Read tsonga I Tikronika 28 Bible Online

I Tikronika 28 - tsonga bible

I Tikronika 28

¹Davhida a hlengeleta eYerusalema, tihosana hinkwato ta Israele, ti ri tihosana ta tinyimba, ni tindhuna ta mitlawa leyi tirhelaka hosi, ni tindhuna ta khume ra madzana, ni tindhuna ta dzana, ni valanguteri va xuma hinkwaxo, ni va swifuwo hinkwaswo swa hosi, ni lava hlayisaka Vana va yona, ni vatsheniwa, ni vavanuna va matimba ni tinhenha hinkwato.

²Kutani hosi Davhida a yima hi milenge ya yena, a ku: “Ndzi yingiseni, vamakwerhu ni tiko ranga! A ndzi rhandzile ku akela areka ya ntwanano wa Yehovha, ni vunavelo bya Xikwembu xa hina, yindlu ya ku wisa; ndzi lunghisile mitirho ya ku aka.

³Kambe Xikwembu xi te eka mina: ‘U nga ka u nga akeli vito ra mina yindlu, hikuva u munhu wa nyimpi u va u halatile ngati.’

⁴Yehovha Xikwembu xa Israele, u ndzi hlawurile endlwini hinkwayo ya tatana, leswaku ndzi va hosi ya Israele hi masiku; hikuva u hlawurile Yuda ku va hosi, ni le nyimbeni ya Yuda, u hlawurile yindlu ya tatana; ni le xikarhi ka vana va tatana, hi mina loyi a tsakeleke ku ndzi veka hosi ya Vaisraele hinkwavo.

⁵Ni le xikarhi ka vana va mina hinkwavo (hikuva Yehovha u ndzi nyikile vana va xinuna lavo tala), u hlawurile Solomoni, n'wananga, leswaku a tshamisa exiluvelweni xa vuhosi bya Yehovha, ehenhla ka Israele,

⁶a ku eka mina: ‘Hi yena Solomoni, n'wana wa wena, la nga ta aka yindlu ya mina, ni swivava swa mina, hikuva ndzi tihlawulele yena leswaku a va n'wananga, kutani ndzi ta va tata wa yena.

⁷Ndzi ta tiyisa vuhosi bya yena hi masiku, loko a tiya ku hlayisa milawu ya mina, ni ku lerisa ka mina kukotisa namuntlha.’

⁸Sweswi ndzi vulavula ndzi ri emahlweni ka Vaisraele hinkwavo, leyi nge nhlengeletano ya Yehovha, ni le tindleveni ta Xikwembu xa hina, ndzi ku: ‘Hlayisani, mi lavisisa milawu hinkwayo ya Yehovha, Xikwembu xa n'wina, leswaku mi fuma tiko lerinene leri, mi ta ri siyela vana va n'wina endzhaku ka n'wina, yi va ndzhaka ya vona hi masiku.

⁹Na wena, Solomoni, n'wananga, tiva Xikwembu xa tata wa wena, u xi tirhela hi mbilu leyi tengeke ni ku tsaka ka moya; hikuva Yehovha a kamba timbilu hinkwato, kutani a tivisisa makungu hinkwawo ya ku anakanya. Kungakuloko u n'wi lavisisa, u ta n'wi kuma; kambe loko u n'wi tshika, u ta ku cukumeta hilaha ku nga heriki.

¹⁰Vona sweswi leswaku Yehovha u ku hlawurile ku aka yindlu ya vukwetsimelo Tiya mbilu, u tirha!’ ”

¹¹Kutani Davhida a nyika Solomoni n'wana wa yena, xifaniso xa nyangwa ya tempele, ni xa tindlu ta yona, ni xa tindlu ta xuma xa yona, ni swa makamara lawa tlakukeke ta yona, ni xa makamara ya le xikarhi ka yona, ni xa yindlu ya vukhongelelo.

¹²A n'wi nyika xifaniso xa hinkwaswo leswi ngi a ri na swona emoyeni wa yena, xa swivava swa yindlu ya Yehovha ni xa makamara hinkwawo ya matlhelo, ta xuma xa yindlu ya Xikwembu, ni ta xuma xa swilo leswi hlawuriweke,

¹³ni xa mitlawa ya vaprista ni Valevhi, ni swa ntirho hinkwawo wa yindlu ya Yehovha ni swa swigotso hinkwaswo swa ntirho wa yindlu ya Yehovha.

¹⁴A n'wi nyika swifaniso swa swibya swa nsuku ni ku tika ka nsuku wa swona, swi ri swa ntirho wun'wana ni wun'wana, ni swa swibya hinkwaswo swa silivhere, ni ku tika ka silivhere ya swibya swa mitirho ya tinxakaxaka;

¹⁵ni ku tika ka tikandelari ta nsuku, ni mavoningo ya tona ya nsuku; ni ku tika ka kandelari yin'wana ni yin'wana, ni mavoningo ya yona; ni ku tika ka tikandelari ta silivhere, hi ku tika ka kandelari yin'wana ni yin'wana, ni mavoningo ya yona swi ya hi ntirho wa kandelari yin'wana ni yin'wana.

¹⁶A n'wi lerisa ni ku tika ka nsuku wa matafula ya swinkwa leswi vekiwaka emahlweni ka Yehovha, eka tafula rin'wana ni rin'wana, ni ku tika ka silivhere ya matafula ya silivhere;

¹⁷ni ka tiforoko, ni mikambana, ni mindzheko, swi ri swa nsuku lowo saseka; ni ka makhuwana ya nsuku hi ku tika ka khuwana rin'wana ni rin'wana ni ka makhuwana ya silivhere, hi ku tika ka khuwana rin'wana ni rin'wana;

¹⁸ni ka alitari ya mirhi ya risuna, wu ri nsuku lowu ringiweke, hi ku tika loku fanelaka; a n'wi nyika ni xifaniso xa golonyi ya tikerubu leti ungamelaka hi timpapa ta tona, ti funengeta areka ya ntwanano wa Yehovha.

¹⁹Timhaka hinkwato leti, ni swifaniso hilaha ku nga ta tirhiwa hakona, swi tsariwile; i Yehovha, la nga ndzi nyika ku twisisa eka swona.

²⁰Davhida a engeta a ku eka Solomoni, n'wana wa yena: “Tiya mbilu u tiya, u endla hakona! U nga chavi, u nga heli mbilu, hikuva Yehovha, Xikwembu, Xikwembu xa mina, u ta va na wena, a nga ka a nga ku tshiki, a nga ka a nga ku rivali, mitirho hinkwayo ya ntirho wa yindlu ya Yehovha yi ko yi hela.

²¹Hi yona mitlawa ya vaprista ni Valevhi ya ku tirha ntirho hinkwawo wa yindlu ya Xikwembu; kutani u ni vanhu lava tlhariheke, lavo tala lava rhandzaka ku endla hi timbilu tinxaka hinkwato ta mitirho, ni tindhuna ta tiko hinkwaro ti kona ku endla hinkwaswo hilaha u nga ta va byela hakona.”