Read tsonga Genesa 50 Bible Online

Genesa 50 - tsonga bible

Genesa 50

¹Kavaloko Yosefa a tiwisa ehenhla ka mombo wa tata wa yena, a rila ehenhla ka yena, a n'wi ntswontswa.

²Yosefa a lerisa tin'anga leti n'wi tirhelaka ku phutsela ni ku tota tata wa yena; tin'anga ti phutsela Israele;

³ku hundza masiku ya mune wa makume, hikuva masiku ya ku phutsela ma endlisa sweswo; kutani Vaegipta va n'wi rila hi masiku ya 70.

⁴Kuteloko masiku ya nkosi wa yena ma hundzile, Yosefa a vulavula ni va yindlu ya Faro, a ku: “Kungakuloko ndzi kume tintswalo emahlweni ka n'wina, ma nga rhiyeketa tindleve ta Faro, mi ku:

⁵‘Tatana u ndzi hlambanyisele, a ku: Waswivo, ndza fa; u va u ndzi lahla esirheni ra mina leri ndzi tixaveleke rona etikweni ra Kanana; ndzi pfumeleleni sweswi, ndzi tlhandluka ndzi ya lahla tatana; ndzi ta tlhela ndzi vuya.’ ”

⁶Kutani Faro a ku: “Tlhandluka, u ya lahla tata wa wena, hilaha a ku hlambanyiseleke hakona.”

⁷Yosefa a tlhandluka, a ya lahla tata wa yena; kutani malandza hinkwawo ya Faro, vakulukumba va yindlu ya yena, ni vakulu hinkwavo va tiko ra Egipta, va tlhandluka na yena,

⁸swin'we ni va yindlu hinkwayo ya Yosefa, ni vamakwavo, ni va yindlu ya tata wa yena; va siya vana va vona, ni swifuwana, ni swifuwo swa vona ntsena etikweni ra Goxeni.

⁹Ku tlhandlukele tigolonyi na yena kun'we ni va tihanci; ri ri pfhumba lerikulu ngopfu.

¹⁰Va fika exivuyeni xa Atadi, lexi nga entsungeni wa Yordani, kutani va rila kona hi nhlomulo lowukulu, ni mikosi leyikulu; kutani Yosefa a tshamisela tata wa yena kona enkosini hi masiku ya ntlhanu na mambirhi.

¹¹Kutani vaaki va tiko lero, va nga Vakanana, kuteloko va vona mikosi exivuyeni xa Atadi, va ku: “Mikosi ya vona Vaegipta, hi leyikulu,” hikwalaho va thyaka xivuya lexi, Avele-Misrayimi (nkosi wa Vaegipta); xi le ntlhandlukweni wa Yordani.

¹²Vana va Yakobo va endla hi yena hilaha a va leriseke hakona.

¹³Vana va yena va n'wi yisa etikweni ra Kanana, va ya n'wi lahla ebakweni ra nsimu ya Makapela, leyo Abrahama ingi a yi xavile ka Efroni, wa Muhiti tlhelo ra vuxa ra Mamre, leswaku yi endla xilahlo xa masirha.

¹⁴Kuteloko Yosefa a lahlile tata wa yena, a tlhelela eEgipta, ni vamakwavo, ni hinkwavo lava nga famba na yena ku ya lahla tata wa yena.

¹⁵Kuteloko vamakwavo va Yosefa va vona leswaku tata wa vona u file, va byelana, va ku: “Kumbe Yosefa u ta hi venga, a hi rihisela swo biha hinkwaswo leswi hi tshamaka hi n'wi endla swona.”

¹⁶Va tivisa Yosefa, va ku: “Tata wa wena u tshama a vula, a nga si fa, a ku:

¹⁷‘Mi ta byela Yosefa, mi ku: Wa nga rivalela milandzu ya vamakwenu ni ku dyoha ka vona, hikuva va ku endlile swo biha,’ kambe sweswi, wa nga khomela malandza ya Xikwembu xa tata wa wena ku dyoha ka vona!” Kutani Yosefa a rila loko va vulavula na yena.

¹⁸Kambe vamakwavo va ta hi xiviri xa vona, va tiwisa emahlweni ka yena, va ku: “Waswivo, hi malandza ya wena!”

¹⁹Yosefa a ku eka vona: “Mi nga tshuki mi chava; ndzi nga tiveka ematshan'weni ya Xikwembu xana?

²⁰N'wina a mi anakanyile ku ndzi endla swo biha, kasi Xikwembu xi kanele vunene, leswaku xi ta endla leswi humeleleke sweswi, xi ta hanyisa tiko lerikulu.

²¹Sweswi, mi nga chaveni, ndzi ta mi fihluta ni vana va n'wina.” A va chavelerisa sweswo, a rhulisa ni timbilu ta vona.

²²Yosefa a a akile eEgipta, ni va yindlu ya tata wa yena; kutani Yosefa a hanya malembe ya dzana na khume rin'we.

²³A vona vana va Efrayimi ku yisa eka vatukulu va xikandzatsolo; ni vana va Makiri, n'wana Manase, na vona va velekiwile ematsolweni ya Yosefa.

²⁴Kutani Yosefa a ku eka vamakwavo: “Ndza fa; Xikwembu xi ta mi endzela kunene, xi ta mi humesa etikweni leri, xi mi yisa etikweni leri xi nga hlambanyela Abrahama, na Isaka, na Yakobo, leswaku xi ta va nyika rona.”

²⁵Yosefa a hlambanyisa vana va Israele, a ku: “Ndzi vurisile, Xikwembu xi ta mi endzela, emikarhini yeleyo mi ta susa marhambu ya mina kwala, mi famba na wona.”

²⁶Kavaloko Yosefa a fa, a ri ni malembe ya dzana na khume rin'we; va n'wi phutsela, va n'wi veka enkaxeni, le Egipta.