Read tsonga II Tihosi 10 Bible Online

II Tihosi 10 - tsonga bible

II Tihosi 10

¹Akabu a a siyile vana va xinuna va 70 eSamariya. Kutani Yehu a tsala mapapila a ma rhumela eSamariya eka tihosi ta Yizriele, ni ka vakulukumba, ni ka valanguteri va vana va Akabu;

²a ku: “Sweswi, kutakuloko papila leri ri mi fikela n'wina lava mi nga ni vana va hosi ya n'wina, ni tigolonyi, ni tihanci, ni muti wa khokholo, ni matlhari,

³vonani exikarhi ka vana va hosi ya n'wina, mi hlawula lonene ni la lulameke mi n'wi veka exiluvelweni xa tata wa yena, mi lwela yindlu ya hosi ya n'wina.”

⁴Vona va chava ngopfungopfu, va ku: “Maswivo, tihosi letimbirhi a ti tiyanga emahlweni ka yena, loko hi ri hina hi ta tiya hi ku yini xana?”

⁵Kutani mulanguteri wa yindlu ya hosi, ni ndhuna ya muti, ni vakulukumba, ni valanguteri va vana va hosi, va rhuma eka Yehu, va ku eka yena: “Hi malandza ya wena, hi ta endla hinkwaswo leswi u nga ta hi byela swona; hi nga ka hi nga veki munhu hosi; endla leswi u swi rhandzaka.”

⁶Yena a va tsalela papila ra vumbirhi a ku: “Loko n'wina mi va mina, ni loko mi yingisa rito ra mina, tekani tinhloko ta vavanuna lava, vana va hosi ya n'wina, mi ta eka mina mundzuku enkarhini wolowo, eYizriele.” Vana va hosi va 70 a va ri eka vakulukumba va muti lava va va hlayisaka.

⁷Papila leri, kuteloko ri va fikela, va teka vana va hosi va va dlaya, va ri vavanuna va 70, kutani va veka tinhloko ta vona eswirhundzwini va n'wi rhumela tona eYizriele.

⁸Kavaloko ntsumi yi nghena yi n'wi tivisa mhaka leyi, yi ku: “Va tisile tinhloko ta vana va hosi.” Kutani a ku: “Endlani ha tona switsulutsulu swimbirhi enyangweni ya muti ku fikela nimixo.”

⁹Ni mixo a huma, a yima kona a ku eka tiko hinkwaro: “Mi lulamile! Hi mina ndzi nga endla makungu ya ku pfukela hosi ya mina, ndzi n'wi dlaya. Kambe i mani la nga dlaya hinkwavo lava xana?

¹⁰Tivisisani leswaku a ku na rito rin'we ra marito ya Yehovha lawa a nga ma vula ehenhla ka yindlu ya Akabu, leri nga ta wa ehansi; Yehovha u endlile hinkwaswo leswi a nga swi vula hi nandza wa yena Eliya.”

¹¹Kutani Yehu a dlaya hinkwavo lava seleke va yindlu ya Akabu eYizriele, ni vakulukumba hinkwavo va yena, ni vanakulobye, ni tindhuna ta yena, ku nga balekanga munhu.

¹²Kutani a suka, a ya eSamariya. Endleleni kuteloko a fikile endlwini laha varisi va hlengeletanaka kona,

¹³Yehu a kuma vamakwavo va Ahaziya, hosi ya Yuda, a ku eka vona: “Mi va mani xana?” Va hlamula va ku: “Hi vamakwavo va Ahaziya, hi ngirimerile ku ya xeweta vana va hosi ni vana va mana wa hosi.”

¹⁴Kutani a ku: “Va khomeni, va ha hanya!” Kutani va va khoma va va dlaya ekusuhi ni xihlovo xa yindlu ya nhlengeletano, va ri vavanuna va 42; a nga siyanga na un'we.

¹⁵A suka kona, kutani a hlangana na Yonadabu, n'wana Rekaba, la teke ku hlangana na yena. A n'wi xeweta, a ku eka yena: “Xana mbilu ya wena yi basile kukotisa mbilu yanga emahlweni ka wena-ke?” Yonadabu a hlamula, a ku: “Yi basile.” Yehu a ku: “Loko yi basile a hi khomaneni hi mavoko!” Va khomana hi mavoko, kutani Yehu a n'wi khandziyisa ekusuhi na yena egolonyini.

¹⁶Kutani a ku: “A hi fambe swin'we, u ta vona ku hiseka ka mina eka Yehovha.” Kutani a n'wi fambisa egolonyini ya yena.

¹⁷A ya nghena eSamariya, kutani a dlaya hinkwavo lava seleke va Akabu eSamariya, a va heta hinkwavo hi rito leri Yehovha a nga ri vula eka Eliya.

¹⁸Kutani Yehu a hlengeleta tiko hinkwaro, a ku eka rona: “Akabu u tirhele Baali switsongo, Yehu u ta n'wi tirhela ngopfu.

¹⁹Sweswi ndzi vitaneleni vaprofeta va Baali hinkwavo, malandza ya yena hinkwawo, ni vaprista va yena hinkwavo; ku nga pfumariwi na un'we! Hikuva ndzi rhandza ku humesela Baali gandzelo lerikulu. Mani na mani la nga ta pfumaleka, a nga ka a nga hanyi.” Yehu a a endlisa sweswo hi vutlhari ku lovisa lava tirhelaka Baali.

²⁰Kutani Yehu a ku: “Endlelani Baali nhlengeletano leyo kwetsima.” Kavaloko va yi tivisa.

²¹Yehu a rhuma etikweni ra Israele hinkwaro, kutani hinkwavo lava tirhelaka Baali va ta, ku nga salanga na un'we la nga tangiki va nghena endlwini ya Baali, yindlu ya Baali yi tala swinene.

²²Kutani Yehu a ku eka mulanguteri wa yindlu ya tinguvu: “Humesela hinkwavo lava tirhelaka Baali tinguvu.” Kutani a va nyika tinguvu.

²³Yehu a nghena endlwini ya Baali, a ri na Yonadabu n'wana Rekaba, kutani a ku eka malandza ya Baali: “Lavisisani, mi vona leswaku ku nga tshuki ku va na un'we wa malandza ya Yehovha haleno; ku va ntsena lava tirhelaka Baali.”

²⁴Kavaloko va nghena ku humesa magandzelo ni tiholokosta kutani Yehu a veka ehandle ka yindlu vavanuna va 80, a ku eka vona: “Kungakuloko munhu a tshika un'wana wa lava ndzi va nyiketaka emavokweni ya n'wina a baleka, vutomi bya yena byi ta riha vutomi bya munhu loyi.”

²⁵Kuteloko va hetile ku humesa holokosta, Yehu a ku eka tinhenha ni ka tindhuna: “Nghenani, mi va dlaya! Ku nga humi munhu!” Kavaloko vatsutsumi ni tinhenha ti va dlaya hi matlhari, ti va cukumeta hitlhelo; kutani ti ya fika emutini wa yindlu ya Baali.

²⁶Va humesa swifaniso endlwini ya Baali, va swi hisa;

²⁷va mbundzuxa xifaniso xa Baali; va mbundzuxa ni yindlu ya Baali, va endla tala ha yona ku fika namuntlha.

²⁸Yehu a herisa sweswo Baali exikarhi ka Israele.

²⁹Ntsena loko swi ri swidyoho swa Yerobuwamu, n'wana Nebati, la nga dyohisa Israele, ma ri marhole ya nsuku lama ngi ma ri eBetele na Dani, Yehu a nga swi fularhelanga.

³⁰Yehovha a ku eka Yehu: “Leswi u endleke leswi lulameke emahlweni ka mina, u endleke yindlu ya Akabu hinkwaswo leswi ndzi swi anakanyeke embilwini ya mina, vana va wena va ta tshama exiluvelweni xa Israele ku fika erixakeni ra vumune.”

³¹Kambe Yehu a nga chivirikanga hi mbilu hinkwayo ya yena ku famba enawini wa Yehovha, Xikwembu xa Israele, a nga fularhelanga swidyoho swa Yerobuwamu la nga dyohisa Israele ha swona.

³²Emikarhini yoleyo Yehovha a sungula ku hunguta tiko ra Israele; Hazaele a hlasela va Israele endzilakaneni hinkwawo wa vona,

³³ku suka eYordani evuxeni, tiko hinkwaro ra Giliyadi, va Gadi, ni va Rhuveni ni va Manase, ku suka eArowere lowu nga enambyeni wa Arinoni, na Giliyadi, na Baxani.

³⁴Leswi seleke swa timhaka ta Yehu, hinkwaswo leswi a swi endleke, ni mitirho ya matimba hinkwawo ya yena, timhaka leti a ti tsariwanga ebukwini ya Tikronika ta tihosi ta Israele xana?

³⁵Kutani Yehu a etlela ni vatata wa yena; va n'wi lahla eSamariya; kutani Yowahazi, n'wana wa yena, a fuma ematshan'weni ya yena.

³⁶Yehu a a fumile Israele eSamariya hi malembe ya 28.