Read tsonga I Tihosi 16 Bible Online

I Tihosi 16 - tsonga bible

I Tihosi 16

¹Rito ra Yehovha ri ya eka Yehu, n'wana Hanani, ehenhla ka Baaxa ri ku:

²“Ndzi ku humesile entshurini ndzi ku vekile mufambisi wa tiko ranga ra Israele; kambe, leswi u fambeke endleleni ya Yerobuwamu, u dyohiseke tiko ranga ra Israele ku ndzi hlundzukisa hi swidyoho swa vona;

³waswivo, ndzi ta kukula Baaxa ni yindlu ya yena, ndzi ta endla yindlu ya wena yi kotisa yindlu ya Yerobuwamu, n'wana Nebati.

⁴Munhu wa Baaxa la nga ta fa emutini u ta dyiwa hi timbyana, ni munhu wa yena la nga ta fa enhoveni, u ta dyiwa hi tinyanyana ta tilo.”

⁵Leswi seleke swa timhaka ta Baaxa, ni leswi a swi endleke, ni mitirho ya yena, xana a swi tsariwanga ebukwini ya Tikronika ta tihosi ta Israele xana?

⁶Baaxa a tilata ni vatata wa yena, a lahliwa eTirisa, kutani Ela, n'wana wa yena, a fuma ematshan'weni ya yena.

⁷Rito ra Yehovha ri ya eka muprofeta Yehu, n'wana Hanani, ehenhla ka Baaxa ni le henhla ka yindlu ya yena, hikwalaho ka leswo biha hinkwaswo leswi a swi endleke emahlweni ka Yehovha, a n'wi hlundzukisa hi mitirho ya mavoko ya yena, a fana ni yindlu ya Yerobuwamu, ni leswi a nga herisa yindlu ya Yerobuwamu.

⁸Hi lembe ra 26 ra Asa, hosi ya Yuda Ela, n'wana Baaxa, a fuma ehenhla ka Israele eTirisa. A fuma malembe mambirhi.

⁹Zimri, nandza wa yena, ndhuna ya hafu ya makalichi ya yena, a endla ximhuku. Kakuloko Ela a ri eTirisa a ri karhi a nwa a pyopya endlwini ya Arisa la ngi a ri mulanguteri wa yindlu ya Tirisa,

¹⁰Zimri a nghena, a n'wi tlhava, a n'wi dlaya hi lembe ra 27 ra Asa hosi ya Yuda; kutani a fuma ematshan'weni ya yena.

¹¹Kuteloko a sungurile ku fuma a tshamisile exiluvelweni xa yena, a dlaya vanhu hinkwavo va yindlu ya Baaxa; a nga n'wi siyelanga munhu, ni un'we, hambi ma ri maxaka, hambi va ri vanakulobye.

¹²Zimri a heta yindlu hinkwayo ya Baaxa, hilaha Yehovha a nga vula hakona ehenhla ka Baaxa hi muprofeta Yehu,

¹³hikwalaho ka swidyoho hinkwaswo swa Baaxa, ni swidyoho swa Ela, n'wana wa yena, leswi va swi endleke, ni leswi va dyohiseke Israele ha swona, va ri karhi va hlundzukisa Yehovha, Xikwembu xa Israele hi swifaniso swahava swa vona.

¹⁴Leswi seleke swa timhaka ta Ela, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Israele xana?

¹⁵Hi lembe ra 27 ra Asa, hosi ya Yuda, Zimri a fuma hi masiku ya ntlhanu na mambirhi eTirisa. Tiko a ri govile emahlweni ka Gibetoni, lowu ngi wu ri wa Vafilista.

¹⁶Kutani tiko leri ngi ri ri emixaxeni ri twa loko va ku: “Zimri u endle ximhuku, na swona, u dlayile hosi.” Kutani, hi siku rolero, Vaisraele hinkwavo lava nga emixaxeni va veka Omri ndhuna ya nyimpi, yi va hosi ya Israele.

¹⁷Kavaloko Omri ni Vaisraele hinkwavo, va suka eGibetoni va ya rhendzela Tirisa.

¹⁸Zimri kakuloko a vona leswaku muti wu tekiwile, a nghena endlwini ya hosi, a hisa yindlu ya hosi ehenhla ka yena;

¹⁹kutani a fa hikwalaho ka swidyoho swa yena leswi a swi endleke hi ku endla leswo biha emahlweni ka Yehovha, a ri karhi a famba endleleni ya Yerobuwamu ni le swidyohweni swa yena, leswi a dyohiseke Israele ha swona.

²⁰Leswi seleke swa timhaka ta Zimri, ni ximhuku lexi a xi endleke, xana a swi tsariwanga ebukwini ya Tikronika ta tihosi ta Israele xana?

²¹Kavaloko tiko ra Israele ri hambana; van'wana va tiko va landza Tibini, n'wana Ginati, ku n'wi endla hosi: van'wana va landza Omri.

²²Lava landzeke Omri va hlula lava landzeke Tibini, n'wana Ginati; kutani Tibini a fa, Omri a fuma.

²³Hi lembe ra 33 ra Asa, hosi ya Yuda, Omri a fuma ehenhla ka Vaisraele: a fuma hi malembe ya khume na mambirhi.

²⁴A fuma eTirisa hi malembe ya khume na rin'we, kutani a xava eka Xemere ntshava ya Samariya hi titalenta timbirhi ta silivhere; a aka entshaveni, a thya muti lowu a wu akeke vito ra Samariya hikwalaho ka vito ra Xemere, hosi ya ntshava.

²⁵Omri a endla leswo biha emahlweni ka Yehovha, a tlula hi ku biha hinkwavo lava n'wi rhangeleke.

²⁶A famba endleleni hinkwayo ya Yerobuwamu, n'wana Nebati, ni le swidyohweni swa yena leswi a dyohiseke Israele ha swona, va hlundzukisa Yehovha, Xikwembu xa Israele; hi swifaniso swahava swa vona.

²⁷Leswi seleke swa timhaka ta Omri, leswi a swi endleke, ni mitirho ya yena, xana a swi tsariwanga ebukwini ya Tikronika ta tihosi ta Israele xana?

²⁸Omri a tilata ni vatata wa yena a lahliwa eSamariya; kutani Akabu n'wana wa yena a fuma ematshan'weni ya yena.

²⁹Akabu, n'wana Omri, a sungula ku fuma Vaisraele hi lembe ra 38 ra Asa, hosi ya Yuda. Akabu, n'wana Omri a fuma hi malembe ya 22 ehenhla ka Israele eSamariya.

³⁰Akabu, n'wana Omri, a endla leswo biha emahlweni ka Yehovha, ku tlurisa hinkwavo lava ngi va ri emahlweni ka yena.

³¹A nga kolwanga ku endla swidyoho leswi endliweke hi Yerobuwamu, n'wana Nebati, kambe a engeta a teka Yezabele, n'wana Eti-Baali, hosi ya Vasidoni, kutani a ya tirhela Baali, a khinsama emahlweni ka yena.

³²A akela Baali alitari endlwini ya Baali, leyi a yi akeke eSamariya.

³³Akabu a endla ni xifaniso xa Axera. Akabu a tlula tihosi ta Israele hinkwato leti ngi ti ri emahlweni ka yena hi ku hlundzukisa Yehovha, Xikwembu xa Israele.

³⁴Enkarhini wa yena, Hiele, wa Betele, a aka Yeriko: a aka masungulo ya wona ehenhla ka Abirama mativula ya yena, a bela timbanti ta wona ehenhla ka Segubu, n'wana wa yena wa xigumandzeni, hilaha Yehovha a nga vula hakona ha Yoxuwa, n'wana Nuni.