Read tsonga I Tikronika 20 Bible Online

I Tikronika 20 - tsonga bible

I Tikronika 20

¹Lembe leri tlhandlamaka, hi nkarhi lowu tihosi ti humaka nyimpi, Yowabu a fambisa nyimpi, a ya hlasela tiko ra vana va Amoni, a rhendzela Rhaba, kambe Davhida a sala eYerusalema; Yowabu a hlula Raba, a wu mbundzuxa.

²Davhida a teka harhi ya vuhosi ya hosi ya vona enhlokweni ya yona, a yi kuma yi ri ya talenta ya nsuku, yi namekiwile hi maribye ya risima; kutani yi vekiwa enhlokweni ya Davhida; a teka ni xuma lexikulu ngopfu emutini, a famba ra xona.

³Loko va ri vaaki va wona, a va humesa, a va tirhisa emasaheni, ni le tipikeni ta nsimbhi, ni le swihlokeni. Davhida a endlisa sweswo emitini hinkwayo ya vana va Amoni. Kutani Davhida a tlhela a muka eYerusalema, ni tiko hinkwaro.

⁴Endzhaku ka sweswo a ku ri ni ku lwa ni Vafilista eGezere. Sibekayi, wa Huxa, a dlaya Sipayi, un'wana wa vana va Rafa. Kutani Vafilista va tsongahatiwa.

⁵A ku ri ni ku lwa kun'wana ni Vafilista, Elihanani, n'wana Yayiro, a dlaya Lahimi, makwa Goliyadi, wa Gati, la ngi a ri ni tlhari leri mbhingo wa rona wu fanaka ni mhandze ya muluki.

⁶A ku ri ni ku lwa kun'wana eGati. Wanuna wa xiyimo lexikulu, la ngi a ri ni tintiho ta ntlhanu na rin'we emavokweni ni le milengeni, ti ri ta makume mambirhi na mune; na yena a a ri ntukulu wa Rafa.

⁷Kakuloko a sandza Israele, Yonatani, n'wana Ximeya, makwa Davhida, a n'wi dlaya.

⁸Vavanuna lava a va ri vana va Rafa, wa Gati; va dlawa hi voko ra Davhida, ni voko ra malandza ya yena.