Read tsonga II Tihosi 12 Bible Online

II Tihosi 12 - tsonga bible

II Tihosi 12

¹Yowasi a a ri wa malembe ya ntlhanu na mambirhi loko a sungula ku fuma. Yowasi a sungula ku fuma hi lembe ra ntlhanu na mambirhi ra Yehu; a fuma eYerusalema, hi malembe ya mune wa makume. Vito ra mana wa yena a a ri Sibiya, wa Berexeba.

²Yowasi a endla leswi lulameke emahlweni ka Yehovha hi masiku hinkwawo ya yena, hikuva muprista Yehoyada a a n'wi dyondzisa.

³Ntsena switsunga a swi susiwanga; tiko ri tshama ri endla magandzelo ni ku hisa mirhi ya risuna eswitsungeni.

⁴Yowasi a ku eka vaprista: “Mali hinkwayo ya swilo leswi kwetsimaka, leyi tisiwaka endlwini ya Yehovha, yi ri mali ya ku hlayiwa, ni mali hinkwayo ya ku kutsula ka vanhu, leyi muprista un'wana ni un'wana a nga ta ringanisa, ni mali hinkwayo leyi munhu a yi tisaka hi mbilu endlwini ya Yehovha;

⁵vaprista va ta titekela yona, un'wana ni un'wana ya varikwavo, va ta siva timfa ta yindlu, va lunghisa ni hinkwaswo leswi nga ta kumiwa swi onhakile.”

⁶Kambe hi lembe ra 26, ra hosi Yowasi, vaprista a va nga si siva timfa ta yindlu.

⁷Kutani hosi Yowasi a vitana Yehoyada, muprista, ni vaprista van'wana, a ku eka vona: “Xana a mi sivi ha yini timfa ta yindlu? Sweswi, mi nga tshuki mi teka mali ya varikwenu, kambe mi ta yi nyika ku lunghisa yindlu.”

⁸Kutani vaprista va pfumelelana leswaku va nga ha amukeli mali ya tiko, kambe va tshika ntirho wa ku lunghisa yindlu.

⁹Kutani Yehoyada, muprista, a teka bokisi, a boxa xifunengeto xa rona, a ri veka ekusuhi ni alitari, hitlhelo ra xinene loko va nghena endlwini ya Yehovha; kutani vaprista, valanguteri va xitsulu, va nghenisa kona mali hinkwayo leyi tisiwaka endlwini ya Yehovha.

¹⁰Kakuloko va vona leswaku mali yi tele ebokisini, mutsari wa hosi a tlhandluka ni muprista lonkulu, va ya hlaya mali leyi va yi kumeke endlwini ya Yehovha, va yi veka.

¹¹Mali leyi, loko va yi pimile exikalweni, va yi veka emavokweni ya lava khomaka ntirho, lava lerisaka mitirho endlwini ya Yehovha vona va hakela ha yona vavatli ni vaaki lava tirhaka endlwini ya Yehovha.

¹²Va hakela ni vaaki va maribye, ni vavatli va maribye va xava mirhi yo aka, ni maribye lama vatliweke ya ku siva timfa ta yindlu ya Yehovha, ni ku hakela hinkwayo mitirho ya ku lunghisa yindlu.

¹³Ntsena a va endlelangi yindlu ya Yehovha mikambana ya silivhere, ni mikwana, ni swinwelo, ni tinanga, hambi xi ri xibya xin'wana xa nsuku ni xa silivhere, hi mali leyi tisiwaka endlwini ya Yehovha;

¹⁴kambe va yi nyika lava fambisaka mitirho, leswaku va lunghisa ha yona yindlu ya Yehovha.

¹⁵Kambe vanhu lava tshembisiweke mali leswaku va yi nyika lava khomaka ntirho, a va nga vutisiwi, hikuva a va endla hi ku lulama.

¹⁶Mali ya magandzelo ya milandzu, ni mali ya magandzelo ya xidyoho, a yi tisiwanga endlwini ya Yehovha a yi ri ya vaprista.

¹⁷Kavaloko Hazaele, hosi ya Siriya, a tlhandluka, a pfuka Gati, a wu teka. Kutani Hazaele a lava ku tlhandluka ku ya pfuka Yerusalema.

¹⁸Kambe Yowasi, hosi ya Yuda, a teka swingolongondzwana hinkwaswo leswi hlawuriweke leswi hlawurisiweke hi Yoxafati, na Yehoramu, na Ahaziya, vatata wa yena tihosi ta Yuda, ni leswi a swi hlawuleke a ri yena ni nsuku hinkwawo lowu ngi wu ri exumeni xa yindlu ya Yehovha, ni swa yindlu ya hosi, a swi rhumela Hazaele, hosi ya Siriya, kutani a sukela Yerusalema.

¹⁹Leswi seleke swa timhaka ta Yowasi, hinkwaswo leswi a swi endleke, timhaka leti a ti tsariwanga ebukwini ya Tikronika ta tihosi ta Yuda xana?

²⁰Malandza ya yena ma pfuka, ma endla makungu ya ku n'wi xandzukela; kutani ma dlaya Yowasi endlwini ya Milo eku rheleleni ka Sila.

²¹Yozakari, n'wana Ximeyata, na Yozabadi, n'wana Xomere, malandza ya yena, ma n'wi tlhava a fa; kutani va n'wi lahla ni vatata wa yena emutini wa Davhida. Kutani Amasiya, n'wana wa yena, a fuma ematshan'weni ya yena.