Read tsonga I Tihosi 1 Bible Online

I Tihosi 1 - tsonga bible

I Tihosi 1

¹Hosi Davhida a a dyuharile, a lehisa masiku ya yena; a va n'wi funengeta hi tinguvu, kambe a a nga kufumeri.

²Kutani malandza ya yena ma ku eka yena: “A ku laveriwe hosi, n'wini wa hina, wanhwana la nga tivanangiki na wanuna a ta yima emahlweni ka hosi, a yi hlayisa, a etlela exifuveni xa yona, kutani hosi n'wini wanga, u ta kufumela.”

³Va lava wanhwana lowo saseka etikweni hinkwaro ra Israele va kuma Abixaga wa Xuneme, va n'wi tisa eka hosi.

⁴Wanhwana a a sasekile ngopfu, a hlayisa hosi, a yi tirhela kambe hosi a yi n'wi tivanga.

⁵Kutani Adoniya, n'wana Hagiti, a tikurisa, a ku: “Ndzi ta va hosi!” A tilavela tigolonyi ni vakhandziyi va tihanci, ni vanhu va ntlhanu wa makume lava tsutsumaka emahlweni ka yena.

⁶Tata wa yena a nga n'wi tshinyanga ni siku ni rin'we, a ku: “U endlela yini sweswo?” Kambe, a a sasekile ngopfu emirini; Hagiti a a n'wi velekile endzhaku ka Abixalomu.

⁷A vulavula na Yowabu, n'wana Seruya, na Abiyatara muprista, kutani va landza Adoniya va n'wi pfuna.

⁸Kambe muprista Sadoki, na Benaya, n'wana Yehoyada, ni muprofeta Natani, na Ximeyi, na Rheyi, ni tinhenha ta Davhida, a va n'wi landzanga, Adoniya.

⁹Adoniya a tlhava tinyimpfu ni tihavi ni marhole lama noneke ekusuhi ni ribye ra Zohelete leri nga ekusuhi na Eni-Rogele; kutani a vitana vamakwavo hinkwavo, vana va hosi, ni vanhu hinkwavo va Yuda, malandza ya hosi.

¹⁰Kambe a nga vitananga Natani, muprofeta, na Benaya, ni tinhenha, na Solomoni makwavo.

¹¹Kavaloko Natani a vulavula na Batixeba, mana wa Solomoni a ku: “A ku twanga leswaku Adoniya n'wana Hagiti wa fuma xana? Kambe hosi ya hina Davhida yi nga swi tivi.

¹²Sweswi tana, ndzi ta ku byela timhaka, u ta ponisa vutomi bya wena ni vutomi bya n'wana wa wena, Solomoni:

¹³Famba u ya nghena eka hosi Davhida, u ku eka yena: ‘Wee hosi, n'wini wanga, a ku hlambanyanga u ri wena eka nandza wa wena, u ku: “Kunene Solomoni, n'wana wa wena, u ta fuma endzhaku ka mina; hi yena la nga ta tshama exitshan'weni xa vuhosi xa mina xana”? Kutani Adoniya u fuma hikwalaho ka yini xana?’

¹⁴Waswivo, kutakuloko wa ha vulavula ni hosi, ndzi ta nghena eka wena, ndzi tatisa marito ya wena.”

¹⁵Batixeba a nghena eka hosi, endlwini, kambe hosi a yi dyuhele ngopfu, kutani Abixaga wa Xuneme a a tirhela hosi.

¹⁶Batixeba a korhama, a khinsama emahlweni ka hosi. Kutani hosi yi ku: “U na yini xana?”

¹⁷A ku eka yona: “N'wini wanga, u hlambanyele nandza wa wena, hi Yehovha, Xikwembu xa wena, u te: ‘Kunene Solomoni, n'wana wa wena, u ta fuma endzhaku ka mina; hi yena la nga ta tshamisa exiluvelweni xa mina.’

¹⁸Sweswi, waswivo, Adoniya wa fuma, kasi wena hosi, n'wini wanga, a ku tivi nchumu!

¹⁹U tlhavile tihomu ni marhole lama noneke, ni tinyimpfu leto tala. U vitanile vana va hosi hinkwavo, na Abiyatara, muprista, na Yowabu, ndhuna ya nyimpi, kambe a nga vitananga Solomoni, nandza wa wena.

²⁰Loko u ri wena hosi, n'wini wanga, mahlo ya Vaisraele hinkwavo ma languta eka wena, leswaku u ta vula eka vona loyi a nga ta tshama exiluvelweni xa hosi n'wini wanga endzhaku ka yena.

²¹Kutakuloko hosi, n'wini wanga, a ta etlela ni vatata wa yena, mina ni n'wananga Solomoni, hi ta vuriwa vadyohi.”

²²Kakuloko a ha vulavula ni hosi, ku fika Natani, muprofeta.

²³Kutani va ya byela hosi, va ku: “Natani, muprofeta, hi loyi.” Kavaloko a nghena emahlweni ka hosi, a khinsama hi mombo emahlweni ka hosi.

²⁴Natani a ku: “O hosi, n'wini wanga, xana u vurile, u ku: ‘Adoniya u ta fuma endzhaku ka mina; hi yena la nga ta tshama exiluvelweni xa mina xana?’

²⁵Hikuva u ngirimerile namuntlha, u tlhavile tihomu, ni marhole layo nona, ni swifuwo leswitsongo leswo tala, kutani u vitanile vana va hosi hinkwavo, ni tindhuna ta nyimpi, na Abiyatara muprista: waswivo va dya, va nwa emahlweni ka yena, va ku: ‘A ku hanye hosi Adoniya!’

²⁶Kambe mina, nandza wa wena, na Sadoki, muprista, na Benaya, n'wana Yehoyada, na Solomoni nandza wa wena, a nga hi vitananga.

²⁷Xana mhaka leyi, yi endliwe hi hosi, n'wini wa mina, kambe u nga tivisanga malandza ya wena loyi a nga ta tshamisa exiluvelweni xa hosi, n'wini wa mina endzhaku ka yena xana?”

²⁸Hosi Davhida a hlamula, a ku: “Ndzi vitaneleni Batixeba.” Kutani a nghena emahlweni ka hosi, a yima emahlweni ka hosi.

²⁹Kutani hosi yi hlambanya, yi ku: “Yehovha wa hanya, loyi a kutsuleke moya wa mina emakhombyeni hinkwawo,

³⁰leswaku hilaha ndzi ku hlambanyeleke hi Yehovha, Xikwembu xa Israele, loko ndzi te: ‘Kunene Solomoni, n'wana wa wena, u ta fuma endzhaku ka mina, hi yena la nga ta tshama exiluvelweni xa mina, ematshan'weni ya mina!’ Ndzi ta endlisa sweswo namuntlha.”

³¹Kutani Batixeba a korhama ehansi, a khinsama emahlweni ka hosi, a ku: “A ku hanye n'wini wa mina, hosi Davhida, hi masiku!”

³²Kutani hosi Davhida a ku: “Ndzi vitaneleni Sadoki, muprista, na Natani, muprofeta, na Benaya, n'wana Yehoyada.” Kutani va nghena emahlweni ka hosi.

³³Hosi yi ku eka vona: “Fambani mi ya teka malandza ya hosi ya n'wina, mi khandziyisa Solomoni, n'wananga, emuleni ya mina, mi n'wi heleketa eGihoni.

³⁴Sadoki, muprista, na Natani, muprofeta va ta n'wi chela hi mafurha, a ta va hosi ya Israele; kutani mi ta yimba nanga, mi ku: ‘A ku hanye hosi Solomoni!’

³⁵Mi ta famba endzhaku ka yena, kutani u ta nghena, a tshamisa exiluvelweni xa mina, hi yena la nga ta fuma ematshan'weni ya mina; ndzi lerisile leswaku a va mufambisi wa Israele ni wa Yuda.”

³⁶Kutani Benaya, n'wana Yehoyada, a hlamula, a ku eka hosi: “Amen! A ku vurise sweswo Yehovha, Xikwembu xa hosi, n'wini wa mina!

³⁷Hilaha Yehovha a nga va ni hosi, n'wini wanga, a a ve na Solomoni hi mukhuva wolowo, a a kurise xiluvelo xa yena ku tlurisa xiluvelo xa hosi Davhida, n'wini wa mina!”

³⁸Kavaloko Sadoki muprista, a suka na Natani, muprofeta, na Benaya, n'wana Yehoyada, ni Vakereti, ni Vapeleti; va khandziyisa Solomoni emuleni ya hosi Davhida, va n'wi fambisa eGihoni.

³⁹Kutani Sadoki muprista, a teka eTabernakeleni ya Yehovha rimhondzo ra mafurha, a chela Solomoni; kavaloko va yimba tinanga, kutani tiko hinkwaro ri ku: “A ku hanye hosi Solomoni!”

⁴⁰Kutani tiko hinkwaro ri tlhandluka endzhaku ka yena, vanhu a va ri karhi va yimbelela hi swintiringo, va titsakela ngopfu, misava yi ko yi pfuma hi ku huwelela ka vona.

⁴¹Adoniya ni hinkwavo lava vitaniweke lava ngi va ri na yena va twa pongo leri loko va ha ku heta ku dya. Na yena Yowabu a yingisa ku pfuma ka nanga, kutani a ku: “Pongo leri humaka le ntsindza leri endlaka nkitsikitsi, i yini xana?”

⁴²Kakuloko a ha vulavula, Yonatani, n'wana Abiyatara, muprista, a fika. Kutani Adoniya a ku: “Tana, hikuva u wanuna, kambe u tisa mahungu ya ku saseka.”

⁴³Yonatani a hlamula, a ku eka Adoniya: “A hi swona! N'wini wa hina, hosi Davhida, u vekile Solomoni ku va hosi.

⁴⁴Kutani hosi yi rhumile na yena Sadoki, muprista, na Natani muprofeta, na Benaya, n'wana Yehoyada ni Vakereti, ni Vapeleti, va n'wi khandziyisa emuleni ya hosi.

⁴⁵Sadoki, muprista, na Natani, muprofeta, va n'wi cherile hi mafurha ku n'wi veka hosi eGihoni, kutani va tlhela va muka hi ku titsakela; hikwalaho entsindza ku nga ni nkitsikitsi; hi kona ku huwelela loku mi ku tweke.

⁴⁶Na yena Solomoni u tshamisile exiluvelweni xa vuhosi: na wona malandza ya hosi ma tile ku katekisa n'wini wa hina, hosi Davhida, ma te: ‘Xikwembu xa wena a xi dzunise vito ra Solomoni ku tlurisa vito ra wena; a xi kurise xiluvelo xa yena ku tlurisa xiluvelo xa wena!’

⁴⁷Kavaloko hosi yi khinsama exilawini xa yona.

⁴⁸Kambe hosi yi vurisa sweswo, yi ku: ‘A ku dzunisiwe Yehovha Xikwembu xa Israele, lexi nyikeke namuntlha munhu la tshamisaka exitshan'weni xa vuhosi xa mina, ndzi n'wi vona hi mahlo!’ ”

⁴⁹Kutani hinkwavo lava vitaniweke hi Adoniya va sungula ku rhurhumela va suka, va famba, un'wana ni un'wana endleleni ya yena.

⁵⁰Adoniya a chava hikwalaho ka Solomoni; na yena a suka a famba, a ya khoma timhondzo ta alitari.

⁵¹Kutani va ya byela Solomoni, va ku: “Waswivo, Adoniya u chava hosi Solomoni, ni sweswi u khomile timhondzo ta alitari, a ku: ‘Hosi Solomoni a yi rhange yi ndzi hlambanyela leswaku a yi nga dlayi nandza wa yena hi tlhari!’ ”

⁵²Solomoni a ku: “Loko a tikombisa munhu la tshembekaka, ku nga ka ku nga wi hansi ni nsisi wun'we wa nhloko ya yena; kambe loko ku biha ku kumiwa eka yena, u ta fa.”

⁵³Kutani hosi Solomoni a rhuma vanhu va ya n'wi xikisa ealitarini, kutani a ta a ta khinsama emahlweni ka hosi Solomoni, kavaloko Solomoni a ku eka yena: “Famba endlwini ya wena.”