Read tshwa 1 Samueli 20 Bible Online

1 Samueli 20 - tshwa bible

1 Samueli 20

¹Davida i lo tsutsuma le Naiote wa Rama aya ka Jonatani a ya ku kakwe: Xini nzi mahileko? I nanzu muni nzi nga nawo, na xi hi xionho muni nzi onheleko raru wa wena lezi a hlotako wutomi ga mina?

²Jonatani aku kakwe: Za hava lezo! Cima u nga tafa! Dadani a nga na ku maha nchumu xa hombe, hambu xi tsongwani, na a nga nzi tivisangi. Xana dadani i ta nzi fihlela mhaka leyo ke? A hi zona!

³Zonake Davida i lo hlambanya aku: A raru wa wena wa zi tiva lezaku mina nzi kumile thomo mahlweni ka wena, zonake i taku: Jonatani ngha a nga tivi a mhaka leyi, yi nga mu tsanwisa! Kanilezi nzi hlambanya ha Jehova a hanyako, ni muhefemulo wa wena wu hanyako; ko sala xipimo xa zambo ginwe basi a kuva nzi chikela kufeni.

⁴Jonatani aku ka Davida: Kani hi zihi lezi a mbilu ya wena yi zi lavako, nzi ta tserama nzi ku mahela.

⁵Davida i te ngalo ka Jonatani: Manziko i hweti yiswa, nzi wa yimelwe hi ku tshama kugeni zinwe ni hosi; kanilezi nzi ta ya fihlala le masinwini kala ku chikela a siku ga wunharu laha gambyeni.

⁶Kasi loku a raru wa wena a wutisa hi kuvumaleka ka mina, u ta mu byela uku: Davida i nzi kombele lezaku a vumelwa ku tsutsuma aya le Betlehema le mutini wabye, hakuva leyo ku na ni muphahlo wa lembe ni lembe wa vontlhe vanhu va yindlu yabye.

⁷Zonake loku yena aku: Matsenya! a nanza ga wena gi tava ni kurula. Kanilezi loku a zangara, u ta zi tiva lezaku i na ni xikungo xo biha.

⁸U ta zwela wuxinji a nanza ga wena, kota lezi u mahileko a xivumelwano zinwe nago a vitweni ga Jehova, kasi loku ku hi kona a nanzu wo kari ka mina, nzi daye wena wutsumbu; hi kuyini u lava ku nzi heleketa ka raru wa wena?

⁹Jonatani aku kakwe: U nga wulisi lezo! Ina loku nzi wa zi tiva zinene lezaku dadani i xuva ku ku lovisa, nzi wa ta kala ku ku byela ke?

¹⁰Davida aku ka Jonatani: Himani a to ta nzi byela timhaka leto loku a raru wa wena a hlamula hi lunya?

¹¹Jonatani aku: Ngone hi famba le masinwini! Zonake va lo famba handle hi wumbiri gabye.

¹²Jonatani aku ka Davida: Jehova Nungungulu wa ka Israeli i kustumunyu! Loku mina nzi hlolisisile ka dadani, manziko kutani mondlwani hi xwalexi xikhati, loku ma hi mahungu yo saseka xungetano na Davida, nzi nga ta ku rumela gezu go ta ku tivisa;

¹³Jehova a mahe hi ntamu ka Jonatani, ni ku engeta kambe! Ni kambe loku dadani a xuva ku maha kubiha ha wena, nzi ta ku tivisa nzi ku byela lezaku u tsutsuma, u famba hi kurula. Jehova a ave zinwe na wena khwatsi hi lezi a nga hi zinwe na dadani.

¹⁴Loku mina nzi simama nzi hanya, u ta nzi hlayisa hi wuxinji ga ka Jehova, kasi nzi fela ku kala nzi ngafi.

¹⁵Ni kambe u nga kaketi a wunene ga wena lomu ndlwini ya mina kala kupinzuka, hambu laha Jehova a ta nga tsema vontlhe valala va Davida laha misaveni!

¹⁶Zinghaho Jonatani i lo maha xivumelwano zinwe ni yindlu ya Davida, aku: Jehova a ti photele ka valala va Davida!

¹⁷Jonatani i lo hlambanyisa Davida hi liranzo leli a nga wa mu ranza ha lona, hakuva i wa mu ranza ku khwatsi hi wutsumbu gakwe.

¹⁸Jonatani aku: Manziko i hweti yiswa, ku ta woneka lezaku u hava, hakuva u ta vumaleka xitshanwini xa wena.

¹⁹Wena u ta ya tshama masiku manharu, zonake u ta hatlisa u relela wutshanwini legi u nga fihlala ka gona lego siku ga timhaka, u tshama hi laha kusuhani ni ribye ga Ezeli.

²⁰Mina nzi ta phanda mipaxa minharu hi tlhelo ga kona, nzi phanda nzi pima khwatsanyana.

²¹Zonake nzi ta ruma mufana nziku kakwe: Famba u ya lava mipaxa. Kasi loku nziku ka mufana: A mipaxa yi seyo tlhelweni ga wena, teka uta nayo laha! zonake u ta wuya, hakuva zontlhe zi lulamile, a ku na nchumu xo ku chavisa; Jehova wa hanya.

²²Kanilezi loku nziku ka mufana: A mipaxa yi le mahlweni ka wena! zonake u ta famba, hakuva Jehova i lava lezaku u tsutsuma.

²³Kanilezi Jehova i kustumunyu kala kupinzuka ka mhaka leyi hi wulawulileko mina na wena.

²⁴Zonake Davida i lo fihlala lomu masinwini. Loku ku woneka a hweti yiswa, a hosi yi lo tshama laha mezeni a kuga zakuga.

²⁵A hosi yi lo tshama hi ka xitshamu lexi yi tolobeleko ku tshama ka xona laha khurisini; Jonatani i wa yimile, na Abneri a tshamile hi laha reveni ga Saule. Kanilezi a xitshamu xa Davida xi wa nga hi na munhu.

²⁶Saule a nga wulangi nchumu lego siku hakuva i waku: Ku lo humelela a xilo ka yena xa ku mu maha a nga hlazeki; hakunene a nga hlazekangi. [38]

²⁷Zonake hi siku gi gamelako, gi nga siku ga wumbiri ga hweti yiswa, a xitshamu xa Davida kambe xi wa nga hi na munhu; Saule aku ka nʼwana wakwe Jonatani: Hi kuyini a nʼwana wa Jese a nga tangi kugeni a tolo ni nyamutlha?

²⁸Jonatani i lo hlamula, aku ka Saule: Davida i lo nzi kombela a kuva a vumelwa a kuya le Betlehema.

²⁹1 te ngalo: Nzi vumele nzi famba, hakuva ku na ni muphahlo wa laha ngangweni wa hina le mutini, hilezi a nakulori i nzi leletele a kuva nziya leyo: makunu loku mina nzi kumile thomo mahlweni ka wena, nzi ta tsutsuma nziya kona nzi ta ya wonana ni vanakulori. Hikwalaho yena a nga tangi laha mezeni ya hosi.

³⁰Zonake Saule i lo zangarela Jonatani, aku kakwe: Wena nʼwana wa wasati wo biha a hluwukileko, nzo kala nzi nga zi tivi mina lezaku ma zwanana ni nʼwana Jese, a kuva tingana ta wena ni tingana ta wumbyiri ga nyine wa wena ke?

³¹Hakuva a ka masiku lawa a nʼwana Jese a ta nga simamisa a hanya laha misaveni, wena cima u nga ta gi kuma wukosi, hambu lezi a mufumo wu nga wa wena. Makunu ruma vanhu lokuloku va ya mu khoma va mu neha laha ka mina, hakuva yena i fanele kufa.

³²Jonatani i lo hlamula raru wakwe Saule, aku: I ta dawa hi kota ya yini? Xini a mahileko ke?

³³Saule i lo xiririta a tlhari gakwe, a lava ku mu gwaza ha gona; hilezo Jonatani i lo zi tiva lezaku hakunene a mhaka yi tiyile ka raru wakwe lezaku i ta daya Davida.

³⁴Zinghaho Jonatani i lo suka laha mezeni na a zangarile nguvu, a ngagi ni zakuga lego siku ga wumbiri ga hweti yiswa, hakuva i wazwa kubayiseka hi kota ya Davida, hakuva a raru wakwe i wa mu xanzile nguvu.

³⁵Zonake ni mixo, Jonatani i lo huma aya masinwini laha a nga vumelene kona na Davida; i lo famba ni mufanyana.

³⁶I te ngalo ka mufanyana: Tsutsuma u ya lava mipaxa leyi nzi nga phanda. Laha a mufana a nga tsutsuma, i lo phanda wunwani wuya le mahlweni kakwe.

³⁷A mufana i lo ya chikela laha ka paxa lowu Jonatani a nga wu phandile, zonake Jonatani i lo vitana mufana aku kakwe: Kasi a paxa a wu le mahlweni ka wena ke?

³⁸Jonatani i lo vitana a mufana aku kakwe: Tsutsuma u nga yimi! A mufana i lo rolela a mipaxa ata nayo ka nwinyi wakwe.

³⁹Kanilezi a mufana i wa nga tivi nchumu; saseka Jonatani na Davida basi hi vona va nga wa tiva timhaka ta kona.

⁴⁰Zonake Jonatani i lo nyikela matlhari yakwe loyi a nga hi naye, aku kakwe: Famba nawo kaya!

⁴¹Makunu laha mufana a nga wa sukile, Davida i lo suka a yima a languta le Dzongeni, a ti wisa lahasi hi nghohe yakwe, a khizama kanharu. Zonake va lo pswopswana, va rila vontlhe. Davida i lo rila ku hunza mpimo.

⁴²Zonake i te ngalo ka Davida: Famba hi kurula, a zi maheke lezi hi nga hlambanyelana hi vito ga Jehova, hiku: Jehova a ave xikari ka mina na wena, ni xikari ka pswalo wa mina ni wa wena kala kupinzuka!

⁴³Zonake Davida i lo suka a famba, yenawu Jonatani a tlhela a enghena lomu mutini.