Read tsonga I Tikronika 11 Bible Online

I Tikronika 11 - tsonga bible

I Tikronika 11

¹Vaisraele hinkwavo va hlengeletana eka Davhida, eHebroni, va ku eka yena: “Waswivo hina hi marhambu ya wena ni nyama ya wena.

²Hambi ku ri khale, loko Sawulo a ha ri hosi, hi wena loyi a wu humesa tiko ra Israele, ni ku ri tlherisa; Yehovha, Xikwembu xa wena, xi ku byerile, xi ku: ‘Hi wena loyi u nga ta risa tiko ra mina ra Israele, hi wena loyi u nga ta va mufambisi wa tiko ra mina ra Israele.’ ”

³Kavaloko vakulukumba hinkwavo va Israele va ta eka hosi eHebroni, Davhida a endla xinakulobye na vona emahlweni ka Yehovha eHebroni, kutani va chela Davhida hi mafurha leswaku a va hosi ya Israele, hilaha Yehovha a nga lerisa hakona hi nomu wa Samiele.

⁴Davhida a famba ni Vaisraele hinkwavo a kongoma eYerusalema, (i Yebusi); Vayebusi, lava akeke etikweni, a va ri kona.

⁵Vaaki Vayebusi va ku eka Davhida: “U nga ka u nga ngheni halenu!” Kavaloko Davhida a teka khokholo ra Siyoni, a nghena: i muti wa Davhida.

⁶Kambe Davhida a ku: “Mani na mani la nga ta rhanga a hlula Vayebusi u ta va hosana ni ndhuna.” Kutani Yowabu, n'wana Seruya, a rhanga a tlhandluka, kutani a vekiwa hosana.

⁷Davhida a aka ekhokholweni, hikwalaho va ri thyile muti wa Davhida.

⁸A tiyisa rirhangu ra muti ku suka eMilo, ematlhelweni hinkwawo, kutani Yowabu a pfuxa leswi seleke swa muti.

⁹Davhida a a ri karhi a ya emahlweni, a kula hi matimba, kutani Yehovha wa mavandla a a ri na yena.

¹⁰Hi tona tindhuna ta tinhenha ta Davhida leti n'wi tiyiseke evuhosini bya yena, kun'we ni Vaisraele hinkwavo, ku n'wi veka hosi, hilaha Yehovha a nga vula hakona ehenhla ka Israele.

¹¹Hi wona ntsengo wa tinhenha ta Davhida: Yaxobeyama, n'wana Hakimoni ndhuna yin'wana leyikulu a tlakusa tlhari ra yena ehenhla eka vavanuna va madzana manharhu lava a va dlayeke kan'we.

¹²Endzhaku ka yena, Eliyazara, n'wana Dodo, wa Ahohi; a yi ri yin'wana ya tinhenha tinharhu.

¹³A a ri na Davhida ePasa-Damini, loko Vafilista va hlengeletanile kona ku lwa; nsimu ya barley a yi ri kona, kutani tiko a ri ri karhi ri tsutsuma emahlweni ka Vafilista.

¹⁴Va yima exikarhi ka nsimu, va yi lwela, va hlula Vafilista; kutani Yehovha a va ponisa hi matimba.

¹⁵Tindhuna tinharhu ta leta makume manharhu, ti xikela eribyeni eka Davhida, ebakweni ra Adulama; Vafilista a va govile enkoveni wa Varefayimi.

¹⁶Enkarhini wolowo Davhida a a ri ekhokholweni, kutani a ku ri ni ntlawa wa valanguteri va Vafilista, eBetlehema.

¹⁷Davhida a sungula ku navela, a ku: “I mani la nga ta ndzi nwisa mati ya xihlovo lexi nga enyangweni ya Betlehema?”

¹⁸Kavaloko tinhenha letinharhu ti suka, ti hundza exikarhi ka mixaxa ya Vafilista, ti ya ka mati exihlobyeni lexi nga enyangweni ya Betlehema; va ma tisa, va nyika Davhida; kambe Davhida a ala ku ma nwa, kutani a ma halatela emahlweni ka Yehovha,

¹⁹a ku: “Kule na mina! Xikwembu a xi ndzi sivele ku endlisa sweswo! Xana ndzi ta nwa ngati ya vanhu lava nga hlayisangiki vutomi bya vona xana?” Hikuva va tisile mati lawa hi ku tshika vutomi bya vona, kutani a ala ku nwa. Hi swona leswi endliweke hi tinhenha letinharhu.

²⁰Abixayi, makwa Yowabu, a a ri hosi ya tindhuna, a tlakusa tlhari ra yena ehenhla ka vanhu va madzana manharhu, a va dlaya A dzunisiwa exikarhi ka lavanharhu.

²¹Exikarhi ka lavanharhu, a tlula van'wana hi ku dzunisiwa, a va hosi ya vona, kambe a nga kotisanga lavanharhu vo sungula.

²²Benaya, n'wana Yehoyada, n'wana Kabisele, nhenha leyikulu hi mitirho ya yena, hi yena la tlhaveke tinghala timbirhi ta xikwembu ta Mowabu, Hi yena kambe la ngirimeleke exihlobyeni, a tlhava nghala kona hi siku ra gamboko.

²³Hi yena kambe la tlhaveke Muegipta, wanuna lonkulu wa swisungunhu swa ntlhanu exiyin'weni xa yena. Muegipta a a tamele evokweni ra yena tlhari leri fanaka ni mhandze ya muluki; Benaya a ngirimela eka yena a tamele nhonga kutani a hlomula tlhari evokweni ra Muegipta, a n'wi dlaya hi tlhari ra yena.

²⁴Hi swona leswi endliweke hi Benaya, n'wana Yehoyada; a dzunisiwa exikarhi ka tinhenha letinharhu.

²⁵A tlula lava makume manharhu hi ku dzunisiwa kambe a nga kotisanga lavanharhu vo sungula. Davhida a n'wi nghenisa ehubyeni ya yena ya le xihundleni.

²⁶Tinhenha ta nyimpi a a ri: Asahele, makwa Yowabu; Elihanani, n'wana Dodo, wa Betlehema;

²⁷Xama wa Haroda; Helese, wa Peloni;

²⁸Ira n'wana Ikexe, wa Tekowa; Abiezere, wa Anatoto;

²⁹Sibekayi, wa Huxa; Ilayi, wa Ahohi;

³⁰Maharayi, wa Netofa; Helede, n'wana Baana, wa Netofa;

³¹Itayi, n'wana Ribayi, wa Gibeya wa vana va Benjamini, Benaya, wa Piratoni;

³²Hurayi, wa Nakale-Gaaxi; Abiele, wa Araba;

³³Azimavhete, wa Baharumi; Eliyahaba, wa Xaaliboni;

³⁴Bene-Haxeme, wa Gizoni; Yonatani, n'wana Xage, wa Harari;

³⁵Ayihama, n'wana Sakara, wa Harari; Elifala n'wana Uri;

³⁶Hefere, wa Mekera; Ahiya, wa Peloni;

³⁷Hesiro, wa Karmele; Naarayi, n'wana Ezibayi;

³⁸Yuwele, makwa Natani; Mibihara, n'wana Hageri;

³⁹Seleke, wa ka Amoni; Naharayi, wa Beroto, mutameri wa matlhari ya Yowabu, n'wana Seruya;

⁴⁰Ira wa Yitira; Garebe, wa Yitira;

⁴¹Uriya, wa ka Hiti; Zabada n'wana Ahilayi;

⁴²Adina, n'wana Xiza, wa Rhuveni, ndhuna ya va Rhuveni, vavanuna va makume manharhu a va ri na yena;

⁴³Hanana, n'wana Maaka; na Yoxafati, wa Mitina;

⁴⁴Uziya, wa Axitaroto, Xama na Yehiele, vana va Hotamu, wa Arowere.

⁴⁵Yediele, n'wana Ximri; na Yoha, makwavo wa Tisi;

⁴⁶Eliele, wa Mahavha, Yeribayi, na Yoxavhiya, vana va Elnaama; Yitima, wa Mowabu;

⁴⁷Eliele, na Obede, na Yaasiele wa Metsobaya.