Read tsonga II Tikronika 16 Bible Online

II Tikronika 16 - tsonga bible

II Tikronika 16

¹Hi lembe ra 36 ra ku fuma ka Asa, Baaxa, hosi ya Israele, a tlhandlukela etikweni ra Yuda, a aka Rhama leswaku a ta sivela vanhu va Asa, hosi ya Yuda, ku huma ni ku nghena.

²Kavaloko Asa a humesa silivhere ni nsuku exumeni xa yindlu ya Yehovha ni xa yindlu ya hosi, kutani a swi rhumela Bene-Hadada, hosi ya Siriya, la akeke eDamaska, a ku:

³“Ku ni xinakulobye exikarhi ka mina na wena, ni le xikarhi ka tatana ni tata wa wena. Waswivo, ndzi ku rhumela silivhere ni nsuku; famba u onha xinakulobye xa wena, na Baaxa, hosi ya Israele, leswaku a ndzi sukela.”

⁴Bene-Hadada a yingisa hosi Asa, kutani a rhuma tindhuna ta nyimpi ya yena ku ya lwa ni miti ya Israele va hlasela Iyoni, na Dani, na Avele-Mayimi, ni tindlu hinkwato ta matlhari ta miti ya Neftali.

⁵Baaxa, kuteloko a swi twile, a tshika ku aka Rhama, a tshika ni mitirho ya yena.

⁶Hosi Asa a vitana va Yuda hinkwavo, kutani va ya teka maribye ya Rhama ni timhandze leti Baaxa a akeke ha tona, va aka Geba na Mispa ha swona.

⁷Enkarhini wolowo, Hanani, muvoni, a ta eka Asa, hosi ya Yuda, a ku eka yena: “Leswi u tshembeke hosi ya Siriya, u nga tshembangiki Yehovha, Xikwembu xa wena, hikwalaho ka swona, nyimpi ya hosi ya Siriya yi chupukile emavokweni ya wena.

⁸Xana nyimpi ya Vaetiyopiya ni Valibiya a yi vanga leyikulu ngopfu, va ri ni vunyingi lebyikulu ngopfu bya tigolonyi ni vakhandziyi va tihanci xana? Kambe leswi u tshembeke Yehovha, u va nyiketile emavokweni ya wena.

⁹Hikuva mahlo ya Yehovha ma fambafamba emisaveni hinkwayo ku tiyisa lava nga va yena hi timbilu hinkwato ta vona. U endlile hi vuhunguki emhakeni leyi, hikuva ku sungula sweswi, u ta va ni tinyimpi.”

¹⁰Kavaloko Asa a karihela muvoni, a n'wi nghenisa ekhotsweni, hikuva a a n'wi karihele emhakeni leyi. Enkarhini wolowo Asa a xanisa van'wana va tiko.

¹¹Timhaka ta Asa, leto sungula ni ta ku hetelela, ti tsariwile ebukwini ya tihosi ta Yuda ni ta Israele.

¹²Hi lembe ra 39 ra ku fuma ka yena, Asa a vabya hi milenge, hi vuvabyi lebyo leva ngopfu, kambe ni le vuvabyini bya yena, a nga lavanga Yehovha, kambe a lava tin'anga.

¹³Asa a etlela ni vatata wa yena, a fa hi lembe ra 41 ra ku fuma ka yena,

¹⁴va n'wi lahla esirheni leri a ticeleleke rona emutini wa Davhida. Va n'wi lata esangwini leri teleke hi mirhi ya risuna, ni tinxaka hinkwato ta mirhi leyi hlanganisiweke hi vutlhari; kutani va n'wi hisela mirhi ya risuna ya ku tala ngopfu.