Read tsonga I Tikronika 21 Bible Online

I Tikronika 21 - tsonga bible

I Tikronika 21

¹Satana a pfukela Vaisraele, kutani a kucetela Davhida ku hlaya Vaisraele.

²Kutani Davhida a ku eka Yowabu ni ka tindhuna ta tiko: “Fambani, mi ya hlaya Vaisraele, ku suka eBerexeba ku fika eDani, mi ta ndzi tivisa leswaku ndzi tiva ntsengo wa vona.”

³Yowabu a ku: “Yehovha a a engetele tiko ra yena eka dzana! Oho, hosi yanga! Xana hinkwavo a hi malandza ya hosi yanga xana? Hosi yanga yi lavela yini mhaka leyi? Israele a ta va ni nandzu wa swona hikwalaho ka yini-ke?”

⁴Kambe rito ra hosi ri hlula Yowabu, kutani Yowabu a suka a rhendzeleka etikweni hinkwaro ra Israele, kutani a tlhelela eYerusalema.

⁵Yowabu a tivisa Davhida ntsengo wa ku hlayiwa ka tiko: etikweni hinkwaro ra Israele, a ku ri ni vavanuna va 1 100 000 lava tamelaka timpanga, ni le tikweni ra Yuda, vavanuna va 470 000 lava tamelaka timpanga.

⁶A nga hlayanga Valevhi ni va Benjamini exikarhi ka vona, hikuva ku lerisa ka hosi a ma ri manyala eka Yowabu.

⁷Mhaka leyi yi biha emahlweni ka Xikwembu, kutani xi ba Israele.

⁸Davhida a ku eka Xikwembu: “Ndzi dyohile ngopfu hi ku endla mhaka leyi! Sweswi, wa nga susa xidyoho xa nandza wa wena, hikuva ndzi endlile hi vuphukuphuku lebyikulu!”

⁹Kavaloko Yehovha a vulavula na Gadi, muvoni wa Davhida, a ku:

¹⁰“Famba u vulavula na Davhida, u ku: ‘Yehovha u vurisa sweswo, a ku: “Ndzi veka swilo swinharhu emahlweni ka wena: Hlawula xin'wana, ndzi ta ku endlela xona.” ’ ”

¹¹Kutani Gadi a ta eka Davhida, a ku eka yena: “Yehovha u vurise sweswo, a ku:

¹²‘Hlawula, hambi ndlala ya malembe manharhu; hambi ku hlongorisiwa tin'hweti tinharhu hi valala va wena, u ri karhi u tlhaviwa hi tlhari ra vona; hambi masiku manharhu lawa tlhari ra Yehovha ni ntungu swi nga ta va etikweni ra Israele ha wena, ni ntsumi ya Yehovha yi ri karhi yi onha etikweni hinkwaro.’ Sweswi, vona leswi ndzi nga ta swi hlamula eka loyi a ndzi rhumeke.”

¹³Davhida a ku eka Gadi: “Ndzi ni gome lerikulu! A ndzi wele emavokweni ya Yehovha, hikuva tintswalo ta yena i tikulu ngopfu; ndzi nga tshuki ndzi wela emavokweni ya vanhu!”

¹⁴Yehovha a rhuma ntungu etikweni ra Israele, kutani ku fa vanhu va Israele va 70 000.

¹⁵Kutani Xikwembu xi rhumela eYerusalema, ntsumi ku wu heta; kakuloko ntsumi yi ri karhi yi onha, Yehovha a languta! A va a tlhela eku biheni loku, a ku eka ntsumi leyi ngi yi ri karhi yi onha: “Swi ringene! Sweswi, tlherisa voko ra wena!” Kutani ntsumi ya Yehovha yi yima ekusuhi ni xivuya xa Orinani wa ka Yebusi.

¹⁶Davhida, kuteloko a tlakusile mahlo ya yena, a vona ntsumi ya Yehovha leyi yimaka exikarhi ka misava ni tilo, yi ri ni banga leri hlomuriweke evokweni ra yona, yi komba Yerusalema ha rona. Kavaloko Davhida ni vakulukumba va wela ehansi emimombyeni ya vona, va ambele tinguvu to khwaxa.

¹⁷Davhida a ku eka Xikwembu: “A hi mina loyi ndzi leriseke ku hlaya tiko Xana? Hi mina ndzi dyoheke ndzi endleke lexo biha lexikulu, kambe tinyimpfu leti ti endle yini xana? Yehovha, Xikwembu xanga, voko ra wena a ri ve ehenhla ka mina, ni le henhla ka yindlu ya tatana, ri nga tshuki ri va ehenhla ka tiko ra wena ku ri dlaya!”

¹⁸Kavaloko ntsumi ya Yehovha yi byela Gadi ku ya vulavula na Davhida, leswaku a tlhandluka ku ya yimisela Yehovha alitari exivuyeni xa Orinani wa ka Yebusi.

¹⁹Kutani Davhida a tlhandluka hilaha Gadi a n'wi byeleke ha kona hi vito ra Yehovha.

²⁰Kuteloko Orinani a hundzulukile, a vona ntsumi, kutani a tumbela ni vana va yena va xinuna va mune lava ngi va ri na yena; Orinani a a ri karhi, a hula koro.

²¹Davhida a fika eka Orinani, kutani Orinani a languta, a vona Davhida, a huma exivuyeni, a khinsama ehansi emahlweni ka Davhida.

²²Davhida a ku eka Orinani: “Ndzi nyike ndhawu ya xivuya, ndzi ta akela Yehovha alitari kona; ndzi nyike yona u yi ringanisa hi mali hinkwayo ya yona, leswaku mbanga leyi yi tlherisiwa ehenhla ka tiko.”

²³Orinani a ku eka Davhida: “Yi teke: hosi, n'wini wanga, a yi endle hilaha swi lulameke emahlweni ya yona: waswivo, ndzi nyika ni tihomu leti ta holokosta, ni tigolonyi ti va tihunyi, ni koro ya nyiko; ndzi nyika hinkwaswo.”

²⁴Hosi Davhida a ku eka Orinani: “E-e! Kambe ndzi rhandza ku yi xava hi mali hinkwayo ya yona hikuva ndzi nga ka ndzi nga nyiki Yehovha leswi nga swa wena; ndzi nga ka ndzi nga humesi holokosta leyi ndzi nga yi humeselangiki nchumu.”

²⁵Kavaloko Davhida a nyika Orinani tixikele ta nsuku ta 600, ti va ta ndhawu leyi.

²⁶Davhida a akela Yehovha alitari kona, kutani a humesa tiholokosta ni magandzelo ya ku khensa, kutani a khongela Yehovha la n'wi hlamulaka hi ndzilo lowu xikeke hi le tilweni ealitarini ya tiholokosta.

²⁷Kolaho Yehovha a vulavula ni ntsumi, kutani yi tlherisa banga ra yona enkotlotweni.

²⁸Enkarhini wolowo, Davhida, kuteloko a vonile leswaku Yehovha a n'wi yingisile exivuyeni xa Orinani, wa ka Yebusi, a humesa magandzelo kona.

²⁹Loko yi ri yindlu ya Yehovha leyi Muxe a yi endleke emananga, ni alitari ya tiholokosta, a swi ri exitsungeni xa Gibiyoni enkarhini wolowo.

³⁰Kambe Davhida a tsandzeka ku ya emahlweni ka alitari leyi, ku lava Xikwembu, hikuva a a chavile hikwalaho ka banga ra ntsumi ya Yehovha.