Read tsonga II Tihosi 17 Bible Online

II Tihosi 17 - tsonga bible

II Tihosi 17

¹Hi lembe ra khume na mambirhi ra Akazi, hosi ya Yuda, Hoxeya, n'wana Ela, a sungula ku fuma etikweni ra Israele, eSamariya, a fuma malembe ya ntlhanu na mune.

²A endla leswi biheke emahlweni ka Yehovha, ntsena ku nga ri kukotisa tihosi ta Israele leti ngi ti ri emahlweni ka yena.

³Xalimanezere, hosi ya Asiriya a tlhandluka ku lwa na yena; kutani Hoxeya a va ehansi ka yena, a n'wi humesela ndzuvo.

⁴Hosi ya Asiriya yi vona leswaku Hoxeya a endle makungu ku yi pfuka, hikuva a a rhumile tintsumi eka So, hosi ya Egipta; na swona a nga ha rhumelanga hosi ya Asiriya ndzuvo kukotisa hi malembe. Kutani hosi ya Asiriya yi n'wi pfalela, yi n'wi boha ekhotsweni.

⁵Kutani hosi ya Asiriya yi nghena etikweni hinkwaro, yi tlhandlukela eSamariya, yi wu rhendzela hi malembe manharhu.

⁶Hi lembe ra ntlhanu na mune ra Hoxeya, hosi ya Asiriya yi teka Samariya, yi fambisa Vaisraele etikweni ra Asiriya, kutani yi va akisa eHala, ni le henhla ka Habori, nambu wa Gozana, ni le mitini ya Vameda.

⁷Hikuva vana va Israele a va dyohele Yehovha, Xikwembu xa vona, loyi a va humeseke etikweni ra Egipta, ehansi ka voko ra Faro, hosi ya Egipta, kutani va chavile swikwembu swin'wana.

⁸Va landzile mikhuva ya matiko lawa Yehovha a ma hlongoleke emahlweni ka vana va Israele, ni leyi tihosi ta Israele ti yi leriseke.

⁹Vana va Israele va sandzile Yehovha, Xikwembu xa vona hi swilo leswi nga lulamangiki. Va tiakerile xitsunga emitini hinkwayo ya vona, ku sungula hi tindlu leto leha ta valanguteri ku fika emitini ya makhokholo.

¹⁰Va tiyimisele swifaniso, ni swifaniso swa Axera eswitsungeni hinkwaswo leswi tlakukeke, ni le hansi ka murhi wun'wana ni wun'wana lowu hlukeke.

¹¹Va hisile mirhi ya risuna eswitsungeni hinkwaswo, kukotisa matiko lawa Yehovha a ma suseke emahlweni ka vona; va endlile swilo leswo biha ku pfuka Yehovha.

¹²Kambe va tirhela swifaniso leswi Yehovha a va byeleke ha swona: “Mi nga tshuki mi swi endla.”

¹³Yehovha u byerile Israele na Yuda hi vaprofeta hinkwavo va yena, ni vavoni hinkwavo, a ku: “Tlhelani etindleleni leto biha ta n'wina, mi hlayisa ku lerisa ka mina ni milawu ya mina, hilaha ndzi nyikeke vatata wa n'wina nawu hinkwawo, hilaha ndzi mi rhumeleke wona hi malandza ya mina vaprofeta.”

¹⁴Kambe a va yingisanga, va nonon'hwisile tinhamu ta vona kukotisa vatata wa vona lava nga pfumelangiki eka Yehovha Xikwembu xa vona.

¹⁵Va sandza milawu ya yena, ni ntwanano wa yena lowu a wu endleke ni vatata wa vona, ni ku layiwa loku a va layeke hakona; va landza swahava, kutani va hundzuka swahava, va ri karhi va famba endzhaku ka matiko lawa ma va rhendzeleke, lawa Yehovha a va leriseke leswaku va nga tshuki va endla kukotisa wona.

¹⁶Va tshika milawu hinkwayo ya Yehovha, Xikwembu xa vona, kutani va tiendlela marhole lama chuluriweke va tiendlela ni swifaniso swa Axera va khinsama emahlweni ka vandla hinkwaro ra matilo, va tirhela Baali.

¹⁷Va hisa endzilweni vana va vona va xinuna ni va xisati, va tinyiketa ku bvumbha ni vuloyi, va tinyiketa ku endla leswo biha emahlweni ka Yehovha ni ku n'wi pfuka.

¹⁸Kutani Yehovha a karihela ngopfu Vaisraele, a va susa emahlweni ka yena, a ku salanga nchumu wa vona loko yi nga ri nyimba ya Yuda ntsena.

¹⁹Hambi a ri Yuda a nga hlayisangi milawu ya Yehovha, Xikwembu xa yena, va landza mikhuva ya Vaisraele leyi va tivekeleke yona.

²⁰Kutani Yehovha a cukumeta rixaka hinkwaro ra Israele, a va tsongahata, a va nyiketa emavokweni ya vayivi, a ko a va susa emahlweni ka yena.

²¹Hikuva Vaisraele va tiavanyisile eka yindlu ya Davhida, va vekile hosi Yerobuwamu, n'wana Nebati, kutani Yerobuwamu a hambukisa Israele leswaku va nga landzi Yehovha, a va dyohisa hi xidyoho lexikulu.

²²Vana va Israele va landza swidyoho hinkwaswo leswi endliweke hi Yerobuwamu, a va fularhelanga swona.

²³Yehovha a ko a susa Israele emahlweni ka yena, hilaha a nga vula hi nomu wa malandza ya yena hinkwawo, va nga vaprofeta, a susa va Israele etikweni ra vona a va yisa eAsiriya, laha va nga kona ku fika namuntlha.

²⁴Hosi ya Asiriya yi tisa vanhu va Babilona, ni va Kuta, ni va Avha, ni va Hamata, ni va Sefari-Vhayimi, yi va akisa emitini ya Samariya ematshan'weni ya vana va Israele, kutani va fuma tiko ra Samariya, va aka emitini ya rona.

²⁵Kuteloko va sungurile ku aka kona, a va nga chavi Yehovha, kutani Yehovha, a va rhumela tinghala ti va dlaya.

²⁶Kutani va tivisa hosi ya Asiriya, va ku: “Matiko lawa u ma yiseke kona, lawa u ma akiseke emitini ya Samariya, a va tivi nawu wa Xikwembu xa tiko leri, kutani xi va rhumele tinghala leti va dlayaka, hikuva a va tivi nawu wa Xikwembu xa tiko leri.”

²⁷Kavaloko hosi ya Asiriya, yi lerisa, yi ku: “Tlheriselani kona un'wana wa vaprista lava mi va suseke kona, a ya aka kona, a va dyondzisa nawu wa Xikwembu xa kona.”

²⁸Kutani un'wana wa vaprista lava susiweke eSamariya, a ta aka eBetele, a va dyondzisa hilaha va fanelaka ku chava Yehovha hakona.

²⁹Kutani tiko rin'wana ni rin'wana ri tiendlela swikwembu swa rona emitini leyi va akeke eka yona, va swi veka etindlwini ta xitsunga leti Vasamariya va ti akeke.

³⁰Vanhu va Babilona va endla Sukoti-Benoti, vanhu va Kuta va endla Nergala, vanhu va Hamata va endla Axima.

³¹Va Avha va endla Nibahazi na Tartaka, va Sefari-Vhayimi va humesela Adrameleke na Anameleke, swikwembu swa Sefari-Vhayimi vana va vona va xinuna, va va hisa hi ndzilo.

³²A va chava na Yehovha, kutani va tiendlela vaprista lava humaka etikweni hinkwaro; vona va va humesela magandzelo etindlwini ta switsunga.

³³A va chava Yehovha, kambe a va tirhela swikwembu swa vona hi mikhuva ya matiko lawa va tekiweke ka wona.

³⁴Ku fikela namuntlha va landzela mikhuva ya vona ya ku sungula, va nga chavi Yehovha ntsena; kambe a va landzi milawu ni mikhuva ya vona, hambi wu ri nawu ni ku lerisa loku Yehovha a ku leriseleke vana va Yakobo, loyi a n'wi thyeke vito ra Israele.

³⁵Yehovha a a endlile ntwanano na vona, a va lerisile, a ku: “Mi nga tshuki mi chava swikwembu swin'wana, mi nga khinsami emahlweni ka swona, mi nga swi tirheli ni ku swi gandzela.

³⁶Kambe mi ta chava Yehovha la mi humeseke etikweni ra Egipta hi matimba lamakulu ni voko leri tlakukeke, mi ta khinsama emahlweni ka yena, mi n'wi humesela magandzelo.

³⁷Mi ta hlayisa hi masiku mikhuva ni ku lerisa, ni nawu, ni marito lawa a mi leriseke wona, mi nga tshuki mi chava swikwembu swin'wana.

³⁸Mi nga tshuki mi rivala ntwanano lowu ndzi wu endleke na n'wina, mi nga tshuki mi chava swikwembu swin'wana;

³⁹kambe mi ta chava Yehovha, Xikwembu xa n'wina, hikuva hi yena la nga ta mi ponisa emavokweni ya valala hinkwavo va n'wina.”

⁴⁰A va yingisanga, kambe va landzile mikhuva ya vona yo sungula.

⁴¹Vamatiko lawa, va chava Yehovha, kambe va tirhela swifaniso swa vona, kutani vana va vona ni vatukulu va vona va endla hilaha vatata wa vona va endleke hakona, ku fika namuntlha.