Read tsonga II Samuwele 6 Bible Online

II Samuwele 6 - tsonga bible

II Samuwele 6

¹Davhida a hlengeleta kambe tinhenha hinkwato ta Israele va ri vavanuna va 30 000:

²Kutani Davhida a pfuka ni tiko hinkwaro leri ngi ri ri na yena, a suka eBaale-Yuda ku heleketa areka ya Xikwembu, leyi ku khongeriwaka ehenhla ka yona vito ra Yehovha wa mavandla, la tshamaka exikarhi ka tikerubu ehenhla ka yona.

³Va veka areka ya Xikwembu egolonyini leyintshwa, va yi tekile endlwini ya Abinadaba, leyi nga exitsungeni; kutani Uza na Ahiyo, vana va Abinadaba, a va fambisa golonyi leyintshwa.

⁴Sweswo va yi teka endlwini ya Abinadaba leyi nga exitsungeni swin'we ni areka ya Xikwembu, kutani Ahiyo a a famba emahlweni ka areka;

⁵Davhida ni yindlu hinkwayo ya Israele, a va yimba emahlweni ka Yehovha hi tinxaka leto tala ta timbila, ta murhi wa kipresi, ni tiharipa, ni magupu, ni madzandzana, ni tinanga, ni swiphambati.

⁶Kakuloko va fika exivuyeni xa Nakono, Uza a tshambuluta voko! A khoma areka ya Xikwembu, hikuva tihomu a ti lava ku yi wisa;

⁷kutani vukari bya Yehovha byi pfurhela Uza, kutani Xikwembu xi n'wi dlaya kona hikuva a nga chavanga; sweswo a fa ekusuhi ni areka ya Xikwembu.

⁸Davhida a twa ku vaviseka hikuva Yehovha a bile Uza hi ku avanyisa loku, kutani a thya ndhawu leyi Perese-Uza (ku petluka ka Uza), ku fika ni namuntlha.

⁹Kutani Davhida a chava Yehovha siku leri, a ku: “Areka ya Yehovha yi ta nghenisa ku yini endlwini ya mina xana?”

¹⁰Sweswo Davhida a nga rhandzanga ku rhurhela areka ya Yehovha endlwini ya yena, emutini wa Davhida, kutani Davhida a yi hambukisa endlwini ya Obede-Edomu wa Gati;

¹¹areka ya Yehovha yi tshama tin'hweti tinharhu endlwini ya Obede-Edomu, wa Gati; kavaloko Yehovha a katekisa Obede-Edomu ni yindlu hinkwayo ya yena.

¹²Kutani va ya byela hosi Davhida, va ku: “Yehovha u katekisile yindlu ya Obede-Edomu ni hinkwaswo leswi nga swa yena hikwalaho ka areka ya Xikwembu.” Kavaloko Davhida a ya kona, a tlhandlukisa areka ya Xikwembu hi ku tsaka emutini wa Davhida, yi susiwa endlwini ya Obede-Edomu.

¹³Kutani lava rhwaleke areka ya Yehovha, kuteloko va fambile mpfhuka wa mikondzo ya ntlhanu na wun'we va tlhava nkunzi ni rhole leri noneke;

¹⁴kutani Davhida a cina hi matimba hinkwawo ya yena emahlweni ka Yehovha, kambe Davhida a a ambarile efodi ya ntsembyana.

¹⁵Davhida ni yindlu ya Israele hinkwayo, a va tlhandlukisa areka ya Yehovha hi ku huwelela ni ku yimba tinanga.

¹⁶Kakuloko areka ya Yehovha yi nghena emutini wa Davhida, Mikala, n'wana Sawulo, a languta hi fasitere, kutani a vona hosi Davhida loko a ri karhi a cina hi matimba emahlweni ka Yehovha; kutani a n'wi sandza embilwini ya yena.

¹⁷Kambe va tisa areka ya Yehovha, kutani va yi veka ekaya ka yona, entsongeni lowu Davhida a wu lunghiseleke yona; kutani Davhida a humesa tiholokosta ni magandzelo ya ku khensa, emahlweni ka Yehovha.

¹⁸Kuteloko a hetile ku humesa tiholokosta ni magandzelo ya ku khensa, a katekisa tiko hi vito ra Yehovha wa mavandla;

¹⁹kutani a avela swakudya eka tiko hinkwaro vunyingi hinkwabyo bya Israele va ri vavasati ni vavanuna; a nyika un'wana ni un'wana xinkwa xin'we, ni nhluvi wa nyama, ni buwu ra mihandzu ya vhinya. Kavaloko tiko hinkwaro ri muka, un'wana ni un'wana endlwini ya yena.

²⁰Na yena Davhida a muka ku ya katekisa yindlu ya yena; kutani Mikala, n'wana Sawulo, a huma ku ya hlangana na Davhida, a ku: “Hosi ya Israele yi tidzunisile swonghasi namuntlha, yi tifunungula namuntlha emahlweni ka malandza ya xisati ya malandza ya yona, hi laha munhu wa hava a nga endlaka hakona!”

²¹Kutani Davhida a ku eka Mikala: “A ku ri emahlweni ka Yehovha la ndzi hlawuleke ematshan'weni ya tata wa wena ni yindlu ya yena hinkwayo, ku ndzi veka mufambisi wa tiko ra Yehovha, ni wa Israele!

²²Ndzi ta cina kambe emahlweni ka Yehovha, ndzi ta titsongahata ni ku tlurisa, ndzi ta tsongahatiwa emahlweni ya mina kambe emahlweni ya malandza ya xisati lawa u ma vuleke ndzi ta dzunisiwa.”

²³Kutani Mikala, n'wana Sawulo, a nga ha velekanga vana ku fika siku ra ku fa ka yena.