Read tsonga II Samuwele 9 Bible Online

II Samuwele 9 - tsonga bible

II Samuwele 9

¹Kutani Davhida a ku: “Xana ka ha sele munhu wa yindlu ya Sawulo; leswaku ndzi n'wi kombisa tintswalo hikwalaho ka Yonatani xana?”

²Endlwini ya Sawulo a ku ri ni nandza la thyiwaka Siba, va ya n'wi vitela Davhida, kutani hosi yi ku eka yena: “Hi wena Siba xana?” Yena a ku: “Ndzi nandza wa wena.”

³Kutani hosi yi ku: “Xana a ka ha salanga munhu ni un'we wa yindlu ya Sawulo, leswaku ndzi n'wi kombisa tintswalo ta Xikwembu?” Siba a ku eka hosi: “Ka ha sele n'wana un'wana wa wanuna wa Yonatani, a lamaleke milenge.”

⁴Hosi yi ku eka yena: “U kwihi xana?” Siba a ku eka hosi: “U le ndlwini ya Makiri, n'wana Amiele, wa Lo-Debara.”

⁵Kavaloko hosi Davhida a rhuma vanhu, va ya n'wi teka endlwini ya Makiri, n'wana Amiele, wa Lo-Debara.

⁶Kutani Mefiboxete, n'wana Yonatani n'wana Sawulo, a ta eka Davhida, a wela ehansi emahlweni ka yena, a khinsama; kutani Davhida a ku: “Mefiboxete!” Yena a ku: “Nandza wa wena hi loyi.”

⁷Davhida a ku eka yena: “U nga chavi, hikuva ndzi rhandza ku ku kombisa tintswalo hikwalaho ka Yonatani, tata wa wena, ndzi va ndzi ku nyika vurimo hinkwabyo bya Sawulo, tata wa wena, loko u ri wena u ta dya swakudya hi masiku hinkwawo etafuleni ra mina.”

⁸Kavaloko a khinsama, a ku: “Nandza wa wena i yini, leswi u langutaka mbyana leyi feke leyi ndzi nga yona!”

⁹Kutani hosi yi vitana Siba nandza wa Sawulo yi ku eka yena: “Swilo hinkwaswo leswi ngi swi ri swa Sawulo, ni swa yindlu ya yena hinkwayo, ndzi swi nyikile n'wana wa hosi ya wena.

¹⁰U ta rima vurimo lebyi, wena ni vana va wena, ni malandza ya wena, kutani u ta tisa swakudya swa byona leswaku n'wana wa hosi ya wena a va ni swakudya ku dya; kutani Mefiboxete, n'wana wa hosi ya wena, u ta dya swakudya masiku hinkwawo etafuleni ra mina.” Yena Siba, a a ri ni vana va xinuna va khume na ntlhanu, ni malandza ya makume mambirhi.

¹¹Kutani Siba a ku eka hosi: “Hinkwaswo leswi hosi, n'wini wanga, a swi lerisaka nandza wa yena, nandza wa wena u ta swi endla.” Kutani Mefiboxete a ta dya etafuleni ra Davhida kukota un'wana wa vana va hosi.

¹²Kambe Mefiboxete a a ri ni n'wana wa wandzisanyana la thyiwaka Mika, kutani hinkwavo lava akeke endlwini ya Siba a ma ri malandza ya Mefiboxete.

¹³Mefiboxete a a akile eYerusalema, hikuva a a dya masiku hinkwawo etafuleni ra hosi; kambe a a lamele milenge mimbirhi.