Read tsonga Genesa 27 Bible Online

Genesa 27 - tsonga bible

Genesa 27

¹Kuteloko Isaka a dyuhele, ni mahlo ya yena ma hele matimba, a nga ha voni nchumu, a vitana Esawu, n'wana wa yena lowa mativula, a ku eka yena: “N'wananga!” Yena a ku: “Hi mina loyi.”

²Isaka a ku: “Waswivo, ndzi dyuhele, kambe a ndzi tivi siku leri ndzi nga ta fa ha rona.

³Sweswi, wa nga teka matlhari ya wena ni miseve ni vurha bya wena, u ya enhoveni, u ndzi dlayela nyama.

⁴U ta ndzi lunghisela murhu lowu ndzi wu rhandzaka, u ndzi nehela wona, ndzi dya, kutani moya wa mina wu ku katekisa ndzi nga si fa.”

⁵Kasi Rhaveka a a ri karhi a swi twa, loko Isaka a vulavula na Esawu, n'wana wa yena. Esawu a ya enhoveni ku ya hlota nyama, a ta vuya na yona.

⁶Kavaloko Rhaveka a vulavula sweswo eka Yakobo, n'wanakwe, a ku: “Yingisa, ndzi twe tata wa wena a ri karhi a vulavula sweswo eka Esawu makwenu, a ku:

⁷‘Ndzi nehele nyama, u ndzi lunghisela murhu wunene, ndzi dya, ndzi ku katekisa emahlweni ka Yehovha ndzi nga si fa.’

⁸Sweswo-ke, n'wananga, yingisa leswi ndzi nga ta ku lerisa swona.

⁹Yana entlhambini, u ndzi tekela swimbutana swimbirhi leswinene, ndzi ta lunghisela tata wa wena murhu wunene lowu a wu rhandzaka.

¹⁰Kutani u ta wu nehela tata wa wena, a dya, a ku katekisa a nga si fa.”

¹¹Kambe Yakobo a byela Rhaveka, mana wakwe, a ku: “Waswivo, Esawu makwerhu, i munhu wa ringhala, kasi mina a ndzi na rona.

¹²Kumbe xana tatana u ta ndzi ambamba, kutani ndzi ta va eka yena munhu wa mudyeleri, ndzi tikokela hakona ndzhukano, ku nga ri ku katekisiwa.”

¹³Mana wa yena a ku eka yena: “Ndzhukano wu ta va eka mina, n'wananga; wena yingisa ntsena, famba u ya ndzi tekela swona.”

¹⁴Kavaloko a ya swi teka, a swi neha ka mana wa yena, kutani mana wa yena a endla murhu wunene hilaha tata wa yena a wu rhandzeke hakona.

¹⁵Kutani Rhaveka a teka tinguvu ta Esawu, mativula ya yena, leta nkoka leti ngi a ri na tona endlwini, a ambexa Yakobo, n'wana wa yena wa ndzisana.

¹⁶Kutani a funengeta hi dzovo ra swimbutana mavoko ya yena, ni nhamu leyi nga riki na ringhala;

¹⁷kutani a nyika Yakobo, n'wanakwe, murhu ni vuswa lebyi a nga byi lunghisa.

¹⁸Kavaloko a ta eka tata wa yena, a ku: “Tatana!” Yeloyi a ku: “Hi mina loyi! U mani, n'wananga?”

¹⁹Yakobo a ku eka tata wa yena: “Hi mina Esawu, mativula ya wena, ndzi endlile hilaha u nga ndzi byela hakona. Wa nga pfuka, u tshamisa, u dya vuhloti bya mina, kutani moya wa wena wu ta ndzi katekisa.”

²⁰Isaka a ku eka n'wana wa yena: “U hatlisise ku yini ku swi kuma, n'wananga?” Yakobo a ku: “Hi leswi Yehovha, Xikwembu xa wena, a nga ndzi hlanganisela swona.”

²¹Kutani Isaka a byela Yakobo, a ku: “Wa nga tshinela ekusuhi, n'wananga, ndzi ku ambamba, ndzi tiva xana u n'wananga Esawu, kumbe u nga ri yena.”

²²Yakobo a tshinelela ekusuhi na Isaka, tata wa yena, kutani Isaka a n'wi ambamba, a ku: “Rito, i ra Yakobo; kambe mavoko i mavoko ya Esawu.”

²³Sweswo a nga n'wi tivanga hikuva mavoko ya yena a ma ri ni ringhala, ma fana ni mavoko ya Esawu makwavo, kutani a n'wi katekisa.

²⁴Kambe a ku: “Kunene hi wena u nga n'wananga Esawu, xana?” Yakobo a ku: “Hi mina!”

²⁵Kutani Isaka a ku: “Ndzi phamele ndzi dya vuhloti bya n'wananga, leswaku moya wa mina wu ku katekisa.” Kutani a n'wi phamela, a dya; a n'wi nehela ni vhinyo, a nwa.

²⁶Kavaloko Isaka, tata wa yena, a ku eka yena: “Wa nga tshinelela, u ndzi ntswontswa n'wananga.”

²⁷Kutani a tshinela, a n'wi ntswontswa. Kutani Isaka a twa ku nun'hwela ka tinguvu ta yena, a n'wi katekisa, a ku: “Kunene, ku nun'hwela ka n'wananga ku ni ku nun'hwela ka nsimu leyi nga katekisiwa hi Yehovha.

²⁸Xikwembu a xi ku nyike swa mberha ya tilo, ni swa mafurha ya misava, ni ndzalo ya vuswa, ni vhinyo.

²⁹Matiko a ma ku tirhele, tinxaka ti ku khinsamela. U va hosi ya vamakwenu, ni vana va mana wa wena a va ku khinsamele! A ku rhuketeriwe loyi a nga ta ku rhuketela! Ku katekisiwa loyi a nga ta ku katekisa!”

³⁰Kuteloko Isaka a hetile ku katekisa Yakobo, ni loko Yakobo a ha ku huma emahlweni ka Isaka, tata wakwe, Esawu, makwavo, a vuya eku hloteni.

³¹Na yena a lunghisa murhu wo xawula, a wu tisa eka tata wakwe, a ku eka tata wa yena: “Wa nga pfuka tatana, u dya vuhloti bya n'wanaku, moya wa wena wu ta tiva ku ndzi katekisa.”

³²Kutani Isaka, tata wa yena, a ku: “U mani?” Yena a ku: “Hi mina, n'wana wa wena wa mativula, Esawu.”

³³Kavaloko Isaka a khomiwa hi ku tshuka lokukulu, a ku: “I mani-ke yeloyi a nga ndzi hlotela nyama a ndzi nehela yona? Ndzi dye hinkwaswo u nga si vuya, ndzi va ndzi n'wi katekisa; hakunene ku katekisiwa ku na yena.”

³⁴Kuteloko Esawu a twa marito ya tata wa yena, a huwelela hi rito lerikulu, leri tlhavekaka, a ku eka tata wa yena: “Oho! Tatana, ndzi katekise na mina!”

³⁵Kutani Isaka a ku: “Makwenu u tile hi mano, u tekile ku kateka ka wena.”

³⁶Esawu a ku: “Xana hi leswi a nga churiwa vito ra Yakobo, kutani u ndzi dyelele kambirhi? U ndzi tekele vukulukumba, kutani waswivo, sweswi u ndzi tekele ku kateka ka mina.” A engeta, a ku: “Xana a ku ndzi hlayiselanga ku kateka kun'wana?”

³⁷Kutani Isaka a hlamula a ku eka Esawu: “Waswivo, ndzi n'wi endlile hosi ya wena, ndzi n'wi nyikile vamakwavo hinkwavo va yena, va ve malandza ya yena, ndzi vuya ndzi n'wi tatisela vuswa ni vhinyo; loko u ri wena-ke, ndzi nga ku endlela yini xana, n'wananga.”

³⁸Esawu a ku eka tata wa yena: “Xana u ni ku katekisa koloko ntsena xana, tatana? Oho! Tatana, ndzi katekise na mina!” Kutani Esawu a tlakusa rito, a rila.

³⁹Kavaloko Isaka, tata wa yena, a hlamula, a ku: “Waswivo, muti wa wena wu ta pfumala mafurha ya misava, ni mberha leyi humaka etilweni, ehenhla.

⁴⁰U ta hanya hi fumu ra wena, u va nandza wa makwenu. Kutakuloko u phonyokile, u ta tshova mpingu wa yena enhan'wini ya wena.”

⁴¹Kutani Esawu a venga Yakobo hikwalaho ka ku katekisiwa loku tata wa yena a nga n'wi katekisa hakona. Esawu a ku embilwini ya yena: “Masiku ya nkosi wa tatana ma kusuhi, kutani ndzi ta dlaya Yakobo, makwerhu.”

⁴²Kambe va ya ambela Rhaveka marito ya Esawu, mativula ya yena, kutani a rhuma ku ya vitana Yakobo, n'wana wa yena wa ndzisana, a ku eka yena: “Waswivo, Esawu, makwenu, u lava ku tirihisela eka wena hi ku ku dlaya.

⁴³Sweswi, n'wananga, ndzi yingise: Pfuka u balekela eka Labani, makwerhu, eHarana,

⁴⁴u tshama na yena nkarhinyana, vukari bya makwenu byi ko byi hola,

⁴⁵vukari bya makwenu byi ko byi suka eka wena, a rivala leswi u n'wi endliseke swona; kutani ndzi ta rhumela rito ndzi ku vitana kona. Xana ndzi nga pfumarisiwa n'wina vambirhi hi siku rin'we?”

⁴⁶Kutani Rhaveka a ku eka Isaka: “Ndzi nyenya vutomi hikwalaho ka vana va Vahiti; kungakuloko Yakobo a teka exikarhi ka vanhwana va Vahiti nsati la kotisaka volavo, exikarhi ka vanhwana va tiko leri, vutomi byi nga ndzi pfuna yini xana?”