Read tshwa 1 Samueli 22 Bible Online

1 Samueli 22 - tshwa bible

1 Samueli 22

¹Davida i lo suka laho a chavela rinzini ga le Adulama. Laha a vanakulobye ni yindlu yontlhe ya raru wakwe va nga wa zi zwile, va lo relela vaya kakwe.

²Zonake ku lo tsombana ka yena vontlhe vanhu lava Va nga wa hlokiswa, ni vontlhe lava va nga wa hi ni milanzu, ni vontlhe lava va nga kala ku tshameka, va lo tsombana kakwe, yena a maha murangeli wabye. A vanhu lava va nga hi zinwe naye ko khwatsi va wa hi 400 wa vavanuna.

³Davida i lo suka laho aya le Mizpa wa le Moabi; i te ngalo ka hosi ya Moabi: Nza ku kombela lezaku a raru wa mina ni mamani wa mina va tshama ka wena, kala nzi tiva lezi Nungungulu a ta nga maha ha mina.

⁴Zonake i lo va neha mahlweni ka hosi ya le Moabi; va lo tshama ka yena wontihe masiku lawa Davida a nga wa tshama lomu makhokholeni.

⁵Muprofeti Gadi i te ngalo ka Davida: U nga tshami lomu makhokholeni; suka uya le tikweni ga ka Juda. Zonake Davida i lo suka aya le khwatini ga le Herete.

⁶Makunu Saule i lozwa lezaku a vanhu va tiva a timhaka ta Davida ni ta vanhu lava va nga zinwe naye. Saule i wa tshamile le Gibea, lahasi ka sinya, wutshanwini gi tlakukileko, na hi ni tlhari canjeni gakwe, a malanza yakwe wontihe na ma yimile ma mu ranzela.

⁷Saule i te ngalo ka malanza yakwe lawa ma mu ranzelako: Zwanani nwina va ka Benjamini! Ina nʼwana Jese i ta mu nyika nwina nwentlhe a masimu ni zivina ke? Ina, i ta mu yimisa nwentlhe mu maha tinduna ta hombe ni ta ti tsongwani ke?

⁸Lezi mu hlengelako ku nzi vukela, hakuva ku hava ni munhu a nga nzi byela lezaku a nʼwana wa mina i mahile xivumelwano ni nʼwana wa Jese, ni kambe ku hava ni munwe wa nwina wa ku nzi khatalela, a nzi byela lezaku a nʼwana wa mina i hlohlotela a nanza ga mina a ku nzi vukela ni ku nzi xiyelela khwatsi hi nyamutlha!

⁹Zonake ku lo hlamula Doegi a muEdomi, loyi a nga yimile zinwe ni malanza ya Saule, aku: Nzi wonile nʼwana Jese ata le Nobe ka Ahimeleki nʼwana Ahituba.

¹⁰Ahimeleki i mu wutisele ka Jehova, ni ku mu nyika timbuva, ni kambe i mu nyikile a supado ya Goliate a muFilistia.

¹¹Zonake a hosi yi lo vitanisa Ahimeleki nʼwana Ahituba, a mupristi, ni vontlhe va yindlu ya raru wakwe, va nga vona vapristi lava va nga wa hi le Nobe; vontlhe va lota hosini.

¹²Saule i te ngalo kakwe: Makunu ingisa wena nʼwana Ahituba! Yena i lo hlamula, aku: Nza ingisa, hosi yanga!

¹³Saule aku kakwe: Hi kuyini mu nzi hleva, wena ni nʼwana Jese, ko kala u mu nyika zibaba ni supado, ni ku mu wutisela ka Jehova, kasi a fela ku nzi vukela a nzi xiyelela lomu tindleleni, kota lezi a mahako nyamutlha ke?

¹⁴Ahimeleki a hlamula, aku kakwe: Himani xikari ka wontihe malanza ya wena a tsumbekileko kota Davida mwane wa hosi, yi nga yona a nduna leyi yi ku ingisako lomu makungweni ya wena, ni loyi a dzunzekileko lomu ndlwini ya wena ke?

¹⁵Hi kona nyamutlha nzi sangulako ku mu wutisela ka Nungungulu ke? A mhaka leyo a yi ve kule na mina! A hosi ngha yi nga veki nanzu ka nanza ga yena, hambu ni ka munwe wa yindlu ya dadani wa mina; hakuva lomu xikari ka tontlhe timhaka leti, a nanza ga wena a gi tivangi hambu ni mhaka yinwe.

¹⁶A hosi yiku kakwe: Hakunene wena Ahimeleki u tafa zinwe ni yontlhe yindlu ya raru wa wena.

¹⁷A hosi yi te ka masochwa lawa ma yi yimeletelako: Hunzulukani mu daya vapristi va Jehova, hakuva vonawu va zwanana na Davida; va zi tivile khwatsi lezaku i lo tsutsuma, kanilezi a va nzi tivisangi nchumu. Kanilezi a masochwa yakwe ma lo ala ku daya vapristi va Jehova.

¹⁸A hosi yi te ngalo ka Doegi: Ngone laha u ta daya vapristi! Zonake Doegi a muEdomi i lo ta daya vapristi. Lego siku i lo daya 85 wa lava va ambeleko a efode ya wukene. [41]

¹⁹Saule i lo hlasela Nobe a muti wa vapristi hi wutlha ga supado, a daya vavanuna ni vavasati, ni vanana ni Zihlangana, ni tihomu, ni timbongola, ni tiyivu, a lovisa zontlhe hi wutlha ga supado.

²⁰Ku lo pona a munwe wa vana va Ahimeleki nʼwana Ahituba, a vito gakwe hi Abiatari; i lo tsutsumela ka Davida.

²¹Abiatari i lo byela Davida lezaku Saule i dele a vapristi va Jehova.

²²Davida i te ngalo ka Abiatari; Hakunene nzi zi tivile lego siku lezaku Doegi a muEdomi cima a nga ta tsika ku ya byela Saule, lezaku i nzi wonile. A nanzu wa lufo la yontlhe yindlu ya raru wa wena wu le hehla ka mina.

²³Tshama na mina, u nga chavi. Hakuva loyi a hlotako wutomi ga mina hi yaloye a hlotako ga wenawu; mina nzi ta ku hlayisa.