Read tsonga Genesa 28 Bible Online

Genesa 28 - tsonga bible

Genesa 28

¹Kavaloko Isaka a vitana Yakobo, a n'wi katekisa, a n'wi lerisisa sweswo, a ku: “U nga tshuki u teka nsati exikarhi ka vanhwana va Kanana.

²Pfuka u ya Padani-Aramu, eka Betuwele, tata wa mana wa wena, u titekela kona nsati exikarhi ka vanhwana va Labani, makwavo wa mana wa wena.

³Xikwembu lexi nga ni matimba, xi ta ku katekisa, xi ku andzisa, xi ku kurisa, u endla vunyingi bya matiko;

⁴xi ta ku nyika ku katekisiwa ka Abrahama, ni vatukulu va wena, u va u fuma tiko leri u luvelaka eka rona, leri Xikwembu xi ri nyikeke Abrahama.”

⁵Isaka a nyika Yakobo endlela; a suka a ya ePadani-Aramu, eka Labani, n'wana Betuwele, wa Muaramu, makwavo wa Rhaveka, mana wa Yakobo na Esawu.

⁶Esawu u tivile leswaku Isaka u katekisile Yakobo, a n'wi rhumela ePadani-Aramu, ku ya teka nsati kona, ni leswaku, loko a n'wi katekisile, u n'wi layile, a ku: “U nga tshuki u teka nsati exikarhi ka vanhwana va Kanana,”

⁷ni leswaku Yakobo u yingisile tata wa yena ni mana wa yena, a ya ePadani-Aramu;

⁸kutani Esawu, loko a vona leswaku vanhwana va Kanana va bihile emahlweni ka Isaka, tata wa yena,

⁹a ya eka Iximaele, a teka Mahalata, n'wana Iximaele, n'wana Abrahama, makwavo wa Nebayoto, a va nsati wa yena, ehandle ka vasati lava ingi a ri na vona.

¹⁰Yakobo a suka eBerexeba a kongoma eHarana.

¹¹Kuteloko a fikile exivandleni lexi a nga etlela eka xona, hikuva dyambu a ri perile, a teka ribye rin'wana ra xivandla lexi, a seketela eka rona, a etlela kona.

¹²Kutani a lorha norho; a vona phandze ri yimile, ri ya fika etilweni; a vona ni tintsumi ta Xikwembu, ti ri karhi ti tlhandluka, ti tlhela ti xika ha rona.

¹³A vona na Yehovha, a yimile ehenhla ka rona, a ku: “Hi mina Yehovha Xikwembu xa Abrahama, tata wa wena, ni Xikwembu xa Isaka; tiko leri u etleleke eka rona, ndzi ta ri nyika wena ni vatukulu va wena.

¹⁴Vatukulu va wena va ta kotisa ntshuri wa misava, u ta nava evupeladyambu, ni le vuxeni, ni le n'walungwini, ni le dzongeni; mindyangu hinkwayo ya misava yi ta katekisiwa ha wena ni vatukulu va wena.

¹⁵Kutani waswivo, ndzi na wena, ndzi ta ku hlayisa hinkwako laha u yaka kona, ndzi va ndzi ku tlherisela etikweni leri; hikuva ndzi nga ka ndzi nga ku tshiki ndzi nga si endlisisa leswi ndzi ku byeleke swona.”

¹⁶Kavaloko Yakobo a sisimuka evurhongweni bya yena, a ku: “Kunene Yehovha u kona exivandleni xexi, kasi a ndzi nga swi tivi!”

¹⁷A khomiwa hi ku chava, a ku: “Xivandla lexi, xa chavisa swonghasi! Kwala, i yindlu ya Xikwembu; i nyangwa ya matilo!”

¹⁸Kuteloko ri xa, Yakobo a teka ribye leri ngi a seketerile eka rona, a ri yimisa xi va xitsundzuxo, kutani a chela mafurha ehenhla ka rona.

¹⁹Kutani a thya xivandla lexi vito ra Betele (yindlu ya Xikwembu); kasi eku sunguleni, vito ra muti a ri ri Luzi.

²⁰Yakobo a hlambanya, a ku: “Kungakuloko Xikwembu xi va na mina, xi ndzi hlayisa endleleni leyi ndzi yi khomeke, xi ndzi nyika vuswa ndzi dya, ni tinguvu ndzi funengela,

²¹ndzi ko ndzi tlhela hi ku tsaka endlwini ya tatana, Yehovha u ta va Xikwembu xa mina.

²²Kutani ribye leri ndzi ri yimiseke ndzi ri endla xitsundzuxo, yi ta va yindlu ya Xikwembu; kutani eka hinkwaswo leswi u nga ta ndzi nyika swona, ndzi ta ku humesela hakunene ku avanyisa ka vukhume.”