Read tsonga Genesa 15 Bible Online

Genesa 15 - tsonga bible

Genesa 15

¹Endzhaku ka timhaka teto, rito ra Yehovha ri fika eka Abrama enorhweni, ri ku: “Abrama, u nga chavi. Ndzi xitlhangu xa wena ni hakelo ya wena leyikulu.”

²Abrama a ku: “Hosi Yehovha, u ta ndzi nyika yini-ke? Ndza tifambela ndzi nga ri na vana, ni mudyandzhaka wa yindlu yanga, hi loyi Eliezere wa Damaska.”

³Abrama a engeta a ku: “Waswivo, a ku ndzi nyikanga n'wana, kutani vona, loyi a nga ta dya ndzhaka ya mina i nandza la nga tswariwa endlwini.”

⁴Kavaloko rito ra Yehovha ri fika eka yena, ri ku: “Yeloyi a nga ka a nga dyi ndzhaka ya wena, kambe ku ta dya loyi a nga ta huma emarhumbyini ya wena.”

⁵Kutani a n'wi humesela ehandle, a ku: “Languta tilo u hlaya tinyeleti loko u nga swi kota.” A engeta a ku: “Vatukulu va wena va ta kotisa sweswo.”

⁶Abrama a pfumela eka Yehovha, Yehovha a n'wi hlayela kona ku lulama.

⁷Yehovha a engeta, a ku: “Hi mina Yehovha, la nga ku humesa eUru wa Kalediya, ku ta ku nyika tiko leri, u ri fuma.”

⁸Kutani a ku: “Ndzi ta swi tivisisa ku yini leswaku ndzi ta ri fuma?”

⁹Kutani Yehovha a ku: “Ndzi tisele thokazi ra malembe manharhu, ni mbuti ya malembe manharhu, ni khuna ra malembe manharhu, ni tuva, ni gugurhwana.”

¹⁰Kutani a n'wi tisela swilo leswo, a swi avanyisa hi le xikarhi, a swi xaxameta swi lavana; ntsena a nga avanyisangi tinyanyana.

¹¹Kutani makoti ma ta wela etinyameni, kambe Abrama a ma swukuta.

¹²Kavaloko dyambu ri lava ku pela, vurhongo lebyikulu byi khoma Abrama, kutani maswivo, nchavo wa munyama lowukulu wu n'wi khoma.

¹³Kutani a ku eka Abrama: “U tivisisa swinene leswaku vatukulu va wena va ta luvela etikweni leri nga ka ri nga vi ra vona, va ta va makhumbi ya kona, va ta tsongahatiwa hi malembe ya mune wa madzana.

¹⁴Kambe ndzi ta avanyisa tiko leri va nga ta fumiwa hi rona, kutani ndzhaku va ta huma kona va fuwe ngopfu.

¹⁵Loko u ri wena, u ta tifambela hi ku rhula eka vatata wa wena, u ta yimberiwa u dyuhele swinene.

¹⁶Kambe erixakeni ra vumune, va ta vuya halenu, hikuva ku homboloka ka Vaamori a ku si tala hi ku ringana.”

¹⁷Kuteloko dyambu ri perile, ku wa munyama; kutani maswivo, khele leri pfurhaka, ni swisa leswi pfurhaka swi hundza exikarhi ka swilo leswi avanyisiweke.

¹⁸Hi siku rolero, Yehovha a tiyisa ntwanano na Abrama, a ku: “Ndzi nyikile tiko leri eka vatukulu va wena, ku suka enambyeni wa Egipta, ku fikela enambyeni lowukulu, wu nga nambu wa Yufrata,

¹⁹tiko ra Vakeni, ni ra Vakenizi, ni ra Vakadimoni,

²⁰ni ra Vahiti, ni ra Vaperesi, ni ra Varefayimi,

²¹ni ra Vaamori, ni ra Vakanana, ni ra Vagirigaxi, ni ra Vayebusi.”