Read tsonga II Tihosi 7 Bible Online

II Tihosi 7 - tsonga bible

II Tihosi 7

¹Kutani Elixa a ku: “Yingisani rito ra Yehovha!” Yehovha u vurisa sweswo, a ku: “Mundzuku hi nkarhi wolowo, mpimo wun'we wa mapa yo saseka wu ta xaviwa hi xikele, ni mipimo mimbirhi ya barley hi xikele, enyangweni ya Samariya.”

²Kutani ndhuna ya hosi leyi yi tiseketelaka evokweni ra yona, yi hlamula yi ku eka munhu wa Xikwembu: “Hambi Yehovha a nga boxa mafasitere etilweni, mhaka leyo tano yi nga ka yi nga humeleli.” Elixa a hlamula, a ku: “U ta swi vona hi mahlo, kambe u nga ka u nga dyi swona.”

³Enyangweni ya muti a ku ri ni vanhu va nhlokonho, va mune va byelana, va ku: “Hi ta tshama kwala hi ko hi fa xana?

⁴Loko hi ku: ‘A hi ngheneni emutini,’ ndlala yi kona emutini hi ta ya fela kona, loko hi tshama halenu, hi ta fa na kona. Loko swi ri tano, a hi sukeni, hi ngirimela emagoveleni ya Vasiriya, loko va hi tshika hi hanya, hi ta hanya; loko va hi dlaya, hi ta fa.”

⁵Kutani va suka nimadyambu va ya nghena emixaxeni ya Vasiriya; kutani waswivo, a ku nga ri na munhu.

⁶Hikuva Yehovha a a twarisile emagoveleni ya Vasiriya mpfumawulo wa tigolonyi ni wa tihanci ni wa nyimpi leyikulu, kutani va byelana, va ku: “Hosi ya Israele yi hi rhambele tihosi ta Vahiti ni tihosi ta Egipta ku ta hi hlasela.”

⁷Kutani va pfuka va tsutsuma nimadyambu, va tshika mitsonga ya vona ni tihanci, ni timbhongolo ta vona, mixaxa yi sarise xi sweswo, vona va tsutsuma ku ponisa vutomi bya vona.

⁸Va nhlokonho va ya fika emakun'wini ya mixaxa, va nghena entsongeni wun'wana, va dya, va nwa, va tlakula silivhere ni nsuku, ni tinguvu, va ya swi fihla. Kuteloko va tlherile va nghena entsongeni wun'wana, va phanga xuma, va ya xi fihla.

⁹Kutani va byelana, va ku: “A hi endli swona! Siku leri i siku ra mahungu lamanene kasi ho miyela ntsena: kutakuloko hi langutela ku xa, hi ta kumiwa hi ri ni nandzu. Sweswi, a hi yeni, hi ya tivisa yindlu ya hosi.”

¹⁰Kavaloko va famba va ya huwelela eka valanguteri va muti, va va tivisa, va ku: “Hi nghenile emixaxeni ya Vasiriya, kutani a hi kumanga munhu, a hi twanga na rito ra munhu; i tihanci ntsena leti bohiweke, ni timbhongolo leti hohiweke ni mitsonga yi lo rhula ntsena.”

¹¹Sweswo va vitana valanguteri, kutani va tivisa timhaka leti endlwini ya hosi.

¹²Hosi yi pfuka nivusiku, yi ku eka malandza ya yona: “Ndzi ta mi tivisa leswi Vasiriya va hi endleke swona. Va tiva leswaku hi ni ndlala leyikulu, kutani va humile emixaxeni ku ya tumbela enhoveni, va ku: ‘Kutakuloko va huma emutini, hi ta va khoma va ha hanya kutani hi nghena emutini.’ ”

¹³Kambe un'wana wa malandza ya yena a hlamula, a ku: “A va rhange va teka tihanci ta ntlhanu leti seleke emutini, ti fana ni vunyingi hinkwabyo bya Israele lebyi herisiwaka, a hi ti rhumeni, hi ta swi vona.”

¹⁴Kavaloko va teka tigolonyi letimbirhi ni tihanci ta wona, kutani hosi yi rhuma vanhu emixaxeni ya Vasiriya, yi ku eka vona: “Fambani mi ya swi vona.”

¹⁵Kutani va suka, va va landza ku ya fika eYordani, va vona ndlela leyi andlariweke hi tinguvu ni matlhari leswi cukumetiweke hi Vasiriya loko va tsutsuma; kutani tintsumi ti tlhela ti ya tivisa hosi.

¹⁶Kavaloko tiko ri huma ri ya phanga mixaxa ya Vasiriya, kutani mpimo wa mapa layo saseka wu xaviwa hi xikele, ni mipimo mimbirhi ya barley hi xikele, hilaha Yehovha a nga vula hakona.

¹⁷Hosi a yi rhumile enyangweni ndhuna leyi yi tiseketelaka evokweni ra yona kutani yi phyandlasiwa enyangweni ehansi ka mikondzo ya vunyingi. Kutani yi fa, hilaha munhu wa Xikwembu a nga vula hakona, siku hosi yi ngirimeleke eka yena.

¹⁸Hikuva, kakuloko munhu wa Xikwembu a vulavula ni hosi, a ku: “Mundzuku hi nkarhi wolowo, enyangweni ya Samariya, mipimo mimbirhi ya barley yi ta xaviwa hi xikele, ni mpimo wa mapa layo saseka hi xikele,”

¹⁹ndhuna a yi hlamurile, yi ku eka munhu wa Xikwembu: “Hambi Yehovha a nga boxa mafasitere etilweni, swi nga va tano xana?” Elixa a hlamula, a ku: “U ta swi vona hi mahlo kambe u nga ka u nga dyi.”

²⁰A humeleriwa hi sweswo, vunyingi byi n'wi phyandlasa hi mikondzo enyangweni, a fa.