Read tsonga II Samuwele 21 Bible Online

II Samuwele 21 - tsonga bible

II Samuwele 21

¹Emikarhini ya Davhida a ku ri ni ndlala ya malembe manharhu; lembe ri landza lembekulobye; Davhida a lava mombo wa Yehovha, kutani Yehovha a ku: “Hikwalaho ka Sawulo ni ka yindlu ya ngati, hikuva u dlayile va Gibiyoni.”

²Kutani hosi yi vitana va Gibiyoni, yi ku eka vona. (Va Gibiyoni a va nga ri va vana va Israele, kambe a va ri lava seleke va Vaamori kutani vana va Israele a va tibohile eka vona hi ku hlambanya, kambe Sawulo a a lavile ku va dlaya hi ku hisekela vana va Israele ni va Yuda.) Sweswo Davhida a ku eka va Gibiyoni:

³“Ndzi ta mi endlela yini, ndzi ta endla mhamba ha yini, leswaku mi ta katekisa ndzhaka ya Yehovha xana?”

⁴Va Gibiyoni va ku eka yena: “A hi mhaka ya mali kumbe ya nsuku exikarhi ka hina na Sawulo ni yindlu ya yena kambe a hi mhaka ya hina ku dlaya munhu eIsraeleni.” Yena a ku: “Leswi mi nga ta swi vula, ndzi ta mi endlela swona.”

⁵Kutani va ku eka hosi: “Munhu loyi, la nga hi heta, la nga tivekela makungu ku ta hi dlaya leswaku hi nga ha tivi ku hanya emindzilekaneni hinkwayo ya Israele;

⁶hi nyikeni vanhu va ntlhanu na vambirhi exikarhi ka vana va yena hi ta va hayeka emahlweni ya Yehovha, eGibeya wa Sawulo, muhlawuriwa wa Yehovha.” Kutani hosi yi ku: “Ndzi ta mi nyiketa vona.”

⁷Hosi yi tsetselela Mefiboxete n'wana Yonatani n'wana Sawulo, hikwalaho ka ku hlambanya ka Yehovha loku ngi ku ri exikarhi ka vona, exikarhi ka Davhida na Yonatani, n'wana Sawulo.

⁸Sweswo hosi yi teka Arimoni na Mefiboxete, vana lavambirhi va Risipa, n'wana wa wansati wa Aya, lava a va velekeleke Sawulo, ni vana va xinuna va ntlhanu va Mikala, n'wana Sawulo, lava a va velekeleke Adriele, n'wana Barizilayi, wa Mehola,

⁹kutani a va nyiketa emavokweni ya va Gibiyoni; vona va va hayeka entshaveni emahlweni ka Yehovha; lava ntlhanu na vambirhi va fa swin'we. Va dlawa emasikwini layo rhanga ya ku tshovela, eku sunguleni ka ku tshovela ka barley.

¹⁰Risipa, n'wana Aya, a teka nguvu yo khwaxa, a yi aneka eribyeni lerikulu, ku suka eku sunguleni ka ku tshovela, ku fika nkarhi lowu mati ya matilo ma va wela ehenhla; a nga pfumelelanga nyanyana ya matilo yi ta tshama ehenhla ka vona ninhlekanhi, kumbe xiharhi xa nhova nivusiku.

¹¹Va ya vikela Davhida leswi endliweke hi Risipa, n'wana Aya, nsati lontsongo wa Sawulo.

¹²Kutani Davhida a ya teka marhambu ya Sawulo ni marhambu ya Yonatani, n'wana wa yena eka vini va Yabexe wa Giliyadi, lava yiveke wona erivaleni ra Beta-Xani, laha Vafilista va va hayekeke kona siku Vafilista va nga hlula Sawulo eGilibowa.

¹³A teka kona marhambu ya Sawulo, ni marhambu ya Yonatani, n'wana wa yena, va hlayisa ni marhambu ya lava hayekiweke,

¹⁴kutani va lahla marhambu ya Sawulo ni ya Yonatani, n'wana wa yena etikweni ra Benjamini, eSela esirheni ra Kixi, tata wa yena. Va endla hinkwaswo leswi lerisiweke hi hosi; kutani Xikwembu xi tsetselela tiko.

¹⁵Vafilista va engeta va pfuka Vaisraele. Kutani Davhida a ngirimela a ri ni malandza ya yena, va lwa ni Vafilista; kambe Davhida a karhala.

¹⁶Kavaloko Yixibi wa Nobo, a nga un'wana wa vana va Rafa, la ngi a ri ni tlhari leri nsimbhi ya rona yi ringanaka tixikele ta madzana manharhu ya koporo exikalweni, a ambele ni xisirhelo xa nsimbhi lexintshwa, a anakanya ku tlhava Davhida.

¹⁷Kambe Abixayi, n'wana Seruya a n'wi ponisa, a tlhava Mufilista a n'wi dlaya; kavaloko vanhu va Davhida va n'wi hlambanyela, va ku: “U nga ka u nga ha humi na hina enyimpini, u nga tshuki u tima rivoni ra Israele.”

¹⁸Endzhaku ka sweswo, ku lwa a ku ri kona kambe ni Vafilista eGobo, Kavaloko Sibekayi, wa Huxa, a dlaya Safu, un'wanyana wa vana va Rafa.

¹⁹Ku lwa a ku ri kona kambe eGobo, ni Vafilista. Elihanani, n'wana Yaare-Oregimi, wa Betlehema, a dlaya Goliyadi wa Gati, la ngi a ri ni tlhari leri mbhingo wa rona wu ringanaka ni mhandze ya valuki.

²⁰Ku lwa a ku ri kona kambe eGati. Munhu wa ku leha a a ri kona, a ri ni tintiho ta ntlhanu na rin'we emavokweni, ni swikunwana swa ntlhanu na xin'we emilengeni, swi ri makume mambirhi na mune loko swi hlayiwa hinkwaswo; na yena a a tswariwile hi Rafa.

²¹Kakuloko a rhukana Israele, Yonatani, n'wana Ximeya makwa Davhida, a n'wi dlaya.

²²La va mune a va tswariwile hi Rafa eGati; kutani va dlawa hi voko ra Davhida, ni voko ra malandza ya yena.