Read tsonga II Samuwele 10 Bible Online

II Samuwele 10 - tsonga bible

II Samuwele 10

¹Endzhaku ka sweswo, hosi ya vana va Amoni yi fa, kutani Hanunu, n'wana wa yena, a fuma ematshan'weni ya vona.

²Kutani Davhida a ku: “Ndzi ta kombisa tintswalo eka Hanunu, n'wana Nahaxi, kukotisa leswi tata wa yena a ndzi kombiseke tintswalo.” Kavaloko Davhida a rhuma malandza ya yena ma ya n'wi chavelela hikwalaho ka tata wa yena; kutani malandza ya Davhida ma fika etikweni ra vana va Amoni.

³Tindhuna ta vana va Amoni ti ku eka Hanunu, hosi ya tona: “Xana kunene Davhida u rhumile emahlweni ka wena vachaveleri ku dzunisa tata wa wena-ke? Xana a hi ku kamba muti, ni ku wu hlola, ni ku wu mbundzuxa, leswi Davhida a ku rhumeleke malandza ya yena xana?”

⁴Kutani Hanunu a teka malandza ya Davhida, a ma byewula malebvu hitlhelo, a xeka ni tinguvu ta vona hitlhelo ku fika ehansi ka swifungha, kutani a va tlherisa.

⁵Sweswo va yisa mahungu eka Davhida, kutani a rhuma vanhu va ya hlangana na vona, hikuva vanhu lava a va sandziwile ngopfu; kutani hosi yi ku eka vona: “Tshamani eYeriko, malebvu ya n'wina ma ko ma mila, hi kona mi nga ta vuya.”

⁶Kambe vana va Amoni va vona leswaku va tiendlile lava vengiwaka eka Davhida, kutani vana va Amoni va rhuma, va ya rhamba vanhu va 20 000 Vasiriya va Beta-Rehobo, ni Vasiriya va Soba; ni hosi ya Maaka leyi ngi yi ri ni vanhu va 1 000; ni va ka Toba, va ri va 12 000.

⁷Kuteloko Davhida a swi twa, a rhuma Yowabu ni nyimpi hinkwayo, ti ri tinhenha.

⁸Kutani vana va Amoni va huma va tilunghisile ku lwa enyangweni; kambe Vasiriya va Soba ni va Rehobo, ni va Toba, ni va Maaka a va yima etlhelweni, emasin'wini.

⁹Kuteloko Yowabu a vonile leswaku tinyimpi a ti ri kona emahlweni ka yena ni ndzhaku ka yena, a hlawula vavanuna lavo tiya exikarhi ka tinhenha hinkwato ta Israele, kutani a va rhuma ku ya hlangana ni Vasiriya;

¹⁰lava seleke va tiko, a va vekela emavokweni ya Abixayi makwavo, ku ta lwa ni vana va Amoni.

¹¹Kutani a ku eka yena: “Loko Vasiriya va ndzi hlula, u ta ndzi ponisa, kambe loko vana va Amoni va ku hlula, ndzi ta ku ponisa.

¹²U va ni matimba, kambe a hi tiyeleni eka tiko ra hina ni le ka miti ya Xikwembu xa hina; kambe Yehovha a a endle leswi lulameke emahlweni ka yena!”

¹³Kutani Yowabu ni tiko leri ngi a ri na rona, a tshinela emahlweni ku ya lwa ni Vasiriya, kambe vona va baleka emahlweni ka yena.

¹⁴Vana va Amoni, kuteloko va vonile Vasiriya va baleka, na vona va baleka emahlweni ka Abixayi, va tlhelela emutini. Kavaloko Yowabu a tlhela eku lweni ni vana va Amoni, a muka eYerusalema.

¹⁵Vasiriya, kuteloko va vonile ku hluriwa ka vona emahlweni ka Israele va hlengeletana hinkwavo;

¹⁶kutani Hadadi-Esere a rhuma vanhu va ya vitana Vasiriya lava nga ehase ka nambu, kutani va ta eHelama, va ri ni hosi ya vona, Xobaki, ndhuna ya nyimpi ya Hadadi-Esere.

¹⁷Timhaka leti ti yisiwa eka Davhida, kutani a hlengeleta Vaisraele hinkwavo, a pela Yordani, a ya fika eHelama; kavaloko Vasiriya va tilunghisa ku ya hlangana na Davhida, kutani va lwa na yena.

¹⁸Vasiriya va tsutsuma emahlweni ka Israele, kutani Davhida a dlaya swipani swa tigolonyi swa madzana ya ntlhanu na mambirhi swa Vasiriya, ni vakhandziyi va tihanci va 40 000; a tlhava na Xobaki ndhuna ya nyimpi a fa kona.

¹⁹Tihosi hinkwato le ti fumiwaka hi Hadadi-Esere ti vona leswaku ti hluriwile emahlweni ka Israele, kutani ti kombela ku rhula eka Vaisraele, kambe ti fumiwa hi vona; kutani Vasiriya va chava ku pfuna kambe vana va Amoni.