Read tsonga I Tihosi 4 Bible Online

I Tihosi 4 - tsonga bible

I Tihosi 4

¹Hosi Solomoni a yi fuma Vaisraele hinkwavo.

²Tindhuna ta yena a ti ri leti: Azariya, n'wana Sadoki, muprista; Elihorefe na Ahiya, vana va Xixa, a va ri vatsari;

³Yoxafati n'wana Ahiludi a a ri mutsari wa timhaka; na Benaya n'wana Yehoyada, a a ri ndhuna ya nyimpi.

⁴Sadoki na Abiyatara a va ri vaprista;

⁵na Azariya n'wana Natani, ndhuna ya valanguteri; na Zabudu, n'wana Natani, muprista, ndhuna leyikulu ni nakulobye wa hosi;

⁶Ahixara, a a ri muhlayisi wa yindlu ya hosi; na Adonirama, n'wana Abida, ndhuna ya xibalo.

⁷Solomoni a a ri ni tindhuna ta khume na timbirhi leti vekiweke henhla ka Vaisraele hinkwavo; a va lavela hosi ni yindlu ya yona swakudya; yin'wana ni yin'wana swa n'hweti yin'we hi lembe.

⁸Mavito ya tona hi lawa: N'wana Huru, entshaveni ya Efrayimi.

⁹N'wana Dekera, a vekiwile ehenhla ka Makasa na Xaalabimi, na Beta-Xemexe, na Eloni-Beta-Hanana.

¹⁰N'wana Hesede eka Aruboto, na Soko ni tiko hinkwaro ra Hefere.

¹¹N'wana Aminadaba eka mitsunga hinkwayo ya Dori. (Tafata, n'wana Solomoni a a ri nsati wa yena.)

¹²Baana, n'wana Ahiludi a a ri ehenhla ka Taanaka, na Megido, ni tiko ra Beta-Xeyani hinkwaro leri nga ekusuhi na Saretani, ehansi ka Yizriele, ku suka eBeta-Xeyani, ku fika eAvele-Mehola, ku fika emahlweni ka Yokimeyama.

¹³N'wana Gebere eka Ramoto wa Giliyadi: a a ri ni miti ya Yayiro, n'wana Manase, leyi nga eGiliyadi, ni tiko ra Arigobi, lowu nga eBaxani: yi ri miti leyikulu ya 60, yi ri ni rirhangu ni timhandze ta koporo.

¹⁴Ahinadaba, n'wana Ido a a ri ehenhla ka Mahanayimi.

¹⁵Ahimaasi a a ri etikweni ra Neftali (na yena a a tekile n'wana Solomoni, Basemati, a va nsati wa yena).

¹⁶Baana, n'wana Huxayi, a a ri etikweni ra Asere na Beyaloto.

¹⁷Yoxafati, n'wana Paruwaka, etikweni ra Isakara.

¹⁸Ximeyi, n'wana Ela, etikweni ra Benjamini.

¹⁹Gebere, n'wana Uri, etikweni ra Giliyadi, etikweni ra Sihoni, hosi ya Vaamori, ni ra Ogo, hosi ya Baxani. A ku ri ni ndhuna yin'we etikweni leri.

²⁰Va Yuda ni Vaisraele a va tele ngopfu, byi ri vunyingi lebyi fanaka ni sava leri nga eribuwini ra lwandle. A va dya, va nwa, va tsaka.

²¹Solomoni a a fuma kambe ematikweni hinkwawo, ku suka enambyeni wa Yufrata ku fika etikweni ra Vafilista, ni ku fika endzilakaneni wa Egipta; a va luva eka Solomoni, va n'wi tirhela hi masiku hinkwawo ya ku hanya ka yena.

²²Swakudya swa Solomoni swa siku rin'wana ni rin'wana a swi ri swa tikore ta makume manharhu ya mapa layo saseka, ni tikore ta mapa ta ntlhanu wa makume ni khume rin'we,

²³ni tihomu leti noneke ta khume, ni tihomu ta mirhanga ta makume mambirhi ni tinyimpfu ta dzana, leswi a swi ri ehandle ka tinhlangu, ni timhunti, ni timbavala, ni tihuku leti nonisiweke.

²⁴Hikuva a a fuma etikweni hinkwaro leri nge halenu ka nambu, ku suka eTifisa ku fika eGaza, etihosini leti nge halenu ka nambu, kutani a ku ri ni ku rhula ematlhelweni hinkwawo.

²⁵Ku suka eDani ku fika eBerexeba va Yuda ni va Israele, a va akile va nga chavi nchumu, un'wana ni un'wana ehansi ka vhinya ya yena ni le hansi ka nkuwa wa yena, emasikwini hinkwawo ya Solomoni.

²⁶Solomoni a a ri ni switsengele swa tihanci swa 40 000, swi ri swa tihanci ta tigolonyi ta yena; a a ri ni vakhandziyi va tihanci va 12 000.

²⁷Tindhuna leti a ti phamela hosi Solomoni, ni hinkwavo lava dyaka etafuleni ra yena, yin'wana ni yin'wana en'hwetini ya yena, a ti endla leswaku va nga pfumari nchumu.

²⁸A ti tisa barley ni byanyi lebyi omeke, yin'wana ni yin'wana hi nawu wa yona, swi ri swa tihanci leti paniwaka, ni tihanci leti khandziyiwaka, lomu ingi hosi a yi ri kona.

²⁹Xikwembu xi nyika Solomoni vutlhari ni ku twisisa ngopfungopfu, ni mbilu leyi anameke ku fana ni sava ra le ribuwini ra lwandle.

³⁰Vutlhari bya Solomoni a byi tlula vutlhari bya vanhu hinkwavo va le vuxeni, ni vutlhari hinkwabyo bya Vaegipta.

³¹A a tlharihile ku tlurisa mani na mani; a tlula Etani, wa ka Ezra, na Hemani, na Kalikolo, na Darda, vana va Maholi. Vito ra yena a ri tiviwa ematikweni hinkwawo ya le matlhelweni.

³²A thya swivuriso swa 3 000, ni tinsimu ta yena a ti ri ta 1 005.

³³A vula timhaka ta mirhi, ku suka eka wa kedari lowu nga ehenhla ka Lebanoni ku fika eka wa hisopa lowu humaka ekhumbini; a vula ni timhaka ta swifuwo, ni ta tinyanyana, ni ta swikokovi, ni ta tinhlampfi.

³⁴Vanhu a va ta hi le matikweni hinkwawo ku ta yingisa vutlhari bya Solomoni, va rhumiwa hi tihosi hinkwato ta misava leti yingiseke ta vutlhari bya yena.