le xicongwaneni a ya hlawula ntlhanu wa maribye ya timbokota, a ma veka lomu kwameni wakwe lowu a fambako nawo lomu kuriseni, zonake i lo tshinela ka muFilistia na hi ni lingoti la wundandi li vitwako ku i fixga.

⁴¹A muFilistia i lo suka aya kusuhani ka Davida, a muweleli wa matlhari yakwe na rangile mahlweni kakwe.

⁴²Makunu laha a muFilistia a nga wona Davida, i lo mu kanyisa hakuva i wa hi tsongwani, na a hi pswhungana wa nghohe yo saseka.

⁴³A muFilistia i te ngalo ka Davida: Nza kuva mbyana, lezi u nzi telako ni tinhonga ke? Zinghaho a muFilistia i lo rukatela Davida hi vanungungulu vakwe.

⁴⁴A muFilistia i te ngalo ka Davida: Hi ngata! Nzi ta nyikela a nyama ya wena ka tinyanyani ta tilo ni zivanza za khwati.

⁴⁵Davida aku ka muFilistia: Wena uta ka mina ni supado, ni tlhari, ni hubhula, kanilezi mina nzita ka wena hi vito ga Jehova wa tiyimpi, ni ga Nungungulu wa tiyimpi ta ka Israeli leti wena u ti tlangamelako:

⁴⁶Inyamutlha Jehova i ta ku nyikela canjeni ga mina. Nzi ta ku tlhava nzi tsema hloko ya wena. Inyamutlha nzi ta nyikela a zirumbi za tiyimpi ta vaFilistia ka tinyanyani ta tilo ni ka zivanza za misava, kasi a misava yontlhe yi ta zi tiva lezaku i kona Nungungulu wa ka Israeli.

⁴⁷Wontihe hlengeletano lowu wu ta zi tiva lezaku Jehova wa ponisa, kanilezi na ku nga hi supado ni tlhari, hakuva a kulwa ni kuhlula za Jehova; makunu i mu nyikele nwina mandleni ya hina.

⁴⁸Zonake a muFilistia i lo suka aya ka Davida, kanilezi Davida i lo hatlisa a tsutsumela ku yalwa, a khinga muFilistia.

⁴⁹Davida i lo enghenisa a canja gakwe lomu kwameni wakwe a teka ribye, a gi hoxa hi lingoti la wundandi, gi tlhotlhora muFilistia laha ximombyeni, gi nyupela lomu ximombyeni xakwe, awa lahasi mahlweni kakwe.

⁵⁰Zinghaho Davida i lo hlula a muFilistia hi lingoti la wundandi ni ribye, a mu daya. Kanilezi Davida i wa nga hi na supado.

⁵¹Zonake Davida i loya ka muFilistia a ya teka supado yakwe, a yi hlomula kocelweni wa yona, a mu daya, a tsema hloko yakwe ha yona. Laha a vaFilistia va nga wona lezaku a nghwazi yabye yi file, va lo panzanyeka.

⁵²A va ka Israeli ni va ka Juda va lo Suka va hlalela, va hlongolisa vaFilistia kala va ya chikela masangulweni ya nzhelelo ni le tinyangweni ta Ekroni; ni tikhuveri ta vaFilistia ti wa la su mbambamela lomu ndleleni ya kuya Xaaraime, kala le Gati ni ku hunzeleta kala le Ekroni.

⁵³Zonake a vavanuna va ka Israeli va lo tlhela hi le ko hlongolisa vaFilistia va ta phanga a wugovelo gabye.

⁵⁴Davida i lo teka a hloko ya muFilistia a yi heleketa Jerusalema; kanilezi a matlhari yakwe i lo ma veka lomu tendeni gakwe.

⁵⁵Makunu a xikhati Saule a nga wona Davida na ya vukela vaFilistia, i te ngalo ka Abneri a nduna ya yimpi: Abneri, a mufana loyi i nʼwana mani? Abneri i lo hlamula, aku: Khwatsi hi lezi a muhefemulo wa wena wu hanyako, O hosi, a nzi mu tivi.

⁵⁶Zonake a hosi yi te ngalo: Wutisa-ke lezaku mufana loyi i nʼwana mani.

⁵⁷Makunu laha Davida a nga ha wuya hi le ko ya hlasela vaFilistia, Abneri i lo mu teka a mu heleketa mahlweni ka Saule, na a ha hi ni hloko ya muFilistia canjeni gakwe.

⁵⁸Saule i te ngalo kakwe: Jaha nziwena, u nʼwana mani? Davida aku: Nzi nʼwana wa nanza ga wena Jese wa le Betlehema.