Read tsonga I Tihosi 8 Bible Online

I Tihosi 8 - tsonga bible

I Tihosi 8

¹Kavaloko Solomoni a vitana vakulukumba va Israele, ni tihosi hinkwato ta tinyimba, ni vini va tindlu ta vana va Israele va ta eka hosi Solomoni eYerusalema, ku tlhandlukisa areka ya ntwanano wa Yehovha, yi ta huma emutini wa Davhida, lowu nga Siyoni.

²Vanhu hinkwavo va Israele va hlengeletana eka hosi Solomoni, enkhubyeni, hi n'hweti ya Etanimi leyi nga n'hweti ya ntlhanu na timbirhi.

³Kuteloko vakulukumba hinkwavo va Israele va fikile, vaprista va pinga areka.

⁴Va tlhandlukisa areka ya Yehovha, ni Tabernakela ya nhlengeletano, ni swigotso hinkwaswo leswi hlawuriweke leswi nga eTabernakeleni; vaprista ni Valevhi va swi rhwala.

⁵Hosi Solomoni ni nhlengeletano hinkwayo ya Israele va ri lava nga vitaniwa eka yena, va yima emahlweni ka areka; va humesa magandzelo ya tinyimpfu ni ya tihomu leti a va tsandzeka ku ti hlaya, ni ku vula ntsengo wa tona hikwalaho ka vunyingi bya tona.

⁶Kutani vaprista va nghenisa areka ya ntwanano wa Yehovha exivandleni xa yona, evukwetsimelweni bya Yindlu, exikwetsimisisweni, ehansi ka timpapa ta tikerubu.

⁷Hikuva tikerubu a ti tshambuluta timpapa exivandleni xa areka, ti funengeta areka ni mimpingu ya yona.

⁸A va lehisile mimpingu laha ka ku va tinhla ta tona ti vonaka exikwetsimisweni, emahlweni ka vukwetsimelo bya le xikarhi, kambe a ti nga vonaki hi le handle; yi kona ku fika namuntlha.

⁹A ku nga ri na nchumu earekeni, loko ma nga ri maribye mambirhi ya swimphampha lawa Muxe a ma vekeke kona eHorebe, loko Yehovha a endla ntwanano ni vana va Israele loko va huma etikweni ra Egipta.

¹⁰Kuteloko vaprista va humile exikwetsimisweni, papa ri tata Yindlu ya Yehovha,

¹¹vaprista va tsandzeka ku yima kona ku tirha ntirho hikwalaho ka papa; hikuva ku kwetsima ka Yehovha ku tatile Yindlu ya Yehovha.

¹²Kavaloko Solomoni a ku: “Yehovha, u te a ta tshama emunyameni lowukulu!

¹³Kunene ndzi ku akele Yindlu, vutshamo lebyi u nga ta tshama eka byona hilaha ku nga heriki.”

¹⁴Kutani hosi yi hundzuka, yi katekisa nhlengeletano hinkwayo ya Israele kambe nhlengeletano hinkwayo ya Israele a yi yimile.

¹⁵Kutani a ku: “A ku dzunisiwe Yehovha, Xikwembu xa Israele; la nga vulavula hi nomu wa yena na tatana, Davhida, kutani a hetisa hi voko ra yena rito leri a nga ri vula loko a te:

¹⁶‘Mpfhuka ndzi humesile tiko ranga ra Israele eEgipta a ndzi hlawulanga muti exikarhi ka tinxaka hinkwato ta Israele, leswaku va ndzi akela kona Yindlu laha vito ra mina ri nga ta tshama kona, kambe ndzi hlawurile Davhida leswaku a fuma tiko ra mina ra Israele!’

¹⁷Tatana Davhida a rhandzile ku akela vito ra Yehovha, Xikwembu xa Israele, Yindlu,

¹⁸kambe Yehovha a ku eka tatana Davhida: Leswi u rhandzeke ku akela vito ra mina Yindlu, u endlile swona loko u swi rhandzile;

¹⁹hambiswiritano a hi wena la nga ta aka Yindlu, kambe i n'wana wa wena, la humeke exisutini xa wena la nga ta akela vito ra mina Yindlu.

²⁰Yehovha u hetisile rito leri a nga ri vula, ndzi tivekile ematshan'weni ya tatana Davhida, ndzi tshamile exiluvelweni xa Israele hilaha Yehovha a nga vula hakona, ndzi akele vito ra Yehovha, Xikwembu xa Israele, Yindlu;

²¹ndzi lunghisile kona vutshamo bya areka, laha ntwanano wa Yehovha wu nga kona, ntwanano lowo a wu endleke ni vatatana loko a va humesa etikweni ra Egipta.”

²²Kutani Solomoni a yima emahlweni ka alitari ya Yehovha, emahlweni ka nhlengeletano hinkwayo ya Israele, a tlakusa mavoko ya yena ehenhla, a ku:

²³“O Yehovha, Xikwembu xa Israele! A ku na Xikwembu lexi fanaka na wena, hambi ku ri ehenhla etilweni hambi ku ri la hansi emisaveni; u hlayisa ntwanano ni tintswalo eka malandza ya wena lama fambaka emahlweni ka wena hi timbilu Hinkwato ta vona!

²⁴Hikuva u tiyisile eka nandza wa wena, tatana Davhida, rito leri u nga ri vula eka yena; u vurile hi nomu wa wena, kutani hi voko ra wena u hetisile rito ra wena, hilaha swi nga hakona namuntlha.

²⁵Sweswi, Yehovha, Xikwembu xa Israele, tiyisa eka nandza wa wena tatana Davhida, lexi u n'wi tshembiseke xona loko u te: ‘U nga ka u nga pfumali emahlweni ka mina, munhu la tshamisaka exiluvelweni xa Israele, loko kunene vana va wena va hitekela tindlela ta vona ku famba emahlweni ka mina, kukotisa leswi u nga famba emahlweni ka mina.’

²⁶Sweswi, Xikwembu xa Israele, wanga tiyisa marito lawa u ma vuleke eka nandza wa wena, tatana Davhida!

²⁷“Kambe, xana kunene Xikwembu xi nga aka emisaveni xana? Waswivo, matilo ni matilo ya matilo a ma ku eneri; xana-ke Yindlu leyi ndzi akeke yona a hi yitsongo ku tlurisa xana?

²⁸Hambiswiritano, Yehovha, Xikwembu xa mina, yingisa xikhongelo xa nandza wa wena ni ku kombela ka yena! Yingisa ku huwelela ni ku khongela loku nandza wa wena a ku humesaka namuntlha emahlweni ka wena.

²⁹Mahlo ya wena a ma langute vusiku ni nhlekanhi Yindlu leyi, ni xivandla lexi u nga xi vula loko u te: ‘Vito ra mina ri ta va kona!’ Yingisa xikhongelo lexi nandza wa wena a xi humesaka exivandleni lexi.

³⁰Wa nga yingisa ku khongela ka nandza wa wena ni ka tiko ra wena ra Israele, loko va ta khongela exivandleni lexi: Loko u ri wena, yingisa u ri ematilweni, endlwini ya wena, yingisa u rivalela!

³¹“Kutakuloko munhu a dyohela warikwavo, kutani va n'wi boha hi ku funghisiwa, kungakuloko a ta hlambanya emahlweni ka alitari ya wena, eNdlwini leyi,

³²wena, yingisa u ri ematilweni, u tirha u avanyisa malandza ya wena; u kombisa lowo biha ku n'wi tlherisela enhlokweni ya yena ku biha ka yena; kambe u kombisa la lulameke ku n'wi endla hi ku lulama ka yena.

³³“Kungakuloko tiko ra wena ra Israele ri hluriwile hi valala hikuva va ku dyohele, loko va tlhelela eka wena, va dzunisa vito ra wena, va humesa mikhongelo emahlweni ka wena eNdlwini leyi:

³⁴Wena, yingisa u ri ematilweni, u rivalela tiko ra wena ra Israele xidyoho xa rona, u va tlherisela emisaveni leyi u yi nyikeke vatata wa vona!

³⁵“Kutakuloko tilo ri pfariwa, mpfula yi nga ni, hikuva a va ku dyohele, loko va khongela exivandleni lexi, va dzunisa vito ra wena, va tshika xidyoho xa vona, hikuva u va tsongahatile:

³⁶Wena, yingisa u ri ematilweni, u rivalela malandza ya wena ni tiko ra wena ra Israele xidyoho xa vona, u va dyondzisa ndlela leyinene leyi va fanelaka ku famba ha yona, kutani u rhuma mpfula emisaveni leyi u yi nyikeke tiko ra wena ku va ndzhaka ya rona.

³⁷“Kungakuloko ndlala yi ta va kona etikweni, ni ntungu, ni mumu, ni ku bola ka mavele, ni tinjiya ta tinxakaxaka, loko valala va ta hlasela etikweni laha ku nga ni miti ya rona loko ntungu ni vuvabyi bya tinxakaxaka byi va kona;

³⁸loko munhu, hambi a ri mani na mani, kumbe tiko ra wena hinkwaro ra Israele, a kombela a va a khongela, kutani un'wana ni un'wana a tivula xidyoho xa mbilu ya yena, a va a tlakusela mavoko ya yena etlhelo ra Yindlu leyi:

³⁹Wena, yingisa u ri ematilweni laha u akeke kona, u rivalela, u tirha! U nyika un'wana ni un'wana hi tindlela hinkwato ta yena, wena la tivaka mbilu ya yena, hikuva hi wena, wena ntsena, la tivaka timbilu ta vana hinkwavo va vanhu,

⁴⁰va ta ku chava hi masiku hinkwawo lawa va nga ta hanya etikweni leri u ri nyikeke vatata wa hina.

⁴¹“Ni loko a ri muluveri la nga riki wa tiko ra wena ra Israele, kambe a ta a sukile etikweni leri nga ekule hikwalaho ka vito ra wena,

⁴²(hikuva va ta yingisa timhaka ta vito ra wena lerikulu, ni ta voko ra wena ra matimba ni ta voko ra wena leri tlakukeke) kungakuloko a ta khongela eNdlwini leyi:

⁴³Wena, yingisa u ri ematilweni, laha u akeke kona, u tirha, u nyika muluveri loyi, hinkwaswo leswi a nga ta swi kombela eka wena, leswaku matiko hinkwawo ya misava ma tiva vito ra wena, ma ku chava kukotisa tiko ra wena ra Israele, ma ta tiva leswaku vito ra wena ri khongeriwa eNdlwini leyi ndzi yi akeke.

⁴⁴“Kutakuloko tiko ra wena ri huma nyimpi ku ya lwa ni nala wa rona, ri famba hi ndlela leyi u nga ta va kombisa yona, loko va languta hitlhelo ra muti lowu u wu hlawuleke, ni tlhelo ra Yindlu leyi ndzi yi akeleke vito ra wena, va khongela Yehovha:

⁴⁵Yingisa, u ri ematilweni, ku khongela ni ku kombela ka vona, u lulamisa timhaka ta vona.

⁴⁶“Kutakuloko va ku dyohela, (hikuva a ku na munhu la nga dyohiki) loko u va hlundzukela, u va nyiketa valala, kutani va va yisa etikweni ra valala, hambi ekule, hambi ekusuhi;

⁴⁷loko va tiyingisa etikweni leri va nga ta va makhumbi eka rona, loko va tlhelela eka wena va ku khongela etikweni ra lava va va khomeke va ku: ‘Hi dyohile, hi endlile leswo biha, hi onhile!’

⁴⁸Kungakuloko va tlhelela eka wena hi timbilu hinkwato ta vona, ni mimoya hinkwayo ya vona etikweni ra valala va vona lava va va khomeke; loko va ku khongela va languta hitlhelo ra tiko leri u ri nyikeke vatata wa vona, ni tlhelo ra muti lowu u wu hlawuleke ni tlhelo ra yindlu leyi ndzi yi akeleke vito ra wena:

⁴⁹Yingisa, u ri ematilweni, laha u akeke kona, ku khongela ni ku kombela ka vona, u va yimela etimhakeni ta vona,

⁵⁰rivalela tiko ra wena ku dyoha loku va ku dyoheleke hakona ni ku tiarisa hinkwako loku va ku dyoheleke hakona, u va endla lava tweriwaka vusiwana hi lava va va khomeke, leswaku va va tsetselela,

⁵¹hikuva i tiko ra wena ni ndzhaka ya wena leyi u yi humeseke eEgipta, exikarhi ka ndzilo wa le fulweni.

⁵²“Mahlo ya wena a ma langute ku khongela ka nandza wa wena, ni ku khongela ka tiko ra wena ra Israele, ku va nyika hinkwaswo leswi va nga ta swi kombela eka wena;

⁵³hikuva u va humesile xikarhi ka matiko hinkwawo ya misava ku va ndzhaka ya wena, hilaha u vuleke ha Muxe nandza wa wena, loko u humesile vatata wa hina eEgipta, o, Hosi Yehovha!”

⁵⁴Kuteloko Solomoni a hetile ku humesela Yehovha ku khongela hinkwako loku, ni ku kombela loku, a suka a yima emahlweni ka alitari ya Yehovha, laha a khinsameke kona ematsolweni ya yena, a yimisile mavoko ehenhla,

⁵⁵kutani a yima a katekisa hi rito lerikulu nhlengeletano hinkwayo ya Israele, a ku:

⁵⁶“A ku dzunisiwe Yehovha la nyikeke tiko ra yena ra Israele ku wisa, hilaha a vuleke hakona! A ku wanga ni rito rin'we ra marito hinkwawo layo saseka lawa a nga ma vula hi Muxe, nandza wa yena.

⁵⁷Yehovha, Xikwembu xa hina, a a ve na hina kukotisa leswi ngi a ri ni vatatana; a nga hi tshiki, a nga hi rivali,

⁵⁸kambe a tikokela eka yena, timbilu ta hina, leswaku hi famba etindleleni hinkwato ta yena, hi hlayisa milawu hinkwayo ya yena ni marito hinkwawo ya yena ni ku lerisa hinkwako ka yena loku a ku leriseke vatatana!

⁵⁹Marito lawa ndzi ma humesaka sweswi, hi ku khongela emahlweni ka Yehovha, a ma ve emahlweni ka Yehovha, Xikwembu xa hina, nhlekanhi ni vusiku, leswaku a yingisa nandza wa yena ni tiko ra yena ra Israele, a ri nyika hi masiku swa siku rin'wana ni rin'wana;

⁶⁰matiko hinkwawo ya misava ma ta tiva leswaku Xikwembu i Yehovha, ni leswaku a ku na xin'wana.

⁶¹Timbilu ta n'wina a ti ve hinkwato na Yehovha, Xikwembu xa hina, ku famba eku leriseni ka yena ni ku hlayisa milawu ya yena kukotisa namuntlha.”

⁶²Kutani hosi, ni Vaisraele hinkwavo, va humesa magandzelo emahlweni ka Yehovha.

⁶³Solomoni a humesa magandzelo ya ku khensa lawa a ma tlhaveleke Yehovha, tihomu ta 22 000, ni tinyimpfu ta 120 000; sweswo hosi ni vana hinkwavo va Israele va khangula Yindlu ya Yehovha.

⁶⁴Hi siku rolero, hosi yi hlawula xivandla xa le xikarhi ka xivava lexi nga emahlweni ka Yindlu ya Yehovha, ku humesela kona tiholokosta ni mihlengo, ni mafurha ya magandzelo ya ku khensa, hikuva alitari ya koporo leyi nga emahlweni ka Yehovha a yi ri leyitsongo ku ringanisa tiholokosta, ni mihlengo, ni mafurha ya magandzelo ya ku khensa.

⁶⁵Enkarhini wolowo, Solomoni ni Vaisraele hinkwavo va endla nkhuvo; vunyingi lebyikulu lebyi humaka ku suka etlhelo ra Hamata ku fika exinambyaneni xa Egipta, byi hlengeletana emahlweni ka Yehovha, Xikwembu xa hina, hi masiku ya ntlhanu na mambirhi, ni masiku ya ntlhanu na mambirhi, kambe ma ri masiku ya khume na mune.

⁶⁶Hi siku ra ntlhanu na manharhu a tlherisa tiko; kutani va katekisa hosi, va tlhelela emitsongeni ya vona hi ku tsaka ni ku khensa ka mbilu, hikwalaho ka ku kateka hinkwako loku Yehovha a katekiseke Davhida nandza wa yena hakona, ni tiko ra yena ra Israele.