Read tsonga II Tikronika 13 Bible Online

II Tikronika 13 - tsonga bible

II Tikronika 13

¹Hi lembe ra 18 ra ku fuma ka Yerobuwamu, Abiya a sungula ku fuma ehenhla ka Yuda.

²A fuma malembe manharhu eYerusalema; vito ra mana wa yena a a ri Mikaya, n'wana Uriele, wa Gibeya. Ku lwa ku va kona exikarhi ka Abiya na Yerobuwamu.

³Abiya a huma nyimpi a ri ni vavanuna lava hlawuriweke va 400 000 ti ri tinhenha; Yerobuwamu a huma nyimpi ku lwa na yena, a ri ni vavanuna lava hlawuriweke va 800 000, ti ri tinhenha.

⁴Kavaloko Abiya a yima enhlohlorhini ya ntshava ya Semarayimi leyi nga etintshaveni ta Efrayimi, a ku: “Wee Yerobuwamu, ni Vaisraele hinkwenu, ndzi yingiseni!

⁵A mi swi tivi leswaku Yehovha, Xikwembu xa Israele, u nyikile Davhida ni vana va yena vuhosi bya Israele hi ntwanano lowu tiyeke hi masiku?

⁶Kambe Yerobuwamu, n'wana Nebati, nandza wa Solomoni, n'wana Davhida, u pfukile kutani u xandzukele hosi ya yena;

⁷kutani vanhu lava nga riki va nchumu, vavanuna lavo biha, va hlengeletanile eka yena, va titiyisa ku hlula Rhobuwamu, n'wana Solomoni. Rhobuwamu a a ri lontshwa, a nga tiyangi mbilu, kutani a nga kumangi matimba emahlweni ka vona.

⁸Sweswi mi ehleketa ku kuma matimba emahlweni ka vuhosi bya Yehovha, lebyi nga emavokweni ya vana va Davhida; mi vunyingi lebyikulu, kutani mi ni marhole ya nsuku lawa Yerobuwamu a mi endleleke ku va swikwembu swa n'wina.

⁹Xana a mi hlongolanga vaprista va Yehovha, vana va Aroni ni Valevhi xana? Kutani mi tivekele vaprista kukotisa matiko man'wana. Mani na mani la taka ku hlawuleriwa, a ri ni nkunzi ni makhuna ya ntlhanu na mambirhi u vekiwa muprista wa lexi nga riki xikwembu.

¹⁰Loko hi ri hina, Yehovha i Xikwembu xa hina; a hi n'wi tshikanga, kutani vaprista lava tirhaka ntirho wa Yehovha, i vana va Aroni, ni Valevhi va tirha mitirho ya vona.

¹¹Siku rin'wana ni rin'wana, nimixo ni madyambu, va hisela Yehovha tiholokosta ni mirhi ya risuna, va veka ni swinkwa swa xikombiso etafuleni leri tengeke va lumeka nimadyambu masiku hinkwawo mavoningo ya kandelari ya nsuku, hikuva hi hlayisa milawu ya Yehovha, Xikwembu xa hina, kambe n'wina mi n'wi tshikile.

¹²Kutani maswivo, Xikwembu xi na hina emahlweni ka hina, swin'we ni vaprista va xona, ni tinanga leti pfumaka ku ta pfumisela n'wina. Vana va Israele! Mi nga humi nyimpi ku lwa na Yehovha, Xikwembu xa vatata wa n'wina, hikuva mi nga ka mi nga hluli.”

¹³Kavaloko Yerobuwamu a va rhendzela hi le ndzhaku hi vatumbeleri; kutani nyimpi ya yena yi langutana ni va Yuda lava rhendzeriweke hi le ndzhaku.

¹⁴Va ka Yuda va hundzuluka, kutani waswivo a va ri ni nyimpi emahlweni ni le ndzhaku. Kambe va huwelela eka Yehovha, ni vaprista va yimba tinanga;

¹⁵vanhu va Yuda va tlhava mukhosi, kutani kakuloko Vayuda va huwelela, Xikwembu xi lwa na Yerobuwamu ni Vaisraele hinkwavo, xi va hlula emahlweni ka Abiya ni va Yuda.

¹⁶Vana va Israele va tsutsuma emahlweni ka va Yuda, kutani Xikwembu xi va nyiketa emavokweni ya vona.

¹⁷Abiya ni tiko ra yena va va hlula ngopfu hikuva ku wile vavanuna va Israele lava hlawuriweke va 500 000, va tlhaveriwe ku fa.

¹⁸Vana Vaisraele va tsongahatiwa enkarhini wolowo, kambe vana va Yuda va tiyisiwa hikuva va tshembile Yehovha, Xikwembu xa vatata wa vona.

¹⁹Abiya a hlongorisa Yerobuwamu, a n'wi tekela miti: eBetele, ni miti ya wona, na Yexana ni miti ya wona, na Efroni, ni miti ya wona.

²⁰Yerobuwamu a nga ha kumanga matimba emasikwini ya Abiya; kutani Yehovha a n'wi ba, a fa.

²¹Kambe Abiya a kuma matimba; a teka vasati va 14, a veleka vana va xinuna va 22 ni vana va xisati va 16.

²²Leswi seleke swa timhaka ta Abiya, leswi a swi endleke, ni leswi a swi vuleke swi tsariwile etimhakeni ta muprofeta Ido.