Read tsonga Genesa 34 Bible Online

Genesa 34 - tsonga bible

Genesa 34

¹Dina, n'wana Leya lowa nhwanyana yeloyi a nga velekela Yakobo, a huma ku ya vona vanhwanyana va tiko.

²Kutani Xikeme, n'wana Hamoro, wa Muhivhi, hosi ya tiko, a n'wi vona, a n'wi khoma, a etlela na yena, a n'wi onha.

³Kutani mbilu ya yena yi namarhela na Dina, n'wana Yakobo, a rhandza lowa nhwanyana, a lava ku n'wi yenga hi marito yakwe.

⁴Kutani Xikeme a vulavula na Hamoro, tata wakwe, a ku: “Ndzi tekele n'wana loyi, a ve nsati wa mina.”

⁵Kutani Yakobo a twa leswaku va onhile Dina, n'wana wa yena; kambe vana va yena va vavanuna a va ri enhoveni ni mitlhambi; Yakobo a timiyelela va ko va vuya.

⁶Hamoro, tata wa Xikeme, a huma ku ya eka Yakobo, a ya vulavula na yena.

⁷Kutani vana va Yakobo, loko va twa mhaka leyi, va vuya enhoveni, va vaviseka ngopfungopfu, va kariha swinene, hikuva Xikeme a a sandzile Israele siku a etleleke ni n'wana Yakobo, yi nga mhaka leyi nga fanelangiki.

⁸Kutani Hamoro a vulavula na vona, a ku: “Mbilu ya Xikeme, n'wananga, yi namarhele ni n'wana wa n'wina; ndza mi khongela, n'wi nyikeni yena a va nsati wa yena,

⁹endlani xinakulobye na hina, hi ta mi nyika vanhwana va hina, n'wina mi teka vanhwana va hina.

¹⁰Kutani mi ta tshama na hina, tiko ri va ra n'wina, mi aka kona, mi bindzula, mi va ni rifuwo.”

¹¹Xikeme a byela tata wa Dina ni vamakwavo vakwe, a ku: “I ngi ndzi kume tintswalo emahlweni ka n'wina, a ndzi ta mi nyika leswi mi nga ta ndzi byela.

¹²Vitanani eka mina ndzovolo lowukulu ni tinyiko leto tala, ndzi ta mi nyika swona hilaha mi nga ta ndzi byela hakona, kambe ndzi nyikeni lowa nhwanyana a va nsati wa hina.”

¹³Kambe vana va Yakobo va hlamula hi vutlhari eka Xikeme ni ka Hamoro, tata wakwe va endlisa sweswo hikuva a onhile Dina, makwavo wa vona.

¹⁴Va ku eka vona: “Hi nga tsandzeka ku endlisa sweswo, ni ku nyika makwerhu eka nuna la nga yimbisiwangiki, hikuva xi nga va xisandzu eka hina.

¹⁵Hi ta pfumelelana hi mhaka yoleyi ntsena, ya leswaku mi kotisa hina: wanuna un'wana ni un'wana wa ka n'wina a yimbisiwa.

¹⁶Kavaloko hi ta mi nyika vanhwana va hina, hi teka vanhwana va n'wina, hi aka na n'wina, hi endla tiko rin'we.

¹⁷Kambe kungakuloko mi nga pfumeri ku yimba, hi ta teka n'wana wa hina hi famba na yena.”

¹⁸Kutani marito ya vona ma nandziha emahlweni ka Hamoro, ni le mahlweni ka Xikeme, n'wana Hamoro.

¹⁹Kutani lowa jaha a nga hlwelanga ku endlisa sweswo, hikuva a a tsakela swinene n'wana wa Yakobo; kambe yena a a ri wanuna lonkulu endlwini hinkwayo ya tata wa yena.

²⁰Hamoro a ya na Xikeme, n'wanakwe, ehubyeni ya nyangwa ya muti wa vona; kutani va vulavula ni vanhu va muti, va ku:

²¹“Vanhu valavo i vanhu lavo rhula exikarhi ka hina, va ta aka etikweni, va bindzula; kasi maswivo, tiko leri nga emahlweni ka vona ri anamile. Hi ta teka vanhwana va vona, hi va lovotela vanhwana va hina.

²²Ntsena vanhu valavo va nga pfumela ku aka na hina, hi endla tiko rin'we, loko wanuna un'wana ni un'wana wa ka hina a yimba, kukotisa leswi na vona va yimbeke.

²³Xana mitlhambi ya vona ni rifuwo ra vona ni tihomu ta vona hinkwato swi nga ka swi nga vi swa hina xana? A hi pfumeleleni ntsena leswi va swi vulaka, kutani va ta tshama na hina.”

²⁴Hinkwavo lava tshamaka va huma hi nyangwa ya muti, va pfumelela Hamoro na Xikeme, n'wana wa yena; kutani vavanuna hinkwavo va yimbisiwa, va ri hinkwavo lava humaka hi nyangwa ya muti.

²⁵Kutani, hi siku ra vunharhu, kakuloko va ri karhi va ri ku vavisekeni, vana vambirhi va Yakobo, Simiyoni na Levhi, vamakwavo va Dina, va teka un'wana ni un'wana tlhari ra yena, va wela emutini va nga chavi nchumu, va dlaya vavanuna hinkwavo.

²⁶Va dlaya na Hamoro na Xikeme, n'wana wa yena, hi vukari bya tlhari, va teka Dina endlwini ya Xikeme, va huma na yena.

²⁷Kutani vana va Yakobo va tlula lava dlayiweke, va handza muti, hikuva a va onhile makwavo.

²⁸Va byisa swifuwana swa vona, ni swifuwo ni timbhongolo ta vona, hambi swi ri leswi nga emutini, hambi swi ri leswi nga enhoveni;

²⁹va teka ni ku gotsa xuma xa vona hinkwaxo, ni vana va vona hinkwavo, ni vasati va vona ni hinkwaswo leswi nga etindlwini.

³⁰Kutani Yakobo a ku eka Simiyoni ni le ka Levhi: “Mi ndzi dyisa mbitsi, mi ndzi endle rivengo eka vaaki va tiko leri, ni ka Vakanana, ni ka Vaperesi; kasi mina ndzi ni vanhu va nga ri vangani, kutani sweswi, va ta ndzi rhambela, va ndzi wela, ndzi lova ni yindlu ya mina.”

³¹Kutani va ku: “Xana va nga endla hi makwerhu leswo ngi i nsati wa mbhisa xana?”