Read tsonga Genesa 37 Bible Online

Genesa 37 - tsonga bible

Genesa 37

¹Yakobo a a akile etikweni ra Kanana, leri tata wa yena ingi a luvele eka rona.

²Tinxaka ta Yakobo hi leti: Yosefa a a ri ni malembe ya 17, a ri karhi a risa swifuwana swin'we ni vamakwavo, kutani ndzisanyana leyo yi tolovelana ni vana va Biliha ni vana va Zilipa, vasati va tata wa yena; kambe Yosefa a hlevela tata wa vona ntwalo lowo biha wa vona.

³Kutani Israele a a rhandza Yosefa ku tlurisa vana va yena hinkwavo, hikuva a a ri n'wana wa ku dyuhala ka yena; a n'wi endlela nkhancu wa mavalavala.

⁴Kuteloko vamakwavo va vona leswaku tata wa vona u n'wi rhandza ku tlurisa vamakwavo hinkwavo, va n'wi venga, va nga vulavuri na yena hi ku tsaka.

⁵Kutani Yosefa a lorha norho, a byela vamakwavo, kutani va engeta ku n'wi venga ngopfungopfu.

⁶A ku eka vona: “Ma nga yingisela norho lowu ndzi wu lorheke.

⁷Ndzi lorhile hi tsimba tinyandza emasin'wini; kutani ndzi vona nyandza ya mina yi pfuka, yi yima, kutani ndzi vona tinyandza ta n'wina ti rhendzele nyandza ya mina exikarhi, ti khinsamela yona.”

⁸Vamakwavo va ku eka yena: “Xana u ri u ta fuma ehenhla ka hina xana, kumbe u ta tshama u hi risa xana?” Kutani va engeta ku n'wi venga ngopfungopfu hikwalaho ka milorho ya yena ni ku vulavula ka yena.

⁹Kambe a lorha norho wun'wana, a byela vamakwavo, a ku: “Swi voneni, ndzi engete ndzi lorha, ndzi vona dyambu ni n'weti ni tinyeleti ta khume na yin'we ti khinsamela emahlweni ka mina.”

¹⁰Kutani a byela tata wa yena ni vamakwavo; tata wa yena a n'wi laya, a ku eka yena: “Hi wihi norho lowo u wu lorheke xana? Kunene mina ni mana wa wena ni vamakwenu hi ta ta hi khinsama emahlweni ka wena xana?”

¹¹Kutani vamakwavo va n'wi xondzolota; kambe tata wakwe a anakanya timhaka teto, a ti hlayisa.

¹²Kutani vamakwavo va Yosefa va ya risa swifuwana swa tata wa vona eXikeme.

¹³Kavaloko Israele a ku eka Yosefa: “A ndzi ku vamakwenu va ye ku riseni eXikeme? Tana-ke, ndzi ku rhuma eka vona.”

¹⁴Yena a ku: “Hi mina loyi.” Kutani a ku eka yena: “Wa nga famba, u ya va languta, xana va ha tsakile swinene ni mitlhambi ya vona, u ta ndzi byela mahungu.” A n'wi rhumisa sweswo, kutani Yosefa a suka enkoveni wa Hebroni, a ya fika eXikeme.

¹⁵Kutani munhu a n'wi kuma a ri karhi a tsendzeleka etikweni; munhu yeloyi a n'wi vutisa, a ku: “U lava yini?”

¹⁶Yosefa a ku: “Ndzi lava vamakwerhu; wa nga ndzi byela laha va riselaka kona.”

¹⁷Munhu yeloyi a ku eka yena: “Va sukile la, hikuva ndzi va twile va ku: ‘A hi yeni eDotani.’ ” Yosefa a landza vamakwavo, a ya va kuma eDotani.

¹⁸Kuteloko va n'wi vona a ha ri ekule a nga si va ekusuhi, va n'wi kanelela ku n'wi dlaya.

¹⁹Va byelana, va ku: “Vonani, N'wa milorho hi loyi, wa ta,

²⁰tanani sweswi, hi n'wi dlaya, hi n'wi hoxa ekheleni ra xihlovo, hi ta ku: ‘U dlele hi xivandzana’; hi ta vona lomu milorho ya yena yi nga ta helela kona.”

²¹Kambe Rhuveni a swi twa, kutani a ta n'wi kutsula emavokweni ya vona, a ku: “Hi nga tshuki hi khumba vutomi bya yena.”

²²Rhuveni a engeta a ku eka vona: “Mi nga halateni ngati, kambe n'wi hoxeni ekheleni leri nga emananga, mi nga tshuki mi veka mavoko ehenhla ka yena.” A endlisa sweswo leswaku a ta n'wi susa emavokweni ya vona, a n'wi mukisa eka tata wa yena.

²³Kuteloko Yosefa a fikile eka vamakwavo, va n'wi hluvurisa nguvu ya yena, nkhancu lowu wa mavalavala a nga funengela wona.

²⁴Kutani va n'wi teka, va n'wi hoxa ekheleni; kambe khele rero a ri nga ri na nchumu, a ri nga ri na mati.

²⁵Kutani va tshamisa, va dya swakudya. Kuteloko va tlakusa mahlo ya vona, va languta, va vona pfhumba ra Vaiximaele leri humaka eGiliyadi ni tikamela ta vona, va velekise mirhi, ni balsama, ni ladano, va swi yisa eEgipta.

²⁶Kutani Yuda a ku eka vamakwavo: “Xana hi ta bindzula yini loko hi dlaya makwerhu, hi fihla ngati ya yena?

²⁷Tanani hi n'wi xavisa eka Vaiximaele, mavoko ya hina ma nga ti tshuka ma ve henhla ka yena, hikuva i makwerhu, i nyama ya hina.” Kutani vamakwavo va pfumela.

²⁸Kakuloko ku hundza vaxavi valavo, Vamidiyani, va koka Yosefa va n'wi humesa ekheleni, kutani va n'wi xavisa eka Vaiximaele hi mali yo basa ya makume mambirhi ya tixikele. Kutani valavo va famba na Yosefa eEgipta.

²⁹Kuteloko Rhuveni a tlhelela ekheleni, a kuma Yosefa a nga ha ri kona ekheleni.

³⁰Kutani a handzula tinguvu ta yena, a tlhelela eka vamakwavo, a ku: “N'wana a nga ha ri kona, mina ndzi ta ya kwihi xana?”

³¹Kavaloko va teka nguvu ya Yosefa, va tlhava xiphongonyana, va tota nguvu hi ngati;

³²kutani va rhumela nkhancu lowa mavalavala eka tata wa vona, va ku: “Hi kume xilo lexi; wanga tiva leswaku xana i nkhancu wa n'wana wa wena, kumbe a hi wona.”

³³Kutani Yakobo a wu tiva, a ku: “I nkhancu wa n'wananga! Xivandzana xi n'wi dyile! Yo! Yosefa, xi n'wi pfutlopfutlosile!”

³⁴Yakobo a handzula tinguvu ta yena, a titsimba hi saka lero khwaxa, a rila n'wana wa yena hi masiku layo tala.

³⁵Kutani vana va yena hinkwavo va xinuna ni va xisati va ta n'wi chavelela, kambe a ala ku chaveleriwa, a ku: “Ndzi ta xikela exivandleni xa va ku fa eka n'wananga, ndzi ri karhi ndzi rila.” Tata wa yena a n'wi rilela sweswo.

³⁶Kutani Vamidiyani va ya n'wi xavisa eEgipta eka Potifaro, ndhuna ya Faro, mutameri wa valanguteri.