Read tsonga II Tihosi 15 Bible Online

II Tihosi 15 - tsonga bible

II Tihosi 15

¹Hi lembe ra 27 ra Yerobuwamu, hosi ya Israele, Azariya, n'wana Amasiya, hosi ya Yuda a sungula ku fuma.

²A a ri wa malembe ya 16 loko a vekiwa hosi, kutani a fuma hi malembe ya 52 eYerusalema. Vito ra mana wa yena a a ri Yekoliya, wa Yerusalema.

³A endla leswo lulama emahlweni ka Yehovha, hinkwaswo hilaha Amasiya, tata wa yena, a endleke hakona.

⁴Ntsena switsunga a swi susiwanga: tiko a ri tshama ri humesa magandzelo, ni ku hisa mirhi ya risuna eswitsungeni.

⁵Kutani Yehovha a rhumela hosi vuvabyi, a va ni nhlokonho ku fika siku ra ku fa ka yena. A a tshama endlwini ya vavabyi; Yotamu n'wana hosi, a lerisa endlwini ya hosi, a ri karhi a avanyisa vanhu va tiko.

⁶Leswi seleke swa timhaka ta Azariya, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda xana?

⁷Azariya a etlela ni vatata wa yena, kutani va n'wi lahla ni vatata wa yena emutini wa Davhida; Yotamu, n'wana wa yena, a fuma ematshan'weni ya yena.

⁸Hi lembe ra 38 ra Azariya, hosi ya Yuda, Zakariya, n'wana Yerobuwamu a sungula ku fuma etikweni ra Israele eSamariya; a fuma hi tin'hweti ta ntlhanu na yin'we.

⁹A endla leswo biha emahlweni ka Yehovha, kukotisa vatata wa yena; a nga fularhelanga swidyoho swa Yerobuwamu, n'wana Nebati, la nga dyohisa Israele.

¹⁰Xalumi, n'wana Yabexe a endla makungu ku n'wi xandzukela, kutani a n'wi tlhava emahlweni ka tiko, a n'wi dlaya; a fuma ematshan'weni ya yena.

¹¹Timhaka leti seleke ta Zakariya, ti tsariwile ebukwini ya Tikronika ta tihosi ta Israele.

¹²Hi rona rito ra Yehovha leri a ri byeleke Yehu loko a ku: “Vana va wena va ta tshama exiluvelweni xa Israele, ku fika erixakeni ra vumune”; swi va tano.

¹³Xalumi, n'wana Yabexe, a sungula ku fuma hi lembe ra 39 ra Uziya, hosi ya Yuda. A fuma n'hweti yin'we eSamariya.

¹⁴Menahema, n'wana Gadi, a tlhandluka a suke eTirisa, a ta eSamariya, a tlhava Xalumi, n'wana Yabexe, eSamariya, a n'wi dlaya; a fuma ematshan'weni ya yena.

¹⁵Leswi seleke swa timhaka ta Xalumi, ni ku xandzuka loku a ku kaneleke, swi tsariwile ebukwini ya Tikronika ta tihosi ta Israele.

¹⁶Kutani Menahema a hlasela Tifisaka, ni hinkwavo lava ngi va ri ka wona ni tikwanyana ra wona, ku suka eTirisa hikuva a wu n'wi pfulelanga tinyangwa ta wona, a wu hlasela, kutani a boxa makhwiri ya vavasati hinkwavo lava ngi va ri ni tinyimba.

¹⁷Hi lembe ra 39 ra Azariya, hosi ya Yuda, Menahema, n'wana Gadi a sungula ku fuma etikweni ra Israele; a fuma khume ra malembe eSamariya.

¹⁸A endla leswo biha emahlweni ka Yehovha, a nga fularhelangi eku hanyeni hinkwako ka yena, ku dyoha ka Yerobuwamu, n'wana Nebati la nga dyohisa Israele.

¹⁹Pulu, hosi ya Asiriya a nghena etikweni ra Israele, kutani Menahema a nyika Pulu titalenta ta silivhere ta 1 000 leswaku a n'wi pfuna ku tiyisa vuhosi evokweni ra yena.

²⁰Menahema a hlenga mali leyi etikweni ra Israele ku yi nyika hosi ya Asiriya; mufuwi un'wana ni un'wana a humesa tixikele ta ntlhanu wa makume; kutani hosi ya Asiriya, a tlhela a muka a nga ha hlwelangi etikweni ra Israele.

²¹Leswi seleke swa timhaka ta Menahema, ni hinkwaswo leswi a swi endleke a swi tsariwanga ebukwini ya Tikronika ta tihosi ta Israele xana?

²²Menahema a etlela ni vatata wa yena kutani Pekahiya, n'wana wa yena, a fuma ematshan'weni ya yena.

²³Hi lembe ra ntlhanu wa makume ra Azariya, hosi ya Yuda, Pekahiya, n'wana Menahema, a sungula ku fuma etikweni ra Israele; a fuma malembe mambirhi eSamariya.

²⁴A endla leswo biha emahlweni ka Yehovha; a nga fularhelanga ku dyoha ka Yerobuwamu, n'wana Nebati, la nga dyohisa Israele.

²⁵Peka, n'wana Remaliya, ndhuna ya yena, a n'wi xandzukela, a n'wi tlhava eSamariya endlwini ya hosi, swin'we na Arigobi, na Ariye; vavanuna va ntlhanu wa makume va Giliyadi a va ri na yena; a n'wi dlayisa sweswo, a fuma ematshan'weni ya yena.

²⁶Timhaka leti seleke ta Pekahiya, ni hinkwaswo leswi a swi endleke, swi tsariwile ebukwini ya Tikronika ta tihosi ta Israele.

²⁷Hi lembe ra 52 ra Azariya, hosi ya Yuda, Peka, n'wana Remaliya, a sungula ku fuma etikweni ra Israele a fuma hi malembe ya makume mambirhi eSamariya.

²⁸A endla leswo biha emahlweni ka Yehovha, a nga fularhelanga swidyoho swa Yerobuwamu n'wana Nebati, la nga dyohisa Israele.

²⁹Emasikwini ya Peka, hosi ya Israele, Tiglata-Pilezere, hosi ya Asiriya, a ta, kutani a teka Iyoni, na Avele-Beta-Maaka, na Yanowaka, na Kedexe, na Hasoro, na Giliyadi, na Galeliya, ni tiko hinkwaro ra Neftali, kutani a fambisa vaaki va kona eAsiriya.

³⁰Kutani Hoxeya, n'wana Ela, a xandzukela Peka, n'wana Remaliya, a n'wi tlhava, a n'wi dlaya; a fuma ematshan'weni ya yena, hi lembe ra makume mambirhi ra Yotamu, n'wana Uziya.

³¹Leswi seleke swa timhaka ta Peka, ni hinkwaswo leswi a swi endleke, swi tsariwile ebukwini ya Tikronika ta tihosi ta Israele.

³²Hi lembe ra vumbirhi ra Peka, n'wana Remaliya, hosi ya Israele, Yotamu, n'wana Uziya, hosi ya Yuda, a sungula ku fuma.

³³A a ri wa malembe ya 25 loko a sungula ku fuma, kutani a fuma malembe ya 16 eYerusalema; vito ra mana wa yena a a ri Yeruxa n'wana Sadoki.

³⁴A endla leswo lulama emahlweni ka Yehovha; a endla hinkwaswo hilaha Uziya, tata wa yena, a endleke hakona.

³⁵Ntsena switsunga a swi susiwanga; tiko ri tshama ri humesa magandzelo, ni ku hisa mirhi ya risuna eswitsungeni. Hi yena la nga aka nyangwa ya le henhla ya yindlu ya Yehovha.

³⁶Leswi seleke swa timhaka ta Yotamu, ni hinkwaswo leswi a swi endleke, xana a swi tsariwanga ebukwini ya Tikronika ta tihosi ta Yuda xana?

³⁷Emikarhini yoleyo, Yehovha a sungula ku rhumela tiko ra Yuda ku ri pfuka, Resini, hosi ya Siriya, na Peka, n'wana Remaliya.

³⁸Yotamu a etlela ni vatata wa yena, a lahliwa ni vatata wa yena emutini wa Davhida tata wa yena; kutani Akazi, n'wana wa yena, a fuma ematshan'weni ya yena.