Read tshwa 1 Samueli 29 Bible Online

1 Samueli 29 - tshwa bible

1 Samueli 29

¹Makunu a vaFilistia va lo tsombanyisa a tiyimpi tabye tontlhe le Afeka; ni vaIsraeli va wa govile kusuhani ni hlowo leyi yi nga le Jezreeli.

²A tihosi ta vaFilistia ti lo hunza hi mabutho ya zanazana, ni mabutho ya 1,000 ka ginwe ni ginwani; Davida ni vanhu vakwe va lo hunza hi le nzhako na va hi na Akixi.

³Zonake a tihosi ta vaFilistia ti te ngalo: A vaHeberu lava mba yini? Akixi aku ka tihosi ta vaFilistia: A hi yena Davida loyi a nga wa hi nanza ga Saule a hosi ya ka Israeli, loyi a tshamileko na mina masiku lawa yo tala! A nzi kumangi a nanzu wa nchumu kakwe, kusukela siku lego a nga chikela ka mina kala nyamutlha lezi.

⁴Kanilezi a tihosi ta vaFilistia ti lo mu zangarela, tiku kakwe: Tlhelisa munhu loyi aya kakwe laha u mu akisileko kona. Cima a nga na kuya yimpini na hina, hakuva a nga dzuka a hunzuluka a maha nala wa hina le yimpini. Hakuva i ta kumisa kuyini malungelo ka hosi yakwe, loku ku nga hi tihloko ta vanhu ke?

⁵A hi yena Davida loyi va nga wa yimbelela ha yena lomu mihlahweni, vaku: Saule i dele 1,000, Kanilezi Davida i dele 10,000!

⁶Zonake Akixi i lo vitana Davida, aku kakwe: Nzi hlambanya ha Jehova a hanyako, lezaku wena u munhu a lulamileko. Nzi wa ta tsaka ku ku wona u huma ni ku enghena zinwe na mina lomu yimpini, hakuva cima a nzi kumangi kubiha ka wena kusukela siku lego u nga enghena ha gona mutini wa mina kala nyamutlha. Kanilezi a tihosi a ti tsaki ha wena,

⁷Hikwalaho tlhela u famba hi kurula, kasi u nga mahi xikhunguvanyiso mahlweni ka tihosi ta vaFilistia.

⁸Davida i te ngalo ka Akixi: Xini nzi mahileko? Xini u xi wonileko ka nanza ga wena, kusukela siku lego nzi nga chikela ha gona mahlweni ka wena, kala nyamutlha lezi, ko kala nzi valelwa ku yalwa ni valala va hosi ya mina?

⁹Akixi i lo hlamula aku: Mina nza zi tiva lezaku wena u lulamile mahlweni ka mina khwatsi hi ngelosi ya Nungungulu. Ntsena lezaku a tihosi ta vaFilistia ti ngalo: A nga zi koti ku kanziha na hina le yimpini.

¹⁰Hilezo u ta suka manziko ni mixo nguvu zinwe ni malanza ya hosi ya wena lawa u ngata nawo. Mu ta vinzuka nguvu, kasi loku giku nwe, mu suka.

¹¹Zinghaho Davida i lo vuka ni mixo nguvu ni vanhu vakwe, va suka na ga hi mixo, va tlhelela tikweni ga vaFilistia. Kanilezi a vaFilistia va lo kanziha vaya le Jezreeli.