Read tsonga Genesa 12 Bible Online

Genesa 12 - tsonga bible

Genesa 12

¹Kutani Yehovha a byela Abrama, a ku: “Huma etikweni ra wena ni le rixakeni ra wena, ni le ndlwini ya tata wa wena, u ya etikweni leri ndzi nga ta ku kombisa rona.

²Ndzi ta ku endla tiko lerikulu; ndzi ku katekisa, ndzi kurisa vito ra wena, u va xihlovo xa mikateko.

³Ndzi ta katekisa lava nga ta ku katekisa, ndzi rhuketela lava nga ta ku rhuketela, kambe ha wena ku ta katekisiwa tinxaka hinkwato ta misava.”

⁴Kutani Abrama a rhurha, hilaha Yehovha a n'wi byeleke hakona, na yena Lota a suka na yena. Abrama a a ri ni malembe ya 75, loko a huma eHarana.

⁵Abrama a teka Sarayi, nsati wa yena, na Lota, n'wana wa makwavo, ni swa vona hinkwaswo leswi va swi fuweke, ni vanhu lava va va velekeke eHarana, kutani va suka va ya etikweni ra Kanana; kutani va ya fika etikweni ra Kanana.

⁶Abrama a tsemakanya etikweni, a fika exivandleni xa Xikeme, ku nga eMikuhlwini ya More; kambe Vakanana a va ri etikweni lero enkarhini wolowo.

⁷Kutani Yehovha a humelela eka Abrama, a ku eka yena: “Misava leyi, ndzi ta yi nyika vatukulu va wena.” Kutani a akela kona gandzelo eka Yehovha la nga humelela eka yena.

⁸Kutani a suka kona, a ya entshaveni ya le vuxeni ka Betele, a dzima kona ntsonga wa yena, a ri na Betele hitlhelo ra vupeladyambu, na Ayi hitlhelo ra vuxa: a aka kona gandzelo ra Yehovha, a khongela vito ra Yehovha.

⁹Kutani Abrama a suka, a famba mimpfhuka, a ya tlhelo ra dzonga.

¹⁰Ku we ndlala etikweni lero, kutani Abrama a rhelela eEgipta ku ya tshama kona, hikuva ndlala a yi kurile etikweni.

¹¹Kuteloko a lave ku nghena eEgipta, a byela Sarayi, nsati wa yena, a ku: “Waswivo, ndza swi tiva leswaku u mbhuri ya wansati;

¹²kutakuloko Vaegipta va ku vona, va ta ku: ‘I nkatakwe!’ Kutani va ta ndzi dlaya, wena va ku tshika u hanya.”

¹³Hikwalaho u nge u makwerhu, ndzi ta tiva ku rhurheriwa swinene hikwalaho ka wena, ndzi va ndzi hanya ha wena.

¹⁴Kutani kakuloko Abrama a nghena eEgipta, Vaegipta va vona nsati wa yena leswaku u sasekile ngopfu.

¹⁵Tindhuna ta Faro na tona ti n'wi vona, ti n'wi dzunisa emahlweni ka Faro, kutani nsati loyi, a yisiwa endlwini ya Faro.

¹⁶Kutani Abrama a rhurheriwa swinene hikwalaho ka nsati wa yena, a kuma swifuwo leswitsongo ni leswikulu, ni timbhongolo, ni makhumbi ya xinuna ni ya xisati, ni matswele ya timbhongolo, ni tikamela.

¹⁷Kambe Yehovha a ba Faro ni yindlu ya yena hi makhombo lamakulu hikwalaho ka Sarayi, nkata Abrama.

¹⁸Kavaloko Faro a vita Abrama, a ku eka yena: “U ndzi endlise yini? A ku ndzi tivisanga ha yini-ke leswaku i nsati wa wena?

¹⁹U vurise ku yini u ku: ‘I makwerhu,’ ndzi ko ndzi n'wi endla nsati wa mina? Kutani sweswi, nsati wa wena hi loyi; n'wi teke u famba na yena.”

²⁰Kutani Faro a lerisa malandza ya yena leswaku ma n'wi hlongola, yena ni nsati, ni hinkwaswo leswi ngi a ri na swona.