Read tsonga Genesa 35 Bible Online

Genesa 35 - tsonga bible

Genesa 35

¹Xikwembu xi ku eka Yakobo: “Rhurha, u tlhandlukela eBetele, u ya aka kona, u akela kona gandzelo eka Xikwembu lexi nga tikombisa eka wena, nkarhi lowu u nga balekela mombo wa Esawu, makwenu.”

²Yakobo a ku eka va yindlu ya yena ni le ka hinkwavo lava ngi va ri na yena: “Susani swikwembu swin'wana leswi nga exikarhi ka n'wina, mi tihlantswa, mi funengela tinguvu tin'wana;

³kutani hi ta suka hi tlhandlukela eBetele, ndzi akela kona gandzelo eka Xikwembu lexi nga ndzi hlamula siku ra khombo ra mina, xi nga va na mina endleleni leyi ingi ndzi fambile eka yona.”

⁴Kavaloko va nyika Yakobo swikwembu hinkwaswo swin'wana leswi ngi swi ri emandleni ya vona, ni swingwavila swa le tindleveni ta vona, Yakobo a swi yimbela ehansi ka nkuhlu wa le kusuhi na Xikeme.

⁵Kavaloko va suka; kutani ku chava Xikwembu ku ve ehenhla ka miti leyi vandzamaneke na vona, hikwalaho a va landzelangi vana va Yakobo.

⁶Yakobo, ni vanhu hinkwavo lava ngi a ri na vona, va fika eLuzi, a nga Betele, etikweni ra Kanana.

⁷Kutani a akela kona gandzelo, a thya xivandla lexi vito ra Eli-Betele (Xikwembu xa Betele); hikuva hi kona Xikwembu xi nga tihlavutela eka yena enkarhini a balekaka emahlweni ka hosi ya yena.

⁸Kutani Debora, muan'wisi wa Rhaveka, a fa, a lahliwa ehansi ka Betele, ehansi ka nkuhlu; hikwalaho va wu thya vito ra Nkuhlu-wa-mikosi.

⁹Xikwembu xi engeta xi tikombisa eka Yakobo loko a ri karhi a vuya hi le Padani-Aramu, xi n'wi katekisa.

¹⁰Xikwembu xi ku eka yena: “Vito ra wena u Yakobo; vito ra wena a wu nga ha vuriwi Yakobo, kambe vito ra wena u ta va Israele”; sweswo xi n'wi thya vito ra Israele.

¹¹Kutani Xikwembu xi ku eka yena: “Hi mina Xikwembu xa matimba hinkwawo: tswalani, ma andza, tiko ni vunyingi bya matiko swi ta huma eka wena, ni tihosi ti ta huma enkaveni wa wena.

¹²Kutani tiko leri ndzi nga ri nyika Abrahama na Isaka, ndzi ta ku nyika rona, ndzi ri nyika ni vatukulu va wena, endzhaku ka wena.”

¹³Kutani Xikwembu xi tlhandluka, xi suka eka yena exivandleni xexo xi nga vulavula na yena eka xona.

¹⁴Yakobo a aka xitsundzuxo exivandleni xexo Xikwembu xi nga vulavula na yena eka xona, xi ri xitsundzuxo xa maribye, kutani a gandzela ehenhla ka xona, a chela ni mafurha ehenhla ka xona.

¹⁵Kutani Yakobo a thya xivandla xexo Xikwembu xi nga vulavula na yena eka xona, vito ra Betele (yindlu ya Xikwembu).

¹⁶Kavaloko va suka eBetele, ka hari mpfhukanyana ku ya fika eEfrata, Rahele a lava ku veleka, kambe ku veleka ku nonon'hwa;

¹⁷kakuloko ku veleka ku n'wi karhata, sungakati ri ku eka yena: “U nga chavi, hikuva u tlhela u tela hi n'wana wa wanuna.”

¹⁸Kakuloko a lave ku nyiketa moya, u nge o fa, a n'wi thya vito ra Benoni (n'wana wa ku vaviseka ka mina); kambe tata wakwe a n'wi thya vito ra Benjamini (n'wana wa voko ra xinene).

¹⁹Kavaloko Rahele a fa, a lahliwa endleleni ya Efrata, yi nga yona Betlehema.

²⁰Kutani Yakobo a aka xitsundzuxo ehenhla ka sirha ra yena; hi xona xitsundzuxo xa sirha ra Rahele, ninamuntlha xa ha ri kona.

²¹Israele a suka, a dzima mitsonga ya yena emahlweni ka Edere.

²²Kakuloko Israele a akile etikweni lero, Rhuveni a ya etlela na Biliha, nhlantswa ya mana wa yena; Israele a twa mhaka leyi.

²³Vana va Yakobo a va ri khume na vambirhi: vana va Leya: Rhuveni, n'wana wa Yakobo wa mativula, na Simiyoni, na Levhi, na Yuda, na Isakara, na Zebuloni.

²⁴Vana va Rahele: Yosefa na Benjamini.

²⁵Vana va Biliha, nhlantswa ya Rahele: Dani na Neftali.

²⁶Vana va Zilipa, nhlantswa ya Leya: Gadi na Asere. Hi vona lavo vana va Yakobo, lava nga velekeriwa ePadani-Aramu.

²⁷Kutani Yakobo a fika eka Isaka, tata wakwe, eMamre, emutini wa Kiriyata-Araba, ku nge Hebroni, laha Abrahama na Isaka va akeke kona.

²⁸Masiku ya Isaka a ma ri malembe ya 180.

²⁹Kutani Isaka a nyiketa moya, a fa, a rhurheliwa eka varikwavo, a dyuhele, a andzele hi masiku. Kutani Esawu na Yakobo, vana va yena, va n'wi lahla.