Read tsonga Genesa 2 Bible Online

Genesa 2 - tsonga bible

Genesa 2

¹Hi kona ku endliwa ka matilo ni misava ni swilo hinkwaswo swa swona.

²Kutani hi siku ra ntlhanu na mambirhi, Xikwembu xi heta ntirho hinkwawo lowu xi nga wu endla; kutani hi siku ra ntlhanu na mambirhi, xi wisa entirhweni hinkwawo lowu xi wu endleke.

³Xikwembu xi katekisa siku ra ntlhanu na mambirhi, xi ri hlawula, hikuva hi siku lero, xi wisile entirhweni hinkwawo wa xona, lowu xi nga wu tumbuluxa hi ku wu tirha.

⁴Ku tumbuluka ka matilo ni misava loko swi endliwile hi Yehovha Xikwembu hi ko loku:

⁵A ku nga si va kona ximudyana ni xin'we xa nhova emisaveni, ni byanyi hinkwabyo bya nhova a byi nga si mila, hikuva Yehovha Xikwembu a a nga si nisa mpfula emisaveni, kutani a ku nga si va na munhu la rimaka misava.

⁶Kambe hunguva a yi huma emisaveni, yi tsakamisa misava hinkwayo.

⁷Kutani Yehovha Xikwembu a vumba munhu hi ntshuri wa misava, a huhutela etinhompfini ta yena ku hefemula ka vutomi, ka va loko munhu a endliwe xivumbiwa lexi hanyaka.

⁸Kutani Yehovha Xikwembu a endla ntanga etikweni ra Edeni, hitlhelo ra vuxa, kutani a veka kona munhu loyi a nga n'wi vumba.

⁹Kutani Yehovha Xikwembu a mirisa emisaveni mirhi ya tinxaka hinkwato leyi navetaka mahlo, ni leyi nandzihaka, ni murhi wa vutomi exikarhi ka ntanga, ni murhi wo tivisa swo saseka ni swo biha.

¹⁰Nambu a wu huma eEdeni wu chelela ntanga, kambe a wu hambana kona, wu endla milambu ya mune.

¹¹Vito ra lowo rhanga, i Pixoni; hi wona lowu rhendzeleka tiko hinkwaro ra Havhila, laha ku nga ni nsuku kona.

¹²Nsuku wa tiko lero wu sasekile; kona ku nga kumiwa ni bedelium ni ribye ra onikisi.

¹³Vito ra nambu wa vumbirhi, i Gihoni; hi wona lowu rhendzelaka tiko hinkwaro ra Kuxi.

¹⁴Nambu wa vunharhu, i Hidekele; hi wona lowu khulukelaka evuxeni bya Asiriya. Nambu wa vumune, i Yufrata.

¹⁵Kutani Yehovha Xikwembu a teka munhu, a n'wi veka entangeni wa Edeni ku wu rima ni ku wu langutela.

¹⁶Yehovha Xikwembu a lerisa munhu, a ku: “U ta tidyela mirhi hinkwayo ya ntanga;

¹⁷kambe loko wu ri murhi wo tivisa swo saseka ni swo biha, u nga tshuki u dya, hikuva siku u dyaka, u ta fa.”

¹⁸Kutani Yehovha Xikwembu a ku: “A swi sasekanga loko munhu a tshama a ri swakwe, ndzi ta n'wi endlela nakulobye la fanaka na yena.”

¹⁹Kambe Yehovha Xikwembu a a vumbile hi misava swiharhi hinkwaswo swa tiko, ni tinyanyana hinkwato ta tilo, a swi neha ka munhu leswaku a ta vona hilaha a nga ta swi thya mavito hakona, ni leswaku mavito hinkwawo lawa munhu a nga ta thya swivumbiwa hinkwaswo ha wona, ma ve mavito ya swona.

²⁰Kutani munhu a thya swifuwo hinkwaswo mavito, ni tinyanyana ta tilo, ni swiharhi hinkwaswo swa tiko; kambe a nga kumanga nakulobye la fanaka na yena.

²¹Kutani Yehovha Xikwembu a etlerisa munhu hi vurhongo lebyikulu, kutani munhu a tietlelela; kutani a teka rimbambu rin'wana eka yena a tlherisela nyama ematshan'weni ya rona.

²²Kutani Yehovha Xikwembu a endla wansati hi rimbambu leri a nga ri teka ka munhu, a n'wi tisa ka munhu.

²³Kutani munhu a ku: “Sweswi, yeloyi, i rhambu ra marhambu ya mina, ni nyama ya nyama ya mina; yeloyi u ta thyiwa wansati hikuva u tekiwile eka wanuna.”

²⁴Hikwalaho-ke wanuna u ta siya tata wakwe ni mana wakwe, u ta namarhela nsati wa yena, va ta endla nyama yi ri yin'we.

²⁵Kutani wanuna ni nsati wa yena a va tshama va nga ambalanga nchumu, kambe a va nga ri na tingana.