Read tsonga I Tihosi 5 Bible Online

I Tihosi 5 - tsonga bible

I Tihosi 5

¹Hiramu, hosi ya Tiri, a rhumela malandza ya yena eka Solomoni, hikuva a a twile leswaku va n'wi vekile hosi ematshan'weni ya tata wa yena, hi ku n'wi chela mafurha; hikuva Hiramu a a ri nakulobye wa Davhida hi masiku hinkwawo.

²Kutani Solomoni a rhuma eka Hiramu, a ku eka yena:

³“Wa swi tiva swinene leswaku tatana Davhida a nga swi kotanga ku akela vito ra Yehovha, Xikwembu xa yena yindlu, hikwalaho ka tinyimpi leti ngi a ri na tona hi ku rhendzeriwa hi valala va yena, Yehovha a ko a va veka ehansi ka mikondzo ya yena.

⁴Sweswi, Yehovha, Xikwembu xa mina, u ndzi nyikile ku wisa ematlhelweni hinkwawo; a ku na valala, hambi ti ri timhaka leto biha.

⁵Kutani waswivo, ndzi lava ku akela vito ra Yehovha, Xikwembu xa mina, yindlu, hilaha Yehovha a nga byela tatana Davhida hakona, a ku: ‘N'wana wa wena, loyi ndzi nga ta n'wi veka ematshan'weni ya wena exiluvelweni xa wena, hi yena la nga ta akela vito ra mina yindlu.’

⁶Sweswi, rhuma vanhu va ya ndzi tsemela mirhi ya kedari ehenhla ka Lebanoni, kambe malandza ya mina a ma fambe ni malandza ya wena; kutani ndzi ta ku nyika hinkwaswo leswi u nga ta swi vula, yi va hakelo ya malandza ya wena, hikuva wa swi tivisisa leswaku eka hina a ku na vanhu lava tivaka ku tsema mirhi kukotisa Vasidoni.”

⁷Kuteloko Hiramu a twile marito ya Solomoni, a tsaka ngopfu, a ku: “Namuntlha a ku katekisiwe Yehovha loyi a nyikeke Davhida n'wana la tlhariheke, a ta fuma tiko leri ri teleke!”

⁸Kutani Hiramu a rhuma eka Solomoni, a ku: “Ndzi yingisile marito lawa u ndzi rhumeleke wona. Loko ndzi ri mina, ndzi ta endla hinkwaswo leswi ku tsakisaka emhakeni ya mirhi ya kedari ni ya mirhi ya kipresi.

⁹Malandza ya mina ma ta yi fulameta eLebanoni, va yi fikisa elwandle, kutani mina ndzi ta rhuma vanhu va yi boha elwandle, yi ta ya fika laha u nga ta yi rhumela eka mina; ndzi ta yi tshunxa kona, kutani u ta yi teka. Na wena, u ta endla leswi ndzi tsakisaka hi ku phamela yindlu ya mina swakudya.”

¹⁰Hiramu a nyika Solomoni mirhi ya kedari ni mirhi ya kipresi leyo tala hilaha a rhandzeke hakona.

¹¹Kutani Solomoni a nyika Hiramu tikore ta koro ta 20 000, swi va swakudya swa yindlu ya yena, ni tikore ta 20 ta mafurha ya ku saseka: Solomoni a tshama a nyika swona Hiramu hi lembe rin'wana ni rin'wana.

¹²Yehovha a nyika Solomoni vutlhari hilaha a n'wi byeleke hakona. Kutani ku rhula ku va kona exikarhi ka Hiramu na Solomoni, va endla xinakulobye vona havambirhi.

¹³Hosi Solomoni yi vitana exikarhi ka Vaisraele hinkwavo vanhu va xibalo; xibalo a xi ringana 30 000 wa vavanuna.

¹⁴Kutani a va rhumela eLebanoni, va ri va 10 000 hi n'hweti yin'wana ni yin'wana, va tlhandlamana hi mitlawa ya vona; a va tshama n'hweti yin'we eLebanoni, ni tin'hweti timbirhi ekaya ka vona. Adonirama a a vekiwile ndhuna ya xibalo.

¹⁵Kambe Solomoni a a ri ni varhwari va mirhwalo va 70 000, ni vanhu va 80 000 lava tshamaka va tsema entshaveni,

¹⁶va ri handle ka tindhuna ta Solomoni leti vekiweke ehenhla ka ntirho, ti ri 3 300 leti fumaka vunyingi bya vanhu lava khomaka ntirho.

¹⁷Kutani hosi yi va lerisa ku humesa maribye lamakulu, ma ri maribye ya nxavo wa risima, ku ta aka masungulo ya Yindlu hi maribye lama vatliweke.

¹⁸Sweswo vatirhi va Solomoni ni vatirhi va Hiramu, ni Vagebali va vatla ni ku lunghisa mirhi ni maribye ya ku aka Yindlu.