Read tsonga II Tihosi 3 Bible Online

II Tihosi 3 - tsonga bible

II Tihosi 3

¹Yoramu, n'wana Akabu, a fuma etikweni ra Israele eSamariya hi lembe ra 18 ra Yoxafati, hosi ya Yuda, a fuma hi malembe ya khume na mambirhi.

²A endla leswo biha emahlweni ka Yehovha, ntsena ku nga ri kukotisa tata wa yena ni mana wa yena; hikuva u susile xifaniso xa Baali lexi tata wa yena a xi endleke.

³Ntsena a namarhela swidyoho swa Yerobuwamu, n'wana Nebati, leswi a dyohiseke Israele ha swona, a nga swi fularhelanga.

⁴Mexa, hosi ya Mowabu, a a fuwe tinyimpfu, kutani a a hamba a humesela hosi ya Israele ndzuvo wa swinyimpfana swa 100 000 ni tinyimpfu ta 100 000, swi ri ni voya bya swona.

⁵Kuteloko Akabu a file, hosi ya Mowabu a pfuka hosi ya Israele.

⁶Kavaloko hosi Yoramu a huma eSamariya, a kamba nyimpi hinkwayo ya Israele.

⁷Kutani a suka a famba, a rhumela Yoxafati, hosi ya Yuda, tintsumi, a ku: “Hosi ya Mowabu yi ndzi pfukile; xana u ta famba na mina, hi ya lwa na Mowabu xana?” Yena a ku: “Ndzi ta famba kukota wena; ni tiko ranga ri ta va kukota tiko ra wena, ni tihanci ta mina ti va kukota tihanci ta wena.”

⁸Kutani a ku: “Hi ta famba hi ndlela yihi xana?” Yoramu a ku: “Hi ndlela ya mananga ya Edomu.”

⁹Hosi ya Israele yi suka yi ri ni hosi ya Yuda ni hosi ya Edomu. Kuteloko va fambile masiku ya ntlhanu na mambirhi, nyimpi ni swifuwo leswi va landzeke swi pfumala mati.

¹⁰Kutani hosi ya Israele yi ku: “Yo! Mowabu!”

¹¹Yoxafati a ku: “A ku na muprofeta wa Yehovha haleno, leswaku hi vutisa Yehovha ha yena-ke?” Kavaloko nandza un'wanyana wa hosi ya Israele a hlamula, a ku: “Ku na Elixa, n'wana Xafati la ngi a chela mati emavokweni ya Eliya.”

¹²Yoxafati a ku: “Rito ra Yehovha ri na yena.” Kutani hosi ya Israele na Yoxafati, ni hosi ya Edomu, va ngirimela eka yena.

¹³Elixa a ku eka hosi ya Israele: “Ndzi ni mhaka yihi na wena-ke? Yana eka vaprofeta va tata wa wena, ni le ka vaprofeta va mana wa wena!” Hosi ya Israele yi ku eka yena: “E-e, hikuva Yehovha u vitanile tihosi letinharhu ku ti nyiketa emavokweni ya Mowabu.”

¹⁴Elixa a ku: “Yehovha wa mavandla, loyi ndzi yimaka emahlweni ka yena wa hanya! Loko ku nga ri hikwalaho ka Yoxafati, hosi ya Yuda, ingi ndzi nga ku languti, ndzi nga ku voni.

¹⁵Kambe sweswi, ndzi tiseleni la tivaka ku yimba haripa.” Kutani kakuloko muyimbi a yimba, voko ra Yehovha ri va ehenhla ka Elixa.

¹⁶Kutani a ku: “Yehovha u vurisa sweswo, a ku: ‘Celani makhele layo tala enkoveni lowu!’

¹⁷Hikuva Yehovha u vurisa sweswo, a ku: ‘Mi nga ka mi nga voni moya, mi nga ka mi nga voni mpfula, kambe xinkobyana lexi, xi ta tala hi mati, mi ta nwa n'wina ni mitlhambi ya n'wina, ni swifuwo swa n'wina.’

¹⁸Kambe i xilo lexitsongo emahlweni ka Yehovha, a ta engeta a nyiketa Mowabu emavokweni ya n'wina:

¹⁹Mi ta hlasela miti hinkwayo ya makhokholo, ni miti hinkwayo ya tinhenha, mi ta tsema mirhi hinkwayo leyo saseka, mi siva swihlovo hinkwaswo swa mati, mi onha masimu hinkwawo layo saseka hi maribye.”

²⁰Kute nimixo, hi nkarhi wa ku humesa gandzelo, maswivo, mati ma ta hi ndlela ya Edomu, tiko ri tala hi mati.

²¹Vamowabu hinkwavo, kuteloko va swi twile leswaku tihosi leti a ti tlhandlukile ku lwa na vona, va hlengeletana, va yima endzilakaneni va ri hinkwavo lava hlomeke ni van'wana.

²²Va pfuka nimixo kutani kakuloko dyambu ri tsuvuka ehenhla ka mati, Vamowabu va vona emahlweni ka vona mati layo tshwuka kukotisa ngati.

²³Kutani va ku: “I ngati! Tihosi ti dlayanile ti tlhavanile! Sweswi, n'wee Vamowabu a hi phangeni!”

²⁴Kuteloko va fika emixaxeni ya Israele, Vaisraele va pfuka, va lwa ni Vamowabu, kutani va tsutsuma emahlweni ka vona; va Israele va nghena etikweni ra vona, va heta Vamowabu.

²⁵Va mbundzuxa miti, kutani wanuna un'wana ni un'wana a hoxa ribye ra yena emasin'wini hinkwawo layo saseka, va ma tata, va siva swihlovo hinkwaswo swa mati, va tsema ni mirhi hinkwayo leyo saseka; lava hoxaka hi swipelupelu va rhendzela Kiri-Harasete, va wu hlasela, va tshika maribye ntsena eka wona.

²⁶Hosi ya Mowabu, kuteloko yi vonile leswaku ya hluriwa, yi teka na yona vavanuna va 700 lava hlomeke va lava ku huma etlhelo ra hosi ya Edomu, kambe va tsandzeka.

²⁷Kavaloko yi teka n'wana wa yona wa mativula, loyi a faneleke ku fuma ematshan'weni ya yona, yi n'wi humesa yi endla gandzelo leri hisiwaka ha yena erirhangwini. Kutani ku holova lokukulu ku va kona exikarhi ka Vaisraele, va tshika hosi ya Mowabu, va suka va tlhelela etikweni ra vona.