Read tsonga I Tikronika 12 Bible Online

I Tikronika 12 - tsonga bible

I Tikronika 12

¹Hi vona lava yeke eka Davhida eSikilaga, loko a ha tshamile ekule na Sawulo, n'wana Kixi; a va ri exikarhi ka tinhenha leti n'wi pfuneke enyimpini;

²a va copa miseve hi vurha, va tiva ni ku hoxa maribye hi voko ra xinene ni voko ra ximatsi, va huma exikarhi ka vamakwavo va Sawulo, va ka Benjamini:

³Ndhuna Ahiezere na Yowasi, n'wana Xema, wa Gibeya, na Yeziele, na Pelete, n'wana Azimavhete; na Beraka, na Yehu, wa Anatoto;

⁴na Iximaya, wa Gibiyoni munhu wa matimba exikarhi ka lava makume manharhu, ni ndhuna ya vona; na Yeremiya, na Yahaziele na Yohanani, na Yozabadi wa Gedera;

⁵Eluzayi, na Yerimoto, na Beyaliya, na Xemariya, na Xefatiya, wa Harufi;

⁶Elikana na Yixiya, na Asarele, na Yowezere, na Yaxobeyama, va ka Kora;

⁷na Yowela, na Zebadiya, n'wana Yerohama, wa Gedori.

⁸Vavanuna van'wana va matimba, va sukele va Gadi ku ya eka Davhida ekhokholweni emananga, ti ri tinhenha, leti tivaka ku lwa enyimpini, ti tamele switlhangu ni matlhari; tinghohe ta tona a ti fana ni tinghohe ta tinghala, a ti tsutsuma kukotisa timbavala etintshaveni:

⁹A a ri: Ezere, ndhuna; Obadiya, wa vumbirhi, Eliyabu, wa vunharhu;

¹⁰Miximana, wa vumune; Yeremiya, wa vuntlhanu;

¹¹Atayi, wa ntlhanu na un'we Eliele, wa ntlhanu na vambirhi:

¹²Yohanani, wa ntlhanu na vanharhu; Elizabada, wa ntlhanu na mune;

¹³Yeremiya, wa vukhume; Maki-Banayi, wa khume na un'we.

¹⁴Vavanuna lava a va huma exikarhi ka vana va Gadi a ti ri tindhuna ta nyimpi, lontsongo wa vona a a pfukela dzana, ni lonkulu khume ra madzana.

¹⁵Hi vona lava peleke Yordani hi n'hweti yo sungula loko wu halaka emabuweni ya wona, va hlongorisa hinkwavo vaaki va mikova, evuxeni ni le vupeladyambu.

¹⁶A ku ri ni vana va Benjamini, ni va Yuda lava yeke eka Davhida ekhokholweni.

¹⁷Davhida a humela emahlweni ka vona, a vulavula na vona, a ku: “Kungakuloko mi ta eka mina hi ku rhula, ku ndzi pfuna, ndzi ta hlangana na n'wina hi mbilu; kambe loko ku ri ku ndzi xenga, mi va mi ndzi nyiketa eka valala va mina hambi ndzi nga endlelanga munhu hi matimba, Xikwembu xa vatata wa hina a xi swi vone, a xi avanyise!”

¹⁸Kavaloko Moya wu ta eka Amasayi ndhuna ya tinhenha, a ku: “Hi vanhu va wena, Davhida, hi na wena, n'wana Yese! Ku rhula, ku rhula a ku ve na wena, ku rhula ku va na loyi a ku pfunaka, hikuva Xikwembu xa wena xi ku pfunile.” Kutani Davhida a va amukela, a va veka exikarhi ka tindhuna ta nyimpi ya yena.

¹⁹A ku ri ni vanhu va Manase lava yeke eka Davhida loko a huma nyimpi ni Vafilista ku lwa na Sawulo. Kambe a va pfunanga Vafilista, hikuva, kuteloko va endlile makungu, tindhuna ta Vafilista ti tlherisa Davhida, ti ku: “U ta hundzela eka hosi ya yena Sawulo, hambiloko a fanele ku humesa tinhloko ta hina.”

²⁰Loko a ya eSikilaga, valavo va Manase va ya eka yena: a a ri Adina na Yozabadi, na Yediyaele, na Mikaele na Yozabadi, na Elihu, na Silitayi, ti ri tindhuna ta khume ra madzana ta Manase.

²¹Vanhu lava va pfuna Davhida loko a lwa ni mavandla ya vayivi, hikuva a va ri hinkwavo vanhu va matimba, va vekiwa tindhuna enyimpini.

²²Siku rin'wana ni rin'wana vanhu va ta eka Davhida ku n'wi pfuna, a kondza a va ni mixaxa leyikulu, kukotisa mixaxa ya Xikwembu.

²³Hi wona ntsengo wa vavanuna lava hlomeke, lava yeke eka Davhida eHebroni, ku n'wi veka hosi ematshan'weni ya Sawulo hilaha Yehovha a leriseke hakona.

²⁴Vana va Yuda lava tamelaka xitlhangu ni tlhari va ri 6 800, lava hlomaka ku huma nyimpi.

²⁵Vana va Simiyoni, vavanuna va matimba lava tiyeke enyimpini, va ri 7 100.

²⁶Vana va Levhi va ri 4 600;

²⁷na Yehoyada, hosana ya yindlu ya Aroni, a a ri ni vavanuna va 3 700;

²⁸na Sadoki, jaha ra matimba, ni yindlu ya tata wa yena, ti ri tihosana ta 22.

²⁹Vana va Benjamini, vamakwavo va Sawulo, a va ri 3 000, hikuva ku fika enkarhini lowu, vunyingi bya vona bya ha namarhele yindlu ya Sawulo.

³⁰Vana va Efrayimi, a va ri 20 800, vavanuna va matimba lava twakaleke, hi tindlu ta vatata wa vona.

³¹Va hafu ya nyimba ya Manase a va ri 18 000 lava vitaniweke hi mavito ya vona ku ya veka Davhida hosi.

³²Vana va Isakara, lava tivisisaka mikarhi ku tiva leswi Israele a fanelaka ku swi endla; ti ri tihosana ta madzana mambirhi, ni vamakwavo hinkwavo ehansi ka vona.

³³Va Zebuloni, vavanuna lava humaka nyimpi, lava hlomeke matlhari hinkwawo ya nyimpi, a va ri 500 000 lava humaka eku lweni hi timbilu leti tiyeke.

³⁴Va Neftali, tihosana ta khume ra madzana, a ti ri ni vavanuna va 37 000, lava tamelaka switlhangu ni matlhari.

³⁵Va Dani, lava hlomeke a va ri 28 600.

³⁶Va Asere, vavanuna lava humaka nyimpi, lava tilunghiseleke ku lwa, a va ri 40 000.

³⁷Ehase ka Yordani, va Rhuveni, ni va Gadi, ni va hafu ya nyimba ya Manase, lava tamelaka matlhari hinkwawo ya nyimpi, a va ri 120 000.

³⁸Vavanuna lava hinkwavo, lava hlomeke, lava humaka nyimpi, va ta Hebroni, va ri ni mbilu yin'we ku veka Davhida hosi ehenhla ka Vaisraele hinkwavo. Ni hinkwavo lava seleke va Israele, a va ri ni mbilu yin'we ku veka Davhida hosi.

³⁹Kutani va tshama kona masiku manharhu na Davhida, va dya, va nwa, hikuva vamakwavo a va va lunghisele hinkwaswo.

⁴⁰Hambi va ri lava akeke ekusuhi na vona, ku fika eka Isakara na Zebuloni, na Neftali, a va tisa timbuva hi timbhongolo, ni tikamela, ni timula, ni tihomu, ti ri timbuva ta mapa, ni mabuwu ya makuwa lama omeke, ni mihandzu ya vhinya leyi omeke, ni vhinyo, ni mafurha, ni tihomu, ni tinyimpfu leto tala, hikuva va Israele a va tsakile ngopfu.