Read tsonga II Samuwele 15 Bible Online

II Samuwele 15 - tsonga bible

II Samuwele 15

¹Endzhaku ka sweswo, Abixalomu a tilavela tigolonyi ni tihanci, ni vavanuna va ntlhanu wa makume lava tsutsumaka emahlweni ka yena.

²Abixalomu a a pfuka nimixo, a yima ekusuhi ni ndlela ya nyangwa; kutani munhu un'wana ni un'wana la ngi a ri ni mhaka leyi n'wi yisaka ehosini ku ta avanyisiwa, Abixalomu a a n'wi vita, a ku: “U huma emutini wihi xana?” Yena a ku: “Nandza wa wena u huma eka yin'wana ya tinyimba ta Israele.”

³Kutani Abixalomu a a ku eka yena: “Vona, mhaka ya wena yi nene, yi lulamile, kambe a ku na munhu la nga ku yingisaka wa le hosini.”

⁴Abixalomu a engeta, a ku: “A a ndzi vekiwe muavanyisi etikweni! Munhu un'wana ni un'wana la nga ni mhaka ya ku tenga hambi ya ku tengisana a ta ta eka mina, ndzi ta lulamisa ta yena!”

⁵Kutani kakuloko munhu a a tshinela ku ta n'wi khinsamela, a tshambuluta voko a n'wi khoma hi voko, a n'wi ntswontswa.

⁶Abixalomu a tshama a endlisa sweswo eka hinkwavo va Israele lava taka ehosini ku ta avanyisiwa; sweswo Abixalomu a a yiva timbilu ta vanhu va Israele.

⁷Kuteloko ku hundzile malembe ya mune, Abixalomu a ku eka hosi: “Ndzi pfumelele ku ya eHebroni, ndzi ya hetisa leswi ndzi tiboheleke swona eka Yehovha hi ku hlambanya,

⁸hikuva nandza wa wena u tibohile loko ndza ha tshama eGexuri, eSiriya, ndzi te: ‘Kungakuloko Yehovha a ndzi vuyisela eYerusalema, ndzi ta tirhela Yehovha.’ ”

⁹Kutani hosi yi ku eka yena: “Famba hi ku rhula.” Kavaloko a pfuka, a ya eHebroni.

¹⁰Kambe Abixalomu a rhuma tinhlori etinyimbeni hinkwato ta Israele, ti ku: “Kutakuloko mi twa mpfumawulo wa nanga, mi ta ku: ‘Abixalomu u fuma eHebroni.’ ”

¹¹Vanhu va Yerusalema, lava vitaniweke va madzana mambirhi va famba na Abixalomu, a va famba ntsena va nga tivanga nchumu.

¹²Kakuloko Abixalomu a humesa magandzelo, a rhuma vanhu va ya lava Ahitofele, wa le Gilo: ndhuna ya Davhida, a a ri emutini wa rikwavo eGilo; kutani makungu ya lava yimeleke Abixalomu ma tiya, ni vanhu lava n'wi landzaka va engeteleka.

¹³Kavaloko munhu a fika eka Davhida a n'wi vikela timhaka teto, a ku: “Timbilu ta vanhu va Israele ti landza Abixalomu.”

¹⁴Kutani Davhida a ku eka malandza hinkwawo ya yena lawa ngi ma ri na yena eYerusalema: “Pfukani hi tsutsuma, hikuva hi nga ka hi nga kumi laha hi nga ta pona emahlweni ka Abixalomu. Hatlisani mi suka, hikuva a nga hatlisa a hi kuma, a ta hi nghenisa ekhombyeni, a ta onha muti hi vukari bya tlhari.”

¹⁵Malandza ya hosi ma ku eka hosi: “Malandza ya wena ma ta endla hinkwaswo leswi u nga ta swi rhandza.”

¹⁶Kutani hosi yi huma, yi landziwa hi yindlu hinkwayo ya yona, kambe hosi yi siya vavasati lavatsongo va yona va khume ku hlayisa yindlu.

¹⁷Sweswo hosi yi huma, yi landziwa hi tiko hinkwaro va ya yima eBeta-Merkaka.

¹⁸Kutani malandza hinkwawo ya yona ma famba ematlhelweni ka yona, swin'we ni Vakereti ni Vapeleti; ni Vagiti, va ri vanhu va ntlhanu wa madzana na dzana rin'we va sukile eGati va n'wi landza kutani va famba emahlweni ka hosi.

¹⁹Kutani hosi yi ku eka Itayi wa Gati: “U ta fambela yini na hina xana? Tlhela u muka, u ya tshama ni hosi, hikuva u muluveri, kambe u ta tlhelela ekarikwenu.

²⁰U fikile tolo, kutani namuntlha ndzi ta ku rhendzelekisa hinkwako na hina xana? Loko ndzi ri mina, ndzi ya laha ndzi nga ta ya kona. Tlhela u muka, u teka vamakwenu na wena. Tintswalo ni ntiyiso a swi ve na wena!”

²¹Itayi a hlamula a ku eka hosi: “Yehovha wa hanya, ni hosi n'wini wanga, wa hanya, leswaku laha hosi, n'wini wa mina, a nga ta va kona, hambi ku ri eku feni, hambi ku ri eku hanyeni, nandza wa wena u ta va kona.”

²²Kavaloko Davhida a ku eka Itayi: “Suka hi famba!” Kutani Itayi, wa Gati a hundza ni vanhu hinkwavo va yena, ni vana hinkwavo lava ngi va ri na yena.

²³Tiko hinkwaro a ri tshama ri rila ri kolola, kambe tiko hinkwaro a ri hundza; kutani hosi yi pela nambu wa Kedroni, ni tiko hinkwaro ri pela laha ku langutaneke ni ndlela leyi yisaka emananga.

²⁴Sadoki ni Valevhi hinkwavo a va famba na yena, va rhwele areka ya ntwanano wa Xikwembu; kutani va veka areka ya Xikwembu ehansi, vanhu va ko va hela ku huma emutini; na yena Abiyatara a tlhandluka.

²⁵Kutani hosi yi ku eka Sadoki: “Tlherisa areka ya Xikwembu emutini; kungakuloko Yehovha a ndzi twela vusiwana, u ta ndzi vuyisa, a ndzi kombisa yona ni yindlu ya yona.

²⁶Kambe loko a ku: ‘A ndzi titsakeli ha wena,’

²⁷hi mina loyi, a a ndzi endle hilaha a swi rhandzaka hakona.” Hosi yi engeta yi ku eka Sadoki, muprista: “A hi wena muvoni xana? Tlhela hi ku tsaka emutini, na Ahimaasi, n'wana wa wena, na Yonatani, n'wana Abiyatara vana va n'wina havambirhi.

²⁸Langutani, ndzi ta tshama emananga rito rin'wana ra n'wina ri ko ri ndzi fikela ku ndzi letela.”

²⁹Kutani Sadoki na Abiyatara va tlherisa areka ya Xikwembu eYerusalema, va tshama kona.

³⁰Kutani Davhida a a tlhandluka ntshava ya mitlhwari, a ri karhi a rila; nhloko ya yena yi funengetiwile, a famba a nga ri na tintanghu emilengeni; kutani vanhu hinkwavo va tiko lava ngi va ri na yena a va tifunengeta tinhloko va rila loko va ri karhi va tlhandluka.

³¹Kutani va ya byela Davhida, va ku: “Ahitofele u nghenile eka vanhu lava yimaka na Abixalomu.” Kutani Davhida a ku: “Yehovha, wanga hundzuluxa makungu ya Ahitofele!”

³²Davhida a ha ku fika enhlohlorhini laha va khinsamaka emahlweni ka Xikwembu, loko Huxayi wa Muariki a ta bakana na yena nguvu ya yena yi handzuriwile, ni misava yi ri enhlokweni ya yena.

³³Davhida a ku eka yena: “Loko u famba na mina u ta ndzi tikela,

³⁴kambe loko u tlhelela emutini, u ya tivula eka Abixalomu, u ku: ‘Wee hosi, ndzi nandza wa wena! Khale a ndzi ri nandza wa tata wa wena, kambe sweswi ndzi nandza wa wena,’ sweswo u ta hlanhla makungu ya Ahitofele.

³⁵Sadoki na Abiyatara, vaprista a va nga vi na wena xana? Hinkwaswo leswi u nga ta swi yingisa endlwini ya hosi, u ta byela Sadoki na Abiyatara, vaprista.

³⁶Waswivo, vana va vona havambirhi va kona na vona, Ahimaasi n'wana Sadoki, na Yonatani, n'wana Abiyatara; mi ta ndzi rhumela hi vona hinkwaswo leswi mi nga ta swi yingisa.”

³⁷Kutani Huxayi, nakulobye wa Davhida, a nghena emutini; na yena Abixalomu a nghena eYerusalema.