Read tsonga II Tihosi 16 Bible Online

II Tihosi 16 - tsonga bible

II Tihosi 16

¹Hi lembe ra 17 ra Peka, n'wana Remaliya, Akazi, n'wana Yotamu, hosi ya Yuda, a sungula ku fuma.

²Akazi a a ri wa malembe ya makume mambirhi loko a sungula ku fuma; a fuma malembe ya 16 eYerusalema. A nga endlangi leswi lulameke emahlweni ka Yehovha, Xikwembu xa yena, kukotisa Davhida, tata wa yena;

³kambe a famba endleleni ya tihosi ta Israele, a hisa n'wana wa yena endzilweni, a landzisa sweswo manyala ya matiko lawa Yehovha a ma hlongoleke emahlweni ka vana va Israele.

⁴A humesa magandzelo, ni ku hisa mirhi ya risuna eswitsungeni ni le swintshabyaneni, ni le hansi ka murhi wun'wana ni Wun'wana lowu hlukeke.

⁵Kavaloko Resini, hosi ya Siriya, na Peka, n'wana Remaliya, hosi ya Israele va tlhandluka ku ya hlasela Yerusalema; va rhendzela Akazi, kambe va tsandzeka ku n'wi hlula.

⁶Enkarhini wolowo, Resini, hosi ya Siriya, a tlherisela Elata evuhosini bya Siriya; a hlongola va Yuda, a va humesa eElata; kutani Vasiriya va nghena eElata; va tshamile kona ku fika namuntlha.

⁷Akazi a rhumela Tiglata-Pilezere, hosi ya Asiriya, tintsumi, a ku eka yena: “Ndzi nandza wa wena ni n'wana wa wena; tlhandluka u ndzi ponisa evokweni ra hosi ya Siriya, ni le vokweni ra hosi ya Israele, tihosi leti ti ndzi pfukeke.”

⁸Kutani Akazi a teka silivhere ni nsuku, leswi ngi swi ri endlwini ya Yehovha, ni le xumeni xa yindlu ya hosi a swi rhumela hosi ya Asiriya, wu va ndzuvo.

⁹Hosi ya Asiriya yi n'wi yingisa; kutani hosi ya Asiriya yi tlhandluka! Yi ya lwa na Damaska yi wu teka, yi yisa vaaki va kona eKiri, yi dlaya Resini.

¹⁰Hosi Akazi a ya eDamaska ku ya hlangana na Tiglata-Pilezere, hosi ya Asiriya, kutani a vona alitari leyi nga eDamaska. Kutani hosi Akazi a rhumela Uriya, muprista, xifaniso ni xivumbeko xa alitari leyi.

¹¹Kutani Uriya, muprista, a aka alitari a endla hinkwaswo hilaha hosi Akazi a n'wi leriseke hakona loko a ri Damaska; Uriya, muprista, a endlisa sweswo, hosi Akazi a nga si vuya hi le Damaska.

¹²Kutani hosi yi vuya hi le Damaska, yi vona alitari, hosi yi tshinelela alitari, yi khandziya kona,

¹³yi hisela kona holokosta ya yona, ni gandzelo ra yona, kutani yi chela swakunwa swa yona kona, yi halata ni ngati ya magandzelo ya ku khensa ealitarini.

¹⁴Loko yi ri alitari ya koporo leyi nga emahlweni ka Yehovha, a yi susa evutshan'weni bya yona, emahlweni ka tempele, exikarhi ka alitari leyintshwa ni yindlu ya Yehovha, a yi veka ekusuhi ni alitari ya yena, en'walungwini.

¹⁵Kutani hosi Akazi a lerisa Uriya, muprista, a ku: “U ta hisa ealitarini leyikulu, holokosta ya nimixo ni gandzelo ra madyambu, ni holokosta ya hosi, ni gandzelo ra yona, ni holokosta ya vanhu hinkwavo va tiko, ni magandzelo ya vona, ni vucheleto bya vona; u ta halatela kona ngati hinkwayo ya tiholokosta, ni ngati hinkwayo ya magandzelo; loko yi ri alitari ya koporo, ndzi ta tivonela yona.”

¹⁶Uriya, muprista, a endla hinkwaswo hilaha Akazi a leriseke hakona.

¹⁷Hosi Akazi a fayetela matlhelo ya swikhato, a susa mikamba leyi nga ehenhla ka swona, a xikisa ni lwandle leri nga ehenhla ka tihomu ta koporo, leti ngi ti ri ehansi ka rona, kutani a yi veka exikhatweni xa maribye.

¹⁸A hundzuluxa endlwini ya Yehovha nyangwa ya Savata leyi akiweke endlwini, ni nyangwa ya handle ya hosi, hikwalaho ka hosi ya Asiriya.

¹⁹Leswi seleke swa timhaka ta Akazi, ni leswi a swi endleke, xana a swi tsariwanga ebukwini ya Tikronika ta tihosi ta Yuda xana?

²⁰Akazi a etlela ni vatata wa yena, a lahliwa ni vatata wa yena, emutini wa Davhida; kutani Hezekiya, n'wana wa yena, a fuma ematshan'weni ya yena.