Read tshwa 1 Samueli 6 Bible Online

1 Samueli 6 - tshwa bible

1 Samueli 6

¹A arke ga Jehova gi lo tshama ntlhanu ni timbiri tihweti le tikweni ga vaFilistia.

²A vaFilistia va lo vitana vapristi ni zitumbe, va taku kabye: Hi ta mahisa kuyini hi arke ga Jehova? Hi byeleni lezi hi ta nga gi tlhelisisa zona wutshanwini ga gona.

³Vona vaku: Loku mu tlhelisa a arke ga Nungungulu wa ka Israeli, mu nga gi tlhelisi na gi hi phanga; gi tlheliseni na mu humesa a munyikelo wa kuonha, zonake mu ta kalamuka, ni kambe mu ta tiva xigelo xa lezi a canja ga Nungungulu gi nga kala ku suka ka nwina.

⁴Zonake vona va te ngalo: Munyikelo muni hi ta nga nyikela ka gona? Vaku ngalo: Mu ta nyikela ntlhanu wa zidlayi za nzalama ni ntlhanu wa makondlo ya nzalama, khwatsi hi tsengo wa tihosi ta vaFilistia, hakuva lixaka linwe la ntungu li nga hi ka nwina nwentlhe ni tihosi ta nwina.

⁵Hikwalaho mu ta maha zifananiso za zidlayi za nwina ni zifananiso za makondlo lawa ma xakelako a tiko ga nwina, zonake mu ta dzunza Nungungulu wa ka Israeli, kutani i ta hehukisa a canja gakwe hehla ka nwina, ni ka vanungungulu va nwina, ni ka tiko ga nwina.

⁶Mu ta nonohisela yini a timbilu ta nwina, kota vaGipite na Faro, va nga nonohisa timbilu tabye ke? A zi mahisangi zalezo laha a nga maha zihlamaliso xikari kabye, kala va va tsika va famba ke? [13]

⁷Mahani a kareta yiswa zalezi, mu teka mapswele mambiri ya tihomu tiswa ti anwisako, ti kalako ti nga se rwala muyoko, mu panisa tihomu leto laha kareteni, mu siya marole ya tona kaya.

⁸Zonake mu ta veka a arke ga Jehova lomu kareteni, mu teka a zilo za nzalama lezi mu nga zi nyikela ka gona, wu nga wona munyikelo wa kuonha, mu zi enghenisa lomu ka xinghaxana, hi laha kusuhani ni arke; zonake mu tsika tihomu ti famba nago.

⁹Mu ta cuwuka, lezaku loku gona gi famba hi ndlela ya mbhingano wa gona, hi tlhelo ga Beti-Xemexe, hi ta zi tiva lezaku hi Jehova a hi neheleko kubiha loku, kasi loku gi ngayi seyo, hi ta tiva lezaku a hi canja gakwe gi hi hlaselako, kanilezi zo humelelawu basi.

¹⁰A vavanuna va lo maha lezo. Va lo teka mapswele mambiri ya tihomu tiswa ti anwisako, va ti panisa kareteni, zonake va valela marole ya tona le kaya;

¹¹va veka a arke ga Jehova lomu kareteni, ni xinghaxana lexi xi nga ni makondlo ya nzalama, ni zifananiso za zidlayi zabye.

¹²A tihomu ti su gwirigwiri hi ndlela yi yako Beti-Xemexe, na ti kari ti bhoma, ti famba hi ndlela yinwe ti nga hambuki xibhabheni hambu xineneni. A tihosi ta vaFilistia ti lo yi lanzela kala mbhinganweni wa Beti-Xemexe.

¹³A vanhu va le Beti-Xemexe va wa kari va tshovela mavele yabye le nkoveni. Va te vaku hoxo mahlo, va si wona a arke. Va lo tsaka nguvu hi ku gi wona.

¹⁴Laha a kareta yi ngata lomu masinwini ya Joxua a muBeti-Xemexe, yi lo ta yima lomo; ku wa hi ni ribye ga hombe laho. Va lo panzelela mapulangu ya kareta va maha tihunyi, va nyikela mapswele lawo ya mambiri, va maha ha wona a munyikelo wa kuhiswa wa Jehova.

¹⁵A va ka Levi va wa tile va ta chisa a arke ga Jehova zinwe ni xinghaxana lexi xi nga hi ni zilo za nzalama, va zi veka hehla ka ribye lego ga hombe. Gwalego siku a vanhu va le Beti-Xemexe va lo nyikela munyikelo wa kuhiswa ka Jehova, ni miphahlelo ya kona.

¹⁶Laha a ntlhanu wa tihosi ta vaFilistia ti nga wona lezo, ti lo tlhelela le Ekroni gwalego siku.

¹⁷A zidlayi za nzalama lezi a vaFilistia va nga nyikela a kuva munyikelo wa kuonha, hi lezi: Xidlayi xinwe xa va le Axdode, ni xinwe xa va le Gaza, ni xinwe xa va le Axkeloni, ni xinwe xa va la Gati, ni xinwe xa va le Ekroni.

¹⁸Ni makondlo ya nzalama ma wa ecana ni tsengo wa miti yontlhe ya vaFilistia ya ntlhanu wa tihosi, kusukela ka miti ya makhokhola kala ka zimitana za tiko, kala ribyeni ga hombe legi va nga vekela a arke ga Jehova hehla ka gona. A ribye lego ga ha hi kona ni lezi le sinwini ga Joxua a muBeti-Xemexe.

¹⁹Jehova i lo lovisa nguvu a vanhu va le Beti-Xemexe, hakuva va lo cuwuka a arke ga Jehova. I lo lovisa 70 wa vanhu nzeni ka 50,000 wabye. A vanhu va loba nkosi hi lezi Jehova a nga hihiritile vanwani vabye.

²⁰A vanhu va le Beti-Xemexe va te ngalo: Himani a ta nga zi kota ku yima mahlweni ka Jehova Nungungulu loyi a basileko ke? Gi taya ka mani a arke loku gi suka lomu ka hina ke?

²¹Zonake va lo rumela a mitsumi a kuya ka vanhu va le Kiriate-Jearime, vaku ngalo: A vaFilistia va tlhelisile a arke ga Jehova, ngonani mu ta gi teka gita seyo ka nwina.