Read tsonga I Tikronika 15 Bible Online

I Tikronika 15 - tsonga bible

I Tikronika 15

¹Davhida a tiakela tindlu emutini wa Davhida, kutani a lunghisela areka ya Xikwembu ndhawu, a yi yimisela ntsonga.

²Kutani Davhida a ku: “A ku na munhu la nga ta rhwala areka ya Xikwembu loko va nga ri Valevhi, hikuva Yehovha u va hlawurile ku rhwala areka ya Xikwembu, ni ku tirha ntirho wa yona hi masiku.”

³Davhida a hlengeleta Vaisraele hinkwavo eYerusalema, ku heleketa areka ya Yehovha endhawini leyi a yi lunghiseleke.

⁴Kutani Davhida a hlengeleta vana va Aroni ni Valevhi:

⁵va vana va Kohata: Uriele, hosana, ni vamakwavo va ri 120.

⁶Va vana va Merari: Asaya, hosana, ni vamakwavo, va ri vavanuna va 220.

⁷Va vana va Gerixomu: Yuwele, hosana, ni vamakwavo, va ri 130.

⁸Va vana va Elisafani: Xemaya, hosana, ni vamakwavo, va ri 200.

⁹Va vana va Hebroni: Eliele, hosana ni vamakwavo, va ri 80.

¹⁰Va vana va Uziele: Aminadaba, hosana, ni vamakwavo, va ri 112.

¹¹Davhida a vitana vaprista Sadoki na Abiyatara ni Valevhi, Uriele Asaya na Yuwele, na Xemaya na Eliele a Aminadaba,

¹²a ku eka vona: “Hi n'wina mi nga tihosana ta tindlu ta Valevhi; tibasiseni n'wina ni vamakwenu, mi ta rhwala areka ya Yehovha, Xikwembu xa Israele, mi ya yi veka endhawini leyi ndzi yi lunghiseleke yona.

¹³Hikuva a mi nga ri kona eku sunguleni, kutani Yehovha, Xikwembu xa hina u endlile mbhovo exikarhi ka hina, hikuva a hi n'wi lavanga hilaha ku lerisiweke hakona.”

¹⁴Kutani vaprista ni Valevhi va tibasisa ku ya rhwala areka ya Yehovha, Xikwembu xa Israele.

¹⁵Vana va Levhi va rhwala areka ya Xikwembu emakatleni ya vona, hi mimpingu leyi vekiweke ehenhla ka vona, hilaha Muxe a leriseke hakona hi rito ra Yehovha.

¹⁶Davhida a lerisa tihosana ta Valevhi ku nghenisa vamakwavo, vayimbeleri, entirhweni, va va ni timbila, ni tiharipa, leti va fanelaka ku yimba tona hi matimba, ku kombisa ku tsaka.

¹⁷Valevhi va nghenisa entirhweni Hemani, n'wana Yuwele ni exikarhi ka vamakwavo, Asafa, n'wana Berekiya; ni le xikarhi ka vana va Merari vamakwavo, Etani, n'wana Kuxaya;

¹⁸vamakwavo lavatsongo a va ri na vona, a a ri Zakariya, n'wana Yaaziele, na Xemiramoto, na Yehiele, na Uni, na Eliyabu, na Benaya, na Maaseya, na Matitiya, na Elifale na Mikineya, na Obede-Edomu, na Yehiele valanguteri va tinyangwa.

¹⁹Vayimbeleri, a va ri Hemani, na Asafa na Etani, va ri ni swiphambati swa koporo ku swi pfumisa,

²⁰na Zakariya, na Yaaziele, na Xemiramoto, na Yehiele, na Uni, na Eliyabu, na Maaseya na Benaya, va ri ni timbila ta alamoto (ta tinoto leti tlakukeke).

²¹Na Matitiya, na Elifale, na Mikineya, na Obede-Edomu na Yehiele, na Azaziya, va ri ni tiharipa ta xeminiti (ta tinoto ta le hansi), ku fambisa tinsimu;

²²Kenaniya, ndhuna ya Valevhi, a a ri mufambisi wa swiyimbeleri; a dyondzisa ku yimbelela, hikuva a a tlharihile;

²³Berekiya na Elikana a va ri vahlayisi va areka;

²⁴Xebaniya na Yoxafati na Netanele na Amasayi na Zakariya, na Benaya na Eliezere, a va ri vaprista lava yimbaka tinanga emahlweni ka areka ya Xikwembu; Obede-Edomu, na Yehiya a va ri valanguteri va areka.

²⁵Davhida ni vakulukumba va Israele ni tindhuna ta khume ra madzana, va suka ku ya teka areka ya ntwanano wa Yehovha endlwini ya Obede-Edomu hi ku tsaka.

²⁶Kavaloko Xikwembu xi pfuna Valevhi lava rhwaleke areka ya ntwanano wa Yehovha, kutani va tlhava tinkunzi ta ntlhanu na timbirhi, ni makhuna ya ntlhanu na mambirhi.

²⁷Davhida a ambarile nguvu ya ntsembyana lowo saseka swin'we ni Valevhi hinkwavo lava rhwaleke areka, ni swiyimbeleri, na Kenaniya, mufambisi wa swiyimbeleri exikarhi ka swona, na yena Davhida a ambarile efodi ya ntsembyana.

²⁸Vaisraele hinkwavo va heleketa areka ya ntwanano wa Yehovha, va ri karhi va huwelela hi ku tsaka, va pfumisa timhalamhala, ni tinanga, ni swiphambati, ni magubu, ni tiharipa.

²⁹Kakuloko areka ya ntwanano wa Yehovha yi nghena emutini wa Davhida, Mikala, n'wana Sawulo, a a languta efasitereni, a vona hosi Davhida loko a ri karhi a tlula, a cina kutani a n'wi sandza embilwini ya yena.