Read tsonga II Tikronika 15 Bible Online

II Tikronika 15 - tsonga bible

II Tikronika 15

¹Moya wa Xikwembu wu va ehenhla ka Azariya, n'wana Odede,

²kutani a humelela emahlweni ka Asa, a ku eka yena: “Wee Asa, ni va Yuda hinkwenu, ni va Benjamini, ndzi yingiseni! Yehovha u na n'wina loko mi ri na yena; kungakuloko mi n'wi lava, u ta pfumela ku kumiwa hi n'wina; kambe loko mi n'wi tshika, u ta mi tshika.

³Enkarhini lowo leha, Israele u pfumarile Xikwembu lexi nga xona, ni muprista la dyondzisaka, ni nawu;

⁴kambe loko va ri eku chaveni, va hundzulukele eka Yehovha, Xikwembu xa Israele, va n'wi lavile, kutani va n'wi kumile.

⁵Emikarhini yoleyo vafambi a va nga ri na ku rhula, hikuva mikitsikitsi a yi tele exikarhi ka vaaki hinkwavo va matiko,

⁶tiko rin'wana ri pfukela tiko rin'wana, ni muti wun'wana wu pfukela muti wun'wana, hikuva Xikwembu xi va pfilunganya hi ku chava ka tinxakaxaka.

⁷Loko mi ri n'wina, tiyani timbilu; mavoko ya n'wina ma nga tshuki ma tsana, hikuva ntirho wa n'wina wu ta va ni hakelo.”

⁸Asa, kuteloko a yingisile marito lawa ni ku profeta ka Odede, muprofeta, a tiya mbilu, kutani a susa manyala ya tiko hinkwaro ra Yuda ni ra Benjamini ni ya miti leyi a yi tekeke entshaveni ya Efrayimi, a pfuxa ni alitari ya Yehovha leyi ngi yi ri emahlweni ka nyangwa ya Yehovha.

⁹Kutani a hlengeleta vanhu hinkwavo va Yuda, ni va Benjamini, ni va Efrayimi, ni va Manase, ni va Simiyoni lava akeke exikarhi ka vona; hikuva Vaisraele lavo tala a va tinyiketile eka yena hi ku va va vona leswaku Yehovha, Xikwembu xa yena, a a ri na yena.

¹⁰Va hlengeletana eYerusalema, hi n'hweti ya vunharhu ya lembe ra khume na ntlhanu ra ku fuma ka Asa.

¹¹Siku rolero, va humesela Yehovha magandzelo lama humaka eka swifuwo leswi va swi tiseke, ti ri tihomu ta 700, ni tinyimpfu ta 7 000.

¹²Kutani va tiboha ku lava Yehovha, Xikwembu xa vatata wa vona, hi timbilu hinkwato ta vona ni mimoya hinkwayo ya vona;

¹³kutani mani ni mani la nga rhandziki ku lava Yehovha, Xikwembu xa Israele, a a fanele ku dlawa, hambi a ri lontsongo, hambi a ri lonkulu, hambi a ri wanuna, hambi a ri wansati.

¹⁴Kutani va tiboha eka Yehovha hi ku hlambanya hi rito lerikulu, ni ku huwelela ka ku tsaka, ni ku pfuma ka tinanga ni ka timhalamhala.

¹⁵Hinkwavo va Yuda va tsakela ku hlambanya loku, hikuva a va hlambanyile hi timbilu hinkwato ta vona, kutani va lavile Yehovha hi ku rhandza ka vona, kutani va n'wi kumile; kutani Yehovha u va nyikile ku wisa ematlhelweni hinkwawo.

¹⁶Hambi a ri Maaka, mana wa yena, hosi Asa a n'wi humesa evuhosini bya yena, hikuva a endlele Axera xifaniso; Asa a mbundzuxa xifaniso xa yena, a xi fayetela, a xi hisa exinambyaneni xa Kedroni.

¹⁷Kambe switsunga a swi susiwanga etikweni ra Israele; hambiswiritano, mbilu ya Asa a yi tengile hi masiku hinkwawo ya yena,

¹⁸a tisa endlwini ya Xikwembu, swilo leswi hlawuriweke hi tata wa yena na yena; yi ri silivhere, ni nsuku, ni mikambana.

¹⁹A ku vanga na nyimpi ku fikela lembe ra 35 ra ku fuma ka Asa.