Read tshwa 1 Samueli 8 Bible Online

1 Samueli 8 - tshwa bible

1 Samueli 8

¹Laha Samueli a nga wa khosahele, i lo yimisa a vana vakwe va maha valamuli va ka Israeli.

²A vito ga nʼwana wakwe wa matewula i wa hi Joeli; a ga nzisana ya kona i wa hi Abija. Va wa hi valamuli le Berxeba.

³Kanilezi a vana vakwe a va fambangi hi tindlela takwe; va lo khunguvanyeka hi ku navela mali, va vumela ku rengelelwa, va hambukisa nongameto. Va ka Israeli va kombela hosi.

⁴Zonake a masingalakati wontihe ya ka Israeli va lo tsombana ka Samueli le Rama, vaku kakwe:

⁵Wena u khosahele; a vana va wena a va fambi hi tindlela ta wena. Makunu hi yimisele hosi, leyi yi ta nga hi lamula khwatsi hi wontihe matiko. [15]

⁶A mhaka leyo yi wa bihile mahlweni ka Samueli, leʼyaku: Hi yimisele hosi leyi yi ta nga hi lamula. Samueli i lo kombela ka Jehova.

⁷Jehova i te ngalo ka Samueli: Ingisa timhaka tontlhe leto a vanhu va ku byelako, hakuva a va tsiki wena, kanilezi hi mina va nzi tsikileko, va nga ranzi lezaku nzi maha hosi yabye.

⁸Va maha zo khwatsi hi lezi va mahileko kusukela siku lego nzi nga va humesa ha gona le Gipite, kala ni nyamutlha va nzi tsikako va ya khozela vanwani vanungungulu; va maha zalezo ni ka wena kambe.

⁹Makunu ingisa a gezu gabye; ntsena lezaku u ta va layisisa, u va tivisa hi milayo ya mafumela ya hosi leyo yi ta nga va fumela. [16]

¹⁰Samueli i lo hlawutela tontlhe timhaka ta Jehova ka vanhu lavo va nga wa kombela hosi,

¹¹aku: A malungelo ya hosi leyo yi to mu fumela, hi lawa: I ta teka a vana va nwina a va kanzihisa lomu ka tikareta takwe ni mahaxi yakwe, va ta tsutsuma mahlweni ka kareta yakwe.

¹²A vavanuna va ta yimiswa a kuva tinduna ta hombe, ni titsongwani, a vanwani va ta mu rimela masimu yakwe, ni ku hula mavele yakwe, ni ku fula matlhari ya yimpi, ni mitiro ya tikareta takwe.

¹³A vanhanyana va nwina i ta va maha vamahi va tibani, ni vabhiki, ni vavuvi va zibaba.

¹⁴A xikari ka masimu ya nwina, ni zivina za nwina, ni mioliva ya nwina, lezi za chukwana, i ta zi nyika malanza yakwe.

¹⁵I ta teka a xipanze xa wukhume xa timbewu ta nwina ni xa zivina za nwina, a zi nyika ka mithenwa yakwe ni ka malanza yakwe.

¹⁶I ta mu tekela malanza ya nwina ya xinuna ni ya xisati, ni timbhuri ta nwina ta majaha, ni timbongola ta nwina, a zi tirisa mitiro yakwe.

¹⁷I ta teka xipanze xa wukhume ka mitlhambi ya nwina, nwina mu tava tikhumbi takwe.

¹⁸Zonake a siku lego mu ta rila hi kota ya hosi leyo mu ta nga yi hlawula, kanilezi Jehova cima a nga ta mu hlamula.

¹⁹Kanilezi va lo ala ku ingisa a gezu ga Samueli, vaku ngalo: Za hava lezo, hina hi lava hosi ku hi fumela;

²⁰kasi hinawu hi fela ku fanana ni wontihe matiko. A hosi ya hina hi yona yi ta nga hi lamula, ni ku hi rangela, ni ku seketela tiyimpi ta hina.

²¹Laha Samueli a nga wa zwile timhaka leto tontlhe ta vanhu, i lo ya ti hlawutela tindleveni ta Jehova.

²²Jehova aku ka Samueli: Ingisa a gezu gabye, u va yimisela hosi. Zonake Samueli i te ngalo ka va ka Israeli: Nwentlhe fambani mitini ya nwina.