Read tsonga II Samuwele 13 Bible Online

II Samuwele 13 - tsonga bible

II Samuwele 13

¹Endzhaku ka sweswo, Abixalomu, n'wana Davhida, a a ri ni makwavo wa wanhwana la sasekeke; vito ra yena a a ri Tamari, kutani Aminoni, n'wana Davhida, a n'wi rhandza.

²Aminoni a xaniseka a ko a vabya hikwalaho ka Tamari, makwavo, hikuva a a nga si tivana ni wanuna, kutani a swi nonon'hwa ngopfu emahlweni ka Aminoni ku n'wi endla nchumu.

³Aminoni a a ri ni nakulobye, vito ra yena a a ri Yonadabu, n'wana Ximeya, makwa Davhida, kambe Yonadabu a a ri munhu wa ku tlhariha ngopfu.

⁴A ku eka yena: “U ondzela yini-ke siku rin'wana ni rin'wana ku tlurisa, wena, n'wana hosi? Xana a u nga ndzi byeri xana?” Aminoni a ku eka yena: “Ndzi rhandza Tamari, makwa Abixalomu, makwerhu.”

⁵Kutani Yonadabu a ku eka yena: “Famba u tilata elawini ra wena, u endla swange wa vabya, kutani kutakuloko tata wa wena a ta ku ku vona, u ta ku eka yena: ‘U nga pfumelela Tamari, makwerhu, a ta ndzi phamela swakudya: U ta sweka swakudya emahlweni ka mina, ndzi n'wi vona, kutani ndzi ta swi amukela evokweni ra yena.’ ”

⁶Sweswo Aminoni a ya etlela, a endla swange wa vabya, kutani hosi yi ya n'wi vona. Aminoni a ku eka hosi: “U nga pfumelela Tamari, makwerhu, a ta ndzi swekela swinkwa swimbirhi emahlweni ka mina, ndzi ta swi dya evokweni ra yena.”

⁷Kutani Davhida a rhuma va ya byela Tamari endlwini, va ku: “Famba endlwini ya Aminoni, makwenu, u ta n'wi lunghisela swakudya.”

⁸Kavaloko Tamari a ya endlwini ya Aminoni, makwavo la etleleke; a teka mbila a yi pfuva, a endla swinkwa emahlweni ka yena, kutani a sweka swinkwa;

⁹a teka ni pani a swi phama emahlweni ka yena; kambe a ala ku dya. Kutani Aminoni a ku: “Humesani vanhu hinkwavo lava nga ekusuhi na mina.” Sweswo lava nga endlwini ya yena va huma hinkwavo.

¹⁰Kutani Aminoni a ku eka Tamari: “Tisa swakudya ekamareni, hi kona ndzi nga ta dya evokweni ra wena.” Kutani Tamari a teka swinkwa leswi a swi endleke, a swi neha eka Animoni, makwavo, ekamareni.

¹¹Kakuloko a n'wi phamela swakudya, a n'wi khoma, a ku eka yena: “Tana makwerhu, u etlela na mina.”

¹²Yena a n'wi hlamula, a ku: “A hi swona, makwerhu, u nga ndzi khomisi tingana hikuva swi nga ka swi nga endleki eIsraeleni; u nga tshuki u endla manyala lawa.

¹³Na mina ndzi ta ya rhwala kwihi tingana ta mina xana? Loko u ri wena u ta fana ni un'wana wa manyala eIsraeleni. Sweswi vulavula na hosi, kutani a nga ka a nga ndzi arisi eka wena.”

¹⁴Kambe a nga rhandzanga ku yingisa rito ra yena, kutani a n'wi hlula hi matimba, a n'wi khomisa tingana, a etlela na yena.

¹⁵Kutani Aminoni a n'wi venga hi ku venga lokukulu, hikuva rivengo ra yena a ri tlula rirhandzu leri a n'wi rhandzeke ha rona. Kutani Animoni a ku eka yena: “Suka u famba!”

¹⁶A hlamula, a ku eka yena: “U nga endli xo biha lexi tlulaka xin'wana lexi u ndzi endleleke xona, hi ku ndzi hlongola.”

¹⁷Kambe a ala ku n'wi yingisa, kutani a vitana nandza loyi a n'wi tirhelaka, a ku eka yena: “Hlongolani nsati loyi ekule na mina, u pfala rivanti hi mpfungura endzhaku ka yena.”

¹⁸Kambe a a ri ni nguvu ya mavalavala, hikuva vana va vanhwana va hosi a va ambala tinguvu teto. Kutani loyi a tirhelaka Aminoni a n'wi humesa ehandle, a lotlela rivanti endzhaku ka yena.

¹⁹Kavaloko Tamari a teka nkuma a wu hoxa enhlokweni ya yena, a handzula nguvu ya mavalavala leyi a yi ambaleke, a tlakusa voko enhlokweni ya yena, a suka a famba, a ri karhi a huwelela.

²⁰Kutani Abixalomu, makwavo, a ku eka yena: “Aminoni, makwenu, u tshamile na wena xana? Sweswi miyela, makwerhu: i makwenu; u nga tivavisi mbilu hi mhaka leyi.” Kambe Tamari a tshama endlwini ya Abixalomu, makwavo, a ri enhlomulweni.

²¹Hosi Davhida, kuteloko a twile timhaka hinkwato leti, a kariha ngopfu.

²²Kambe Abixalomu a a nga vulavuli na Aminoni leswo biha hambi swi ri leswo saseka;

²³hikuva Abixalomu a a venga Aminoni, hikuva a onhile Tamari, makwavo. Kuteloko ku hundzile malembe mambirhi, Abixalomu a a ri ni vatsemeri emutini wa Baala-Hazoro, lowu nga ekusuhi na Efrayimi; kutani Abixalomu a vitana vana va hosi hinkwavo.

²⁴Abixalomu a ya eka hosi, a ku: “Waswivo, nandza wa wena u ni vatsemeri, ndzi kombela hosi ni malandza ya yena leswaku va ta eka nandza wa wena.”

²⁵Hosi yi ku eka Abixalomu: “E-e, n'wananga; hi nga ka hi nga yi hinkwerhu leswaku hi nga tshuki hi ku tikela.” A n'wi sindzisa, kambe Davhida a ala ku ya kutani a n'wi katekisa.

²⁶Abixalomu a ku: “Kambe makwerhu Aminoni ntsena a a te na hina.” Hosi yi ku eka yena: “U ta fambela yini na wena xana?”

²⁷Kambe Abixalomu a n'wi sindzisa, kutani a rhuma Aminoni, ni vana hinkwavo va hosi va famba na yena.

²⁸Abixalomu a lerisa malandza ya yena, a ku: “Xiyani swinene, kutakuloko mbilu ya Aminoni yi tsakisiwa hi vhinyo, ni loko ndzi ku eka n'wina: ‘Dlayani Aminoni!’ Mi ta n'wi dlaya, mi nga chavi, a ndzi mi lerisanga sweswo xana? Tiyani timbilu, mi va tinhenha!”

²⁹Kavaloko malandza ya Abixalomu ma endlela Aminoni hilaha Abixalomu a leriseke hakona; kutani vana va hosi hinkwavo va pfuka, va khandziya un'wana ni un'wana mula ya yena, va tsutsuma.

³⁰Kakuloko va ha ri endleleni, mpfumawulo wu ya fika eka Davhida, va ku: “Abixalomu u dlayile vana hinkwavo va hosi, a ku salanga na un'we.”

³¹Kutani hosi yi pfuka, yi handzula tinguvu ta yona, yi tilata ehansi, ni malandza hinkwawo ya yona ma yima la, tinguvu ta wona ti handzuriwile.

³²Kutani Yonadabu, n'wana Ximeya, makwa Davhida, a vulavula, a ku: “Hosi yanga yi nga tshuki yi vula, yi ku: ‘Va dlayile majaha hinkwawo, vana va hosi,’ hikuva i Aminoni ntsena a feke, hikuva nomu wa Abixalomu wu swi tiyisile, siku Aminoni a nga onha Tamari, makwavo.

³³Sweswi hosi, n'wini wanga, a nga tshuki a vaviseka embilwini hi mhaka leyi, a ku: ‘Vana va hosi va file hinkwavo,’ hikuva i Aminoni ntsena a feke.”

³⁴Kambe Abixalomu a a balekile. Kutani jaha leri nga vekiwa mulanguteri ri tlakusa mahlo ri languta, kutani waswivo, vanhu lavo tala a va ta hi ndlela ya le muhosi, tlhelo ra ntshava.

³⁵Yonadabu a ku eka hosi: “Vana va hosi hi lava va fikaka, tani hi leswi nga vuriwa hi nandza wa wena.”

³⁶Kakuloko a ha heta ku vulavula, vana va hosi va fika, kutani va tlakusa marito va rila; na yona hosi ni malandza ya yona hinkwawo va rila, va endla nkosi lowukulu ngopfu.

³⁷Kambe Abixalomu a baleka, a ya eka Talimayi, n'wana Amihudi, hosi ya Gexuri. Kutani Davhida a a rila n'wana wa yena hi masiku hinkwawo.

³⁸Sweswo Abixalomu a baleka, a ya eGexuri, a tshama kona malembe manharhu.

³⁹Kutani hosi Davhida a tshika ku landzelela Abixalomu, hikuva a a chaveleriwile hikwalaho ka rifu ra Aminoni.