Read tsonga Genesa 39 Bible Online

Genesa 39 - tsonga bible

Genesa 39

¹Kavaloko Yosefa a yisiwa eEgipta; kutani Potifaro, ndhuna ya Faro, mutameri wa valanguteri, wanuna wa le Egipta, a n'wi xava eka Vaiximaele, lava nga n'wi yisa kona.

²Kutani Yehovha a va na Yosefa; a a ri munhu wa nkateko; a tshama endlwini ya n'wini wa yena.

³Kutani n'wini wa yena a vona leswaku Yehovha a a ri na yena, ni leswaku hinkwaswo leswi a swi endlaka, Yehovha a a n'wi katekisela swona evokweni ra yena.

⁴Hi mukhuva wolowo, Yosefa a kuma tintswalo emahlweni ka yena hi ku n'wi tirhela; kutani n'wini wa yena a n'wi veka ku va muhlayisi wa yindlu ya yena, a veka evokweni ra yena hinkwaswo leswi i ngi a ri na swona.

⁵Kuteloko a n'wi vekile a va muhlayisi wa yindlu ya yena ni wa hinkwaswo leswi i ngi a ri na swona, Yehovha a katekisa yindlu ya Muegipta hikwalaho ka Yosefa: kutani ku katekisa ka Yehovha ku va hinkwako eka leswi i ngi a ri na swona endlwini ni le masin'wini.

⁶Kutani swilo hinkwaswo swa yena a swi siya emavokweni ya Yosefa, a nga ha tikarhati hi nchumu swa yena, loko swi nga ri swakudya leswi a swi dyaka ntsena. Kambe Yosefa a a ri ni nghohe leyo saseka, ni mombo lowunene.

⁷Endzhaku ka timhaka teto, nsati wa n'wini wa yena a languta Yosefa hi mahlo, a ku: “Etlela na mina.”

⁸Kambe a ala, a ku eka nsati wa n'wini wa yena: “Wa swi vona, n'wini wa mina a nga tikarhati hi leswi nga swa mina endlwini; hinkwaswo leswi a nga na swona, u swi vekile emavokweni ya mina;

⁹ku hava lonkulu eka mina la endlwini leyi; a nga ndzi aleri nchumu loko a nga ri wena, hikuva u nsati wa yena. Ndzi nga endlisa ku yini swo biha leswikulu swonghasi, ndzi dyohela Xikwembu xana?”

¹⁰Ni loko a ri karhi a vulavula na Yosefa hi masiku ni masiku, a nga n'wi yingisanga a ko a etlela na yena, ni loko ku ri ku va na yena.

¹¹Kambe siku rin'wana, kuteloko a yile endlwini ku ya tirha mitirho ya yena, ku nga ri na umbe wa vanhu va yindlu,

¹²lo wansati a n'wi khoma hi nguvu, a ku eka yena: “A hi etlele kun'we!” Kambe a siya nguvu ya yena emavokweni ya yena, a tsutsuma, a humela ehandle.

¹³Kuteloko a vona leswaku u siye nguvu ya yena emavokweni ya yena, a tsutsumela ehandle,

¹⁴a vitana vanhu va yindlu ya yena, a va byela, a ku: “Vonani, ku tisiwile eka hina wanuna wa Muheveru ku ta tlanga ha hina. U te eka mina a ku ndzi etlela na yena, kutani ndzi be huwa hi rito lerikulu;

¹⁵kuteloko a twa leswaku ndzi tlakusa rito, ndzi ba huwa, a siya nguvu ya yena eka mina, a tsutsuma a humela ehandle.”

¹⁶Kutani a hlayisa nguvu ya Yosefa ekusuhi na yena, nuna wa yena a kondza a vuya ekaya.

¹⁷A vulavula na yena hi marito lawa, a ku: “Wandzisanyana wa Muheveru, yeloyi u n'wi tiseke eka hina, u tile eka mina ku ta tlanga hi mina;

¹⁸ndzi te loko ndzi tlakusa rito, ndzi ku ndzi ba nkosi, a siya nguvu ya yena eka mina, a tsutsumela ehandle.”

¹⁹Kuteloko n'wini wa yena a twa marito ya nsati wa yena loko a ku: “Wandzisanyana wa wena u ndzi endle leswo karhi ni swo karhi”, ku kariha ka yena ku pfurha.

²⁰Kutani n'wini wa Yosefa a n'wi khoma, a n'wi hoxa endlwini ya khotso, exivandleni lexi lava bohiweke hi hosi va khotsiwaka eka xona; kutani a tshama kona ekhotsweni.

²¹Kambe Yehovha a va na Yosefa, a n'wi endla hi nsovo, a n'wi kumisa tintswalo emahlweni ka n'wini wa khotso.

²²Kutani n'wini wa khotso a nyiketa emavokweni ya Yosefa hinkwavo lava bohiweke lava ngi va ri ekhotsweni; ni hinkwaswo leswi nga endliwa kona, a a ri yena la swi endlaka.

²³N'wini wa khotso a a nga ha langutisi nchumu eka swilo hinkwaswo leswi ngi swi ri emavokweni ya Yosefa, hikuva Yehovha a a ri na yena; ni leswi a swi endlaka, Yehovha a a swi katekisa.