Read tsonga II Tikronika 10 Bible Online

II Tikronika 10 - tsonga bible

II Tikronika 10

¹Rhobuwamu a ya eXikeme hikuva Vaisraele hinkwavo a va tile eXikeme ku n'wi veka hosi.

²Yerobuwamu, n'wana Nebati, kuteloko a swi twile (hikuva a a ri eEgipta laha a a balekele kona hikwalaho ka hosi Solomoni), a tlhela hi le Egipta.

³Va rhuma vanhu, va ya n'wi vita, kutani Yerobuwamu ni Vaisraele hinkwavo va ta, va vulavula na Rhobuwamu, va ku:

⁴“Tata wa wena u hi rhwexe mpingu lowo tika, wena sweswi u nga vevukisa mitirho leyo nonon'hwa, ni mpingu lowo tika lowu tata wa wena a hi rhwexeke, kutani hi ta ku tirhela.”

⁵Yena a ku eka vona: “Tlhelani mi ya xwa masiku manharhu, kutani mi vuya eka mina.” Kutani tiko ri muka.

⁶Hosi Rhobuwamu a vutisa vakulukumba lava tirheleke Solomoni, tata wa yena, loko a ha hanya, a ku eka vona: “Ndzi ta hlamurisa ku yini eka tiko leri xana?”

⁷Kavaloko va vulavula na yena, va ku: “Kungakuloko u endlela tiko leri hi vunene ni loko u va amukela hi tintswalo, u vulavula na vona hi vunene va ta ku tirhela hi masiku.”

⁸Kambe Rhobuwamu a tshika marito lawa vakulukumba va n'wi byeleke wona, kutani a endla makungu ni majaha lama kuleke na yena, lama n'wi tirhelaka.

⁹A ku eka vona: “Hi nga hlamula yini eka tiko leri vulavuleke na mina, ri ku: ‘Vevukisa mpingu lowu tata wa wena a wu vekeke ehenhla ka hina’?”

¹⁰Majaha lama kuleke na yena ma n'wi hlamula, ma ku: “U ta vurisa sweswo eka tiko leri vulavuleke na wena, ri ku: ‘Tata wa wena u vekile ehenhla ka hina mpingu lowo tika, kambe wena, wu vevukise,’ u ta va byela sweswo u ku: ‘Xintihwana xa mina xi tlula xifungha xa tatana.

¹¹Tatana u mi rhwexile mpingu lowo tika, kambe mina ndzi ta engeta ndzi wu tikisa; tatana u mi layile hi mikharisa, mina ndzi ta mi laya hi swipame!’ ”

¹²Kutani Yerobuwamu ni tiko hinkwaro va ta eka Rhobuwamu siku ra vunharhu, hilaha hosi yi va byeleke hakona, loko yi te: “Tlhelani, mi ta vuya eka mina hi siku ra vunharhu.”

¹³Kutani hosi yi va hlamula hi ku nonon'hwa; hosi Rhobuwamu a tshika marito ya vakulukumba,

¹⁴kutani a vulavula na vona hilaha majaha ma n'wi byeleke hakona, yi ku: “Tatana u mi rhwexile mpingu lowo tika, kambe mina ndzi ta engeta ndzi wu tikisa; tatana u mi layile hi mikharisa, mina ndzi ta mi laya hi swipame.”

¹⁵Sweswo hosi a yi yingisangi tiko, hikuva a swi huma eka Xikwembu, leswaku Yehovha a hetisa rito leri a nga ri vula eka Yerobuwamu, n'wana Nebati, ha Ahiya, wa Xilo.

¹⁶Vaisraele hinkwavo, kuteloko va vonile leswaku hosi a yi va yingisanga, va hlamula, va ku eka hosi: “Hi ni ku averiwa kwihi na Davhida xana? A hi na ndzhaka ni n'wana Yese! Vaisraele, tlhelelani emitsongeni ya n'wina! Sweswi wee Davhida, langutela yindlu ya wena!” Kutani Vaisraele hinkwavo va timukela ekaya ka vona.

¹⁷Loko va ri vana va Israele lava akeke emitini ya Yuda, Rhobuwamu a fuma ehenhla ka vona.

¹⁸Kutani hosi Rhobuwamu a rhuma Hadorama, ndhuna ya xibalo; kambe vana va Israele va n'wi khandla hi maribye, a fa. Kutani hosi Rhobuwamu a hatlisa ku khandziya egolonyini, a tsutsumela eYerusalema.

¹⁹Hi mukhuva wolowo Vaisraele va xandzukele yindlu ya Davhida ku fika siku leri.