Read tsonga II Tihosi 13 Bible Online

II Tihosi 13 - tsonga bible

II Tihosi 13

¹Hi lembe ra 23 ra Yowasi, n'wana Ahaziya, hosi ya Yuda, Yowahazi, n'wana Yehu, a sungula ku fuma etikweni ra Israele eSamariya; a fuma hi malembe ya 17.

²A endla leswo biha emahlweni ka Yehovha; a landza swidyoho swa Yerobuwamu, n'wana Nebati, la dyohiseke Israele, a nga swi fularhelanga.

³Vukari bya Yehovha byi pfurhela Israele, kutani a va nyiketa Hazaele, hosi ya Siriya, na Bene-Hadada, n'wana Hazaele, emikarhini yoleyo hinkwayo.

⁴Kutani Yowahazi a khongela Yehovha, Yehovha a n'wi yingisa, hikuva a a vonile ku xaniseka ka Vaisraele hilaha hosi ya Siriya yi va xaniseke hakona.

⁵Yehovha a nyika Vaisraele mulamuleri. Kutani Vaisraele va tshunxiwa emavokweni ya Vasiriya; kavaloko vana va Israele va aka emitsongeni ya vona kukotisa khale.

⁶Hambiswiritano, a va fularhelanga swidyoho swa yindlu ya Yerobuwamu la nga dyohisa Israele va tinyiketa eka swona, na xona xifaniso xa Axera xi sala xi yimile eSamariya.

⁷Hikuva Yehovha a a siyele Yowahazi nyimpi ya ntlhanu wa makume wa vakhandziyi va tihanci ntsena, ni tigolonyi ta khume, ni vavanuna lava fambaka hi milenge va 10 000; hikuva hosi ya Siriya a yi herisile Vaisraele, yi va endlile kukotisa ntshuri lowu kandziyeriwaka.

⁸Leswi seleke swa timhaka ta Yowahazi, ni hinkwaswo leswi a swi endleke, ni vunhenha bya yena, timhaka leti a ti tsariwanga ebukwini ya Tikronika ta tihosi ta Israele xana?

⁹Yowahazi a etlela ni vatata wa yena, kutani va n'wi lahla eSamariya; Yowasi, n'wana wa yena, a fuma ematshan'weni ya yena.

¹⁰Hi lembe ra 37 ra Yowasi, hosi ya Yuda, Yowasi, n'wana Yowahazi, a sungula ku fuma etikweni ra Israele, eSamariya; a fuma hi malembe ya 16.

¹¹A endla leswo biha emahlweni ka Yehovha, a nga fularhelanga swidyoho hinkwaswo swa Yerobuwamu, n'wana Nebati, la dyohiseke Israele; a tinyiketa swona.

¹²Leswi seleke swa timhaka ta Yowasi, ni hinkwaswo leswi a swi endleke, ni vunhenha bya yena, loko a lwa na Amasiya, hosi ya Yuda, xana a swi tsariwanga ebukwini ya Tikronika ta tihosi ta Israele xana?

¹³Yowasi a etlela ni vatata wa yena kutani Yerobuwamu a tshamisa exiluvelweni xa yena. Yowasi a lahliwa eSamariya ni tihosi ta Israele.

¹⁴Elixa a a vabya hi vuvabyi lebyi a feke ha byona, kutani Yowasi, hosi ya Israele, a ngirimela eka yena, a rila emombyeni wa yena, a ku: “Tatana! Tatana! Golonyi ya Israele ni vakhandziyi va yona!”

¹⁵Elixa a ku eka yena: “Teka vurha ni miseve.” Kutani a teka vurha ni miseve.

¹⁶Elixa a ku eka hosi ya Israele: “Khoma vurha hi voko ra wena.” Kuteloko a tamerile vurha, Elixa a tlhandlekisa mavoko ya yena emavokweni ya hosi,

¹⁷kutani a ku: “Pfula fasitere hitlhelo ra vuxa!” Kuteloko a ri pfurhile, Elixa a ku: “Copa!” A copa, kutani Elixa a ku: “I nseve wa ku ponisa ka Yehovha! I nseve wa ku ponisiwa emavokweni ya Vasiriya, u ta lwa ni Vasiriya eAfeke, u ko u va heta.”

¹⁸A engeta a ku: “Teka miseve,” kutani a teka; kavaloko Elixa a ku eka hosi ya Israele: “Gongondza ehansi.” A gongondza kanharhu kutani a yima.

¹⁹Munhu wa Xikwembu a n'wi holovela, a ku: “Ingi loko u gongondzile kantlhanu, kumbe kantlhanu na kan'we; a u ta hlula Vasiriya u ko u va heta; kambe sweswi, u ta hlula Vasiriya kanharhu.”

²⁰Kutani Elixa a fa; va n'wi lahla. Hi lembe leri tlhandlamaka, eku sunguleni ka rona, mavandla ya Vamowabu ma nghena etikweni.

²¹Kakuloko va lahla munhu, va vona vandla rin'wana ri ta, kutani va cukumeta mufi esirheni ra Elixa. Mufi a ya kumba marhambu ya Elixa, kutani a pfuka a hanyile, a yima emilengeni ya yena.

²²Hazaele, hosi ya Siriya, a a xanisile Israele eku fumeni hinkwako ka Yowahazi.

²³Kambe Yehovha a twela Vaisraele vusiwana, a va endla hi tintswalo, a va hundzukela hi mombo, hikwalaho ka ntwanano wa yena na Abrahama, na Isaka, na Yakobo a nga rhandzangi ku va heta, ni ku fika sweswi a nga va cukumetangi ekule ni mombo wa yena.

²⁴Hazaele, hosi ya Siriya, a fa, kutani Bene-Hadada, n'wana wa yena, a fuma, ematshan'weni ya yena.

²⁵Yowasi, n'wana Yowahazi, a tlhela a teka emavokweni ya Bene-Hadada, n'wana Hazaele, miti leyi a yi tekeke enyimpini, emavokweni ya Yowahazi, tata wa yena. Yowasi a n'wi hlula kanharhu, kutani a tlhela a kuma miti ya Israele.