Read tsonga Genesa 23 Bible Online

Genesa 23 - tsonga bible

Genesa 23

¹Malembe ya Sara a ma ri 127; hi wona malembe ya ku hanya ka Sara.

²Kutani Sara a fa eKiriyata-Araba (a nga Hebroni), etikweni ra Kanana; kutani Abrahama a ta ba nkosi wa Sara, a n'wi rila.

³Kutani Abrahama a suka emahlweni ka mufi wa yena, a ya vulavula ni Vahiti, a ku:

⁴“Ndzi muluveri ni muendzi exikarhi ka n'wina; ndzi nyikeni exikarhi ka n'wina sirha ndzi ri fuwa, ndzi tiva ku susa mufi wa mina emahlweni ka mina, ndzi n'wi yimbela.”

⁵Vahiti va hlamula Abrahama va ku eka yena:

⁶“Hi yingisise, hosi: U ndhuna ya Xikwembu exikarhi ka hina; lahla mufi wa wena esirheni ra hina leri u nga ta ri hlawula. A ku na un'we wa ka hina la nga ta ku alela sirha ra yena, u yimbela kona mufi wa wena.”

⁷Abrahama a suka a yima, a khinsama emahlweni ka vanhu va tiko, emahlweni ka Vahiti,

⁸a ku eka vona: “Loko timbilu ta n'wina ti ndzi pfumelela leswaku ndzi susa mufi emahlweni ka mina ndzi n'wi yimbela, ndzi yingiseni mi ndzi khongelela eka Efroni, n'wana Sohara,

⁹a ndzi nyika bako ra Makapela, leri nga ra yena, leri nge makumu ka nsimu ya yena, a ndzi nyika rona emahlweni ka n'wina ematshan'weni ya mali ya rona, ri va sirha ra mina exikarhi ka n'wina.”

¹⁰Kasi Efroni a a tshamile exikarhi ka Vahiti. Kavaloko Efroni, wa Muhiti, a hlamula Abrahama, Vahiti va ri karhi va swi twa, ni hinkwavo lava nga karhi va nghenaka hi nyangwa ya muti wa yena, a ku eka yena:

¹¹“A swi nga vi tano, hosi yanga; ndzi yingise: Nsimu, ndzi ku nyika ntsena, na rona bako leri nga eka yona, ndzi ku nyika rona; ndzi ku nyika rona emahlweni ka vana va tiko ranga; yimbela ntsena mufi wa wena.”

¹²Abrahama a khinsama emahlweni ka vanhu va tiko,

¹³a vulavula na Efroni, vanhu va tiko va ri karhi va yingisa, a ku: “I ngi loko u ndzi yingisisa! Ndzi humesa mali ya nsimu, yi amukele emandleni ya mina, ndzi ta lahlela kona mufi wa mina.”

¹⁴Kutani Efroni a hlamula Abrahama, a ku eka yena:

¹⁵“Hosi yanga, yingisa: Nsimu ya mune wa madzana ya tixikele ta silivhere exikarhi ka mina na wena, i nxini-ke? Yimbela mufi wa wena.”

¹⁶Abrahama a twisisa Efroni, a pimela Efroni hi xikalo mali leyi a nga yi vula, Vahiti va ri karhi va swi twa, a nga tixikele ta silivhere ya mune wa madzana lama amukeriwaka exikarhi ka vaxavi.

¹⁷Sweswo nsimu ya Efroni, leyi nga eMakapela, ni ku vandzakana na Mamre, nsimu ni bako leri nga eka yona, ni mirhi hinkwayo leyi nga ensin'wini, ni le mindzilekaneni ya yona,

¹⁸swi tshamile swi ri swa Abrahama, emahlweni ka Vahiti, emahlweni ka hinkwavo lava nga karhi va nghenaka hi nyangwa ya muti wa yena.

¹⁹Endzhaku ka swona, Abrahama a yimbela Sara nsati wa yena ebakweni ra nsimu ya Makapela, hi ku vandzakana na Mamre (a nga Hebroni), etikweni ra Kanana.

²⁰Nsimu ni bako leri nga eka yona swi tshame swi fuyiwa hi Abrahama, ri va sirha leri xaviweke eka Vahiti.