Read tsonga II Samuwele 3 Bible Online

II Samuwele 3 - tsonga bible

II Samuwele 3

¹Ku lwa ku va kona enkarhini lowo leha exikarhi ka yindlu ya Sawulo ni yindlu ya Davhida, kutani Davhida a a tinyiketa matimba, kambe yindlu ya Sawulo a yi ri karhi yi tsana.

²Vana va xinuna va velekeriwe Davhida eHebroni: mativula ya yena i Aminoni, wa Ahinowama wa Yizriele;

³wa vumbirhi, Kileyabu, wa Abigayele nkata Nabala, wa Karmele; wa vunharhu, Abixalomu, n'wana Maaka, n'wana Talimayi, hosi ya Gexuri;

⁴wa vumune, Adoniya, n'wana Hagiti; wa vuntlhanu, Xefatiya, n'wana Abitali;

⁵wa ntlhanu na un'we, Yitereyamu, n'wana Egila, nkata Davhida. Hi vona lava velekeriweke Davhida eHebroni.

⁶Kakuloko ku lwa ku ri kona exikarhi ka yindlu ya Sawulo ni yindlu ya Davhida, Abinere a tiyela eka yindlu ya Sawulo.

⁷Kambe a ku ri ni nsati lontsongo wa Sawulo, vito ra yena a a ri Risipa, n'wana Aya; kutani Ixi-Boxete a ku eka Abinere: “U nghenise ku yini eka nsati wa tatana xana?”

⁸Kutani Abinere a kariha ngopfu hikwalaho ka marito ya Ixi-Boxete; a ku: “Xana ndzi nhloko ya mbyana ya Yuda xana? Namuntlha ndzi endla hi tintswalo ni yindlu ya Sawulo, tata wa wena, ni vamakwavo, ni vanakulobye va yena, kambe a ndzi ku nyiketangi emavokweni ya Davhida; kutani namuntlha u ndzi vekela nandzu wa nsati loyi!

⁹Xikwembu a xi endle hi matimba ni ku engetela eka Abinere! Kunene hi laha Xikwembu xi hlambanyeleke Davhida hakona, ndzi ta n'wi endlela sweswo,

¹⁰ndzi ta tiyisa xiluvelo xa Davhida ehenhla ka Israele ni le henhla ka Yuda, ku suka eDani ku fika eBerexeba.”

¹¹Kutani Ixi-Boxete a nga kotanga ku hlamula rito ni rin'we eka Abinere, hikuva a a n'wi chava.

¹²Kutani Abinere a rhuma tintsumi eka Davhida, a ku: “Tiko i ra mani xana?” A engeta a ku: “Endla xinakulobye na mina, kutani voko ra mina ri ta va na wena ku hundzuluxela eka wena Vaisraele hinkwavo.”

¹³Davhida a hlamula, a ku: “Hi swona, ndzi ta endla xinakulobye na wena; ndzi kombela xilo xin'we ntsena eka wena, ndzi ri: U nga ka u nga voni mombo wa mina loko u nga si ndzi tisela Mikala, n'wana Sawulo, siku u taka ku ndzi vona.”

¹⁴Kavaloko Davhida a rhumela Ixi-Boxete, n'wana Sawulo tintsumi, a ku: “Ndzi nyike nsati wanga Mikala loyi ndzi n'wi lovoleke hi misuvu ya dzana ya Vafilista.”

¹⁵Kutani Ixi-Boxete a rhuma vanhu va ya n'wi teka eka nuna wa yena, eka Palatiele, n'wana Layixi.

¹⁶Nuna wa yena a ta na yena, a n'wi landza a ri karhi a rila ku fika eBahurimi; kutani Abinere a ku eka yena: “Tlhela u muka!” Kavaloko a muka.

¹⁷Abinere a vulavula ni vakulukumba va Israele, a ku: “Tolo ni le tolweni a mi lava Davhida leswaku a va hosi ya n'wina;

¹⁸swi endleni sweswi, hikuva Yehovha u vurisile ehenhla ka Davhida u te: ‘Hi voko ra Davhida, nandza wa mina, ndzi ta ponisa tiko ra mina ra Israele emavokweni ya Vafilista ni le mavokweni ya valala va yena hinkwavo.’ ”

¹⁹Abinere a vulavula ni le tindleveni ta Benjamini, kutani a ya byela ni le tindleveni ta Davhida, eHebroni, timhaka hinkwato leti sasekeke emahlweni ka Israele, ni le mahlweni ka yindlu hinkwayo ya Benjamini.

²⁰Kavaloko Abinere a ta eka Davhida eHebroni, a ri ni vanhu va makume mambirhi kutani Davhida a endlela Abinere ni vanhu lava ingi a ri na vona xifihlulo.

²¹Kavaloko Abinere a ku eka Davhida: “Ndzi ta pfuka, ndzi ya hlengeleta Vaisraele hinkwavo eka hosi, mufumi wa mina; va ta endla xinakulobye na wena, kutani u ta fuma hinkwako laha mbilu ya wena yi ku navelaka.” Kavaloko Davhida a lelana na Abinere, kutani yena a famba hi ku tsaka.

²²Kutani waswivo, malandza ya Davhida, ni ya Yowabu, a ma ri karhi ma vuya enyimpini, a ma tisa xuma lexikulu; kambe Abinere a nga ha vanga na Davhida eHebroni, hikuva a a n'wi tlherisile kutani a fambile hi ku tsaka.

²³Yowabu a fika ni nyimpi hinkwayo leyi ngi yi ri na yena, kutani va ya byela Yowabu, va ku: “Abinere n'wana Neri, u tile eka hosi, kutani u yi lerile, kutani u fambile hi ku tsaka.”

²⁴Kavaloko Yowabu a ta ehosini, a ku: “U endle yini xana? Waswivo, Abinere u tile eka wena! U n'wi tlherisele yini, a famba hi ku tsaka?

²⁵Wa tiva Abinere, n'wana Neri; u tile eka wena ku ku kanganyisa, ni ku tiva ku huma ka wena ni ku nghena ka wena, ni ku tivisisa hinkwaswo leswi u swi endlaka.”

²⁶Kavaloko Yowabu a huma eka Davhida, kutani a rhuma vanhu va landza Abinere, va n'wi tlherisa a ri exihlobyeni xa Sira; yena Davhida a a nga swi tivi.

²⁷Kuteloko Abinere a vuyile eHebroni, Yowabu a n'wi vitana hitlhelo enyangweni ku vulavula na yena khwatsi; kavaloko a n'wi tlhava khwiri, a fa, ku ri hikwalaho ka ngati ya makwavo Asahele.

²⁸Davhida a swi twa ndzhaku, kutani a ku: “A ndzi na nandzu wa ngati ya Abinere n'wana Neri, mina, ni vuhosi bya mina emahlweni ka Yehovha hi masiku,

²⁹a yi ve enhlokweni ya Yowabu ni le ndlwini hinkwayo ya tata wa yena. Ku nga pfumariwi ni siku ni rin'we endlwini ya Yowabu munhu la nga ni ngati, hambi wa nhlokonho, hambi la xongotelaka hi nhonga, hambi la waka hi tlhari, hambi la pfumalaka vuswa.”

³⁰Sweswo Yowabu na Abixayi makwavo, va dlayile Abinere, hikuva a a dlayile Asahele, makwavo wa vona, eGibiyoni, enyimpini.

³¹Davhida a ku eka Yowabu ni ka tiko hinkwaro leri ngi ri ri na yena: “Handzulani tinguvu ta n'wina mi ambala tinguvu leto khwaxa, mi endla nkosi emahlweni ka Abinere.” Kutani hosi Davhida a yi famba endzhaku ka vuhlaka.

³²Va lahla Abinere eHebroni, kutani hosi yi tlakusa rito, yi rila esirheni ra Abinere, na rona tiko hinkwaro ri rila.

³³Hosi yi endla risimu ra swirilo hikwalaho ka Abinere, yi ku: “Xana Abinere u fise ku yini Kukotisa munhu wa hava?

³⁴Mavoko ya wena a ma bohiwanga; Milenge ya wena a yi khotsiwanga etinsimbhini! U wile kukotisa loko va wa emahlweni ka vana va swidyohi.”

³⁵Tiko hinkwaro ri tshama ri n'wi rila; kutani tiko hinkwaro ri ta eka Davhida ku n'wi khongotela leswaku a dya loko wa ha ri nhlekanhi; kambe Davhida a hlambanya a ku: “Xikwembu a xi ndzi endle hi matimba ni ku engetela, loko ndzi nantswa vuswa, hambi xi ri xilo xihi, dyambu ri nga si pela!”

³⁶Tiko hinkwaro ri twisisa mhaka leyi, kutani xi va xilo xo saseka emahlweni ka rona; hinkwaswo leswi endliweke hi hosi, swi ri swo saseka emahlweni ka tiko hinkwaro.

³⁷Kutani tiko hinkwaro, va ri Vaisraele hinkwavo va tiva siku leri, leswaku Abinere, n'wana Neri, a nga dlayiwanga hi ku lerisa ka hosi.

³⁸Kutani hosi yi ku eka malandza ya yena: “A mi swi tivi leswaku hosi yin'wana, yi nga nhenha leyikulu, yi wile namuntlha eIsraeleni!

³⁹Ndzi tsanile namuntlha, hambi ndzi cheriwile hi mafurha, ndzi vekiwe hosi; hikuva vanhu lava, vana va Seruya, va ndzi tlula hi matimba. Yehovha a a rihisele la dyohaka hi lunya ra yena.”